Footer

Pannakapadur-as dagiti pasilidad ken serbisio iti GSGH, pinasingkedan ni Dr. Talaga

VIGAN CITY – AGTULTULOY a pannakapadur-as dagiti pasilidad ken pannakapasayaat ti serbisio kadagiti pasiente ti Gabriela Silang General Hospital wenno Ilocos Sur Provincial Hospital, Vigan City babaen ti panagtitimpuyog ti Provincial Government, Department of Health, dagiti personnel, ken dadduma pay nga stakeholders ken sektor.

Dayta ti pinasingkedan ni Dr. Trina Taboga Talaga, Director ti GSGH, kadagiti kameng ti Ilocos Sur Integrated Press kabayatan ti pannakiumanda kenkuana iti naangay a Kapihan iti Amianan Media Forum.

Impakaammo ni Dr. Talaga nga agtultuloy ti pannakapasayaat dagiti pasilidad iti hospital, kalpasan ti pannakapadur-as ti main building, ken pannakabangon ti baro a pasdek. Impalgakna pay nga addan pakauna a pondo a P67 Million para ti pannakabangon ti baro a lima-kadsaaran a pasdek a pakaibalayanto dagiti napateg a serbisio kadagiti pasiente pakaseknan ti cardiovascular and pulmonary cases.

Mairaman kadagiti napadur-as a pasilidad ket dagiti ward ken siled ket awanen dagiti pasiente nga agdudupudop kadagiti pasilio. Napapintas metten ti Emergency Room a pagawatan kadagiti pasiente. Naaddaan met iti airconditioned lounge dagiti para bantay wenno watchers ti Intensive Care Unit a sigud a dagiti kalapaw iti sango ti main building. Napasayaat pay ti drainage system iti compound.

Impakaammo pay ni Dr. Talaga a kalaksidan kadagiti kadaywan nga alikamen kas ti x-ray machine, CT scan, ultrasound. ECG, mammograph, ket addaanen ti ospital kadagiti machine para ti pannakatakuat ken pannakaagas iti tyroid, ken ti moderno a laboratorio ken Magnetic Resonance Imaging machine.  Impalgakna pay a ti GSGH ket addaanen iti lisensia kas blood bank a pakaalaan iti dara dagiti agkasapulan, ken ti pannakatamingen dagiti kaso ti neuro surgery.

Impakaammona a ti GSGH ket mabigbigen nga International Standard Organization, ken addaanda iti umanay a personnel a madadaan nga agserbi pakairamanan dagiti kualipikado a doktor ken nurses. Impalgakna nga iti agdama ket umad-adun dagiti doktor nga agaplikar iti ospital gapu iti napasayaat a compensation package ken working condition. Impalgakna a ti problemada ket ti panagpanaw dagiti nurse a mapan sadiay abroad a nangatngato ti sueldoda a gapu a mayatiddog ti oras ti duty ken mapalawa ti sakupen ti pagserbianda.

Inlawlawagna a dua ti klase dagiti agpapaay a doktor iti GSGH – ti organic wenno permanent doctor wenno dagiti addaan iti plantilla a regular nga agsusueldo iti ospital; ken dagiti visiting doctor kangrunaanna dagiti espesialista ken consultant. Impakaammona a dagiti organic doctor ket saanda a mabalin ti agkolekta iti professional fee kadagiti pasiente ta agsusueldodan iti ospital kabayatan ti panagserbida. Inlawlawagna a dagiti visiting doctor laeng ti mabalinna nga agsingir iti professional fee agpatingga iti P20,000.

Impakaammo ni Dr. Talaga nga uray no marigatan ti GSGH, ikagkagumaanda a serbian dagiti amin a pasiente nangruna dagiti napanglaw babaen ti panangiyendorsoda kadakuada kadagiti maseknan nga opisina ken ahensia kas ti Philhealth, Philippine Charity Sweepstake Office, dagiti congressmen iti probinsia, opisina ti gobernador ke bise gobernador ken dagiti local chief executives.

Inlawlawag ni Dr. Talaga nga iti agdama ket adda pay laeng iti Level II ti GSGH, ken ikagkagumaandan a padur-asen pay iti Level III tapno makompleto dagiti serbisioda ket agbalinton a Medical Center tapno ad-adunto a pasiente dagiti maserbianda, ken mabalindanton ti agawat kadagiti intern kadagiti medical school kas ti University of Northern Philippines School of Medicine a karruba ti ospital. Impakaammona pay nga adu dagiti estudiante iti medical technology, nursing ken midwifery ket agsansanay iti GSGH a manamnama nga inton agturposda ken agballigida iti propesionda para ti pannakataripato ti salun-at. (Eden A. Alviar)