Footer

SINURSURAN: Kasano katalged ti panagbiag itan?

AGSERSERBI iti Dios, agserserbi iti ili, nanumo nga umili, padapada a biktima ti inaldaw a pammapatay.

Kastoy itan ti bugas dagiti aginaldaw a damag iti pagilian.

Nakaal-alingget. Parettabenna ti buteng iti tunggal barukong. Awanen ti bubutngan dagiti agar-aramid itoy nakaam-ames a krimen.

Kasla biag itan ti manok ti biag ti tao, kuna payen dagiti dadduma. Nalaka laengen a sentensiaan wenno kedngan. Addan kadagiti ima ti gasat ti pada a parsua. No nakabasolka, baka maysa laengen nga aldaw, ramennakan ti damdamag.

Iti kampania kontra ti droga, manon dagiti naipatli? Ti saludsod: pudno ngata a nakabasol amin dagitoy?

No pudno man a nakabasolda, maitutop kadi ti kastoy ti nagbanaganda? Maik-ikkan la ngarud dagiti dadduma iti rason a kumettel ti biag. No adda kalaban wenno kagurada, isikatda lattan. Paruarendanto lattan a mainaig iti droga ti napasamak.

Pannakisakay iti agdama nga agus.

Kasta kadi lattan ti kalakana ti pannakalettat ti kakaisuna a biag? Di kad’ daytoy ti kapatgan a sagut ti Dios kadatayo?

Masapul ngarud nga ipategtayo.

Kaano pay, aya, a naikkantayo iti kalintegan a mangkettel iti biag?

Ita, saan laengen a dagiti adda pakainaiganna iti droga (ordinario nga umili, lider iti komunidad wenno adda kunkunana iti paggargarawantayo) dagiti biktima.

Mismo nga agserserbi iti Dios, masaggaysada metten a maipatli. Ti makadakes ditoy, agduduma dagiti maipulagid a rason iti pannakapasamak ti kasta kadakuada.

Nakadurdurmen met ngarud ti kaaduanna a rason.

Ala, wen, saan amin nga agserserbi (no patientayo ti nasao ti agdama nga ama ti pagilian) iti simbaan ket addaan iti natarnaw a panagpuspuso. Mabalin a sakbay nga addada dita, adda dagiti naaramidanda a babak.

Ngem sigurado nga iti kaaddada nga agserserbi iti Namarsua, iti bukodda a bagi, nupay dida isawsawang wenno ipakpakita iti kaaduan, mabalin nga agbabbabawida a sipapasnek. Agkidkiddaw iti pammakawan. Sapay ta iti dayta nga ar-aramidenda, mapalag-an ti riknada wenno madalusan ti kararuada.

Maipalagip iti maysa a pasamak a nakalanad iti Nasantuan a Surat. Maysa a managbasol a babai ti insaklangda ken ni Apo Jesus. Kayatda a dusaenna daytoy. Ngem kunana a ti awan basolna, isu ti umuna a mangbansag iti nakabasol.

Awan ti nangaramid kadayta. Maysanmaysa ti timmalaw wenno immadayo. Iti panangiyangad ti babai iti rupana, naimatanganna nga awanen dagiti umili a mayat a kasla mangrangrangkay kenkuana.

Kayatna a sawen, managbasol amin a naitallaong kadayta a pasamak. Amin a parsua– siak, sika, datayo amin, managbasol iti imatang Dios.

Ditayo koma ngarud a kedngan ti padatayo a parsua. No nagbasol, palubosan a ti laeng Dios ti mangdusa kenkuana. Di nga ipan kadagiti dakulap ti kunkunada a hustisia.

Pagaammotayo a dakkel a basol dayta.

Kuna dagiti agpalpaliiw, panangiliklik daytoy ti atension dagiti umili tapno saanda unay a mapanunotan dagiti di maikanatad nga inaramid ti gobierno.

Datayo a Filipino, nalaka laeng a makaliplipat kadagiti pasamak. Iti panagruar dagiti nabara nga isyu, daytoyen ti pakaitalimudokan ti orastayo—agmalmalem, agpatpatnag, agmalmalem…

No pudno man daytoy, uray iti ania man nga anggulo, saan a maikanatad. Maaramid koma dagiti rumbeng a panangidur-as iti pagilian. Saan a dayta manggubuay kadagiti nakain-inaka a pasamak.

Kadagitoy a mapaspasamak, lumlumtuad ti kinapudno a mauy-uyos kadatayo ti kinatalged nga aggargaraw iti komunidadtayo. Adda dayta aligagaw nga agbangbangon iti barukong tunggal rummuar iti pagtaengan. Uray pay adda a mismo iti uneg.

Uray kunaentayo nga awan ti maikaniwas nga ar-aramidentayo, dina kayat a sawen a ditayo agpeggad. Kasanon no ma-mistaken identity-tayo?

Adda pay ngata piduana?

Ti di sumken iti panunottayo a biktima dagiti kastoy nga aramid, dagiti adda iti simbaan a sipapakumbaba nga agserserbi iti Dios. Ditayo maibus a panunoten a dagiti kas kadakuada, agbalin met a biktima dagitoy agdama a paspasamak.

Mapawingiwingtayo lattan kadagitoy a damdamag. Ikararagan dagiti biktima; kangrunaan dagiti adda iti likudan dagitoy nga aramid. Sapay ta makapanunotda, malawlawaganda ket didanton uliten—ania man ti makagapu.

Napateg ti tunggal biag. Ania man ti kasasaad, mausar koma daytoy kas pangitan-ok iti nagan ti Dios.

Ti kapatgan a gameng ti maysa a pagilian, isu dagiti umilina. Kayatna a sawen, dagiti umili ti pagtaudan dagiti addang, pamuspusan iti pannakapatan-ay ti paggargarawanna. No awan, awan met ti turongen daytoy. No adda, ken makipaset iti komunidad, saan nga adayo a maragpat ti pagilian ti arapaapna a panagdur-as.

Ngem no kastoy a kasla awan aniamanna a mautang ti biag, pagturongan ngarud ti pagilian?

Kadagiti otoridad, napateg ti panangakemda kadagiti nayabaga kadakuada a pagrebbengan tapno masolusionan dagitoy a parikut.  Saan koma a puppet show laeng. No makita dagiti umili ti serioso a trabaho dagiti otoridad iti pannakatiliw dagiti nagbasol, ken pannakaparmek dagitoy nga aramid, saan nga adayo a rumtab kadakuada ti namnama.

Ngem iti kanito a mapaliiw nga aglabas lattan dagitoy a pasamak nga awan pagturturonganna, saanto a mapukaw dayta aligagaw iti barukong ti tunggal maysa.

Napateg ti pannakarikna ti kinatalged iti inaldaw a panagbiag. Masapul a daytoy ti pokus dagiti otoridad. Awan serserbi ti turongen a panagdur-as no kanigid-kanawan dagiti pammapatay.

Iparikna koma ngarud dagiti otoridad ti kaadda ti kinatalged, ti kappia, ken panagiinnayat.

Datayo nga ordinario nga umili, mabalin nga adda met dagiti banag no pakapungtotantayo no dadduma. Normal laeng dayta iti panagbiag.

Ngem ti napateg ditoy, ti adal a maarisittayo. Saan a dayta pailuyos iti rikna a mangibunga iti pagbabawyantayo.

Saantayo koman a mainayon a parikut ti gimong. Irugi ketdi iti bukod a bagi dagiti panagbalbaliw. Nasken a mangrugi kadatayo dagiti addang a mamagtalged iti panagbiagtayo—daytay awan ti pampanunotentayo a kabusor a manglib-at kadatayo.

Agtitipkeltayo a mangipamatmat, mangipakita, mangiparikna iti kinapateg ti tunggal biag.

Iti kasta, natalgedtayo latta iti inaldaw! #