Footer

BANNER NEWS: Senate President Sotto: Pannakaisanud ti 2019 Elections, kasapulan ti nainget a pannakaadalna

VIGAN CITY – Kasapulan ti nainget a pannakaadal ti singasing a pannakaisanud ti May 2019 National and Local Elections ta naipalaon iti Konstitusion ti pannakaangay ti panagpipili kalpasan iti tallo a tawen.

Dayta ti impasingked ni Senate President Vicente “Tito” Sotto III iti panagsaritana kas kangrunaan a bisita ken keynote speaker iti paggibusan ti lima nga aldaw a panangrambak iti Legislative Awareness Week ti 9th Sangguniang Panglalawigan ti Ilocos Sur nga idauluan ni Vice Governor Jeremias Singson.

Naangay ti pasken sadiay Vigan Convention Center, Vigan City idi bigat ti Hulio 13, 2018. Dimmar-ay iti pasken da Gov. Ryan Singson, dagiti opisial ken agserserbi iti Provincial Government ken kadagiti 32 nga ili ken dua a siudad iti Ilocos Sur. Nakikaysa pay dagiti dadduma a sangaili nga opisial ti gobierno manipud kadagiti sabali a siudad ken probinsia iti Pilipinas.

Iti panagsarita ni Sen. Sotto, inlawlawagna nga iti nabiit pay a panagtakemna kas Senate President ket nairana ti kaadu dagiti nadagsen a problema iti pagilian, ken ti saan a nabara a panaglangen ti Senado ken House of Representatives gapu iti isyu ti Charter Change wenno pannakasukat ti Konstitusion, ken pannakabaliw iti sistema ti gobierno iti federalismo.

Impasingkedna a saan a nalaka nga isanud wenno ikansela ti nakaiskediulen nga eleksion inton Mayo 2019 ta naipalaon dayta iti 1987 Constitution, ken saan a mabalin a paatiddogen ti panagakem dagiti agdama a nakatugaw a nabutosan nga opisial nga aggibusen ti terminoda.

“Madaling sabihin na i-postpone ang halalan para magkaroon ng panahon ang Kongreso sa Charter Change tungo sa federalismo, pero hindi ganuon kasimple ang proseso; dapat kong pag-aralan mabuti; kailangan kong pakinggan ang opinyon at saloobin ng mga kasama ko sa Senado, sa majority at sa minority, at dapat i-consider rin ang tinig ng taong bayan, kagaya ninyo na mamamayan ng Ilocos Sur,” kinuna ni Sotto iti panangilawlawagna ti pagtaktakderanna.

Inaklon ni Sotto nga awanen ti panawen ti Kongreso a mangtaming ti isyu ti Charter Change ken federalismo no matuloy ti eleksion ta mangrugin ti panagipila ti kandidatura inton Oktobre 2018. Impatalgedna ti panangadalda iti Senado ti umno nga aramidenda a makaipaay iti sapasapa a pagimbagan dagiti umili.

Ti reaksion ni Sotto ket sungbat iti singasing ni House Speaker Pantaleon Alvarez a pannakaisanud ti 2019 Midterm Election tapno maikkan ti naan-anay a panawen ti Kongreso a mangtaming ti pannakaamendar ti Konstitusion para ti panagsukat iti federalismo ti unitary system ti gobierno.

Kabayatan ti pasken, impaay ni Vice Gov. Singson ti State of the Legislative Address a nangireportanna kadagiti nagapuanan a resolusion ken ordinansa ti 9th Sangguniang Panglalawigan. Binigbigna ti naindaklan a nagapuanan dagiti amin a kakaduana iti Provincial Board iti pannakaputar dagiti ordinansa ken resolusion para ti sapasap a pagimbangan dagiti umili iti Ilocos Sur.

Inyawat pay ti Vice Governor ti report ti Provincial Board ken ni Gov. Singson. Impaayan pay ti SP ti pammadayaw ti gobernador, dagiti opisial ti PGIS ken dagiti amin a local government units iti Ilocos Sur. Naipaayan pay ti pammadayaw dagiti media partners ti SP a tumultulong iti pannakaiwaras dagiti damag nga ipapaay ti PGIS kadagiti umili. Mairaman kadagiti media institutions a napadayawan ket ti Timek Ti Amianan Newspaper ken Radio DZNS 963 Catholic Media Network.

Ti pasken ket alimpatok ti lima nga aldaw a pannakarambak ti Kakibin ti Balligi Legislative Week a naangay tapno mairakurak iti publiko ti kinapateg ti akem dagiti agar-aramid kadagiti lokal a linteg, ken tapno maparegta dagiti kameng ti Sangguniang Panglalawigan, Sangguniang Panglunsod ken Sangguniang Bayan nga agputar kadagiti ordinansa ken resolusion para ti pagsayaatan dagiti umili iti Ilocos Sur. (Eden Alviar)

, ,

Comments are closed.