Footer

Bagas ti SONA ti Presidente

ANIA dagiti pudno a nagapuanan iti makatawen ti administrasion ni Presidente Rodrigo Duterte, ken ania dagiti plano nga isayangkat ti gobierno iti masakbayan para ti sapasap a pagimbagan dagiti umili a Pilipino? Tratarenna ngata ti maipanggep ti illegal a droga, krimen, ekonomia, Charter Change, Federalismo, politika ken Simbaan Katolika?

Segseggaan a denggen dagiti Pilipino ti bugas ti mensahe ni Presidente Duterte iti panangipaayna ita a malem, Hulio 23, 2019, ti maikatlo nga State of the Nation Address iti joint session ti Senado ken House of Representatives.

Narigat man a pugtuan dagiti eksakto nga irakurak ti Presidente. Ngem kas impakitanan kadagiti dua a naglabas a SONA, manamnama nga ipanakkel ti Presidente dagiti adu a nagapuanan ti administrasionna mainaig kadagiti karina idi panawen ti kampania ken dagiti nairakurakna idi maikadua a SONA-na. Mapaspasangasan ti panangibandera ti Presidente ti gapuananna a mangparmek ti illegal a droga, kriminalidad ken kurapsion; ken panangipaduyakyakna iti nainsaknapan a pannakaisayangkat ti Build, Build, Build, Program ti gobierno a mangpadur-as ti imprastraktura. Matagtagiuray pay ti panangibinsabinsana kadagiti gannuat ken programa a mangpadur-as ti kasasaad dagiti umili ken ekonomia ti pagilian kas bunga dagiti adu nga opisial a panagbiahena kadagiti nagduduma a nasion.

Magudua la ketdi manen ti kapanunotan dagiti Pilipino iti panangawat iti linaon ti SONA ti Presidente. Adda dagiti mangibaga a nabagas ken iyanninawna ti pudno a kasasaad ti pagilian, ken iparangna dagiti naindaklan a panggep a mangsolbar kadagiti adu a problema a sangsanguen ita ti Pilipinas. Addanto met latta dagiti mangibilang a ti SONA ket ubbaw a nakaipalaonan dagiti mayarig kadagiti tagtagainep, am-ammangaw, dardarepdep ken batibat.

Saan man nga umanamong dagiti dadduma a kritiko ti Presidente, ngem saan a mailibak nga adu met dagiti pagimbagan a naaramidan ti agdama nga administrasion a sagsagrapen dagiti umili uray dagiti napanglaw, kas kadagiti panagbalin a lima a tawen a pannakaaramat ti lisensia nga agmaneho, ken ti 10 a tawen ti pasaporte kadagiti nataengan. Napadarasen ti serbisio dagiti ahensia ti gobierno. Napasayaat metten dagiti eropuerto ken napalawa dagiti kalsada ken rangtay. Nabangon pay dagiti adu a napateg nga imprastraktura. Adun dagiti naikkat nga opisial iti gobierno gapu iti kurapsion ken kinakapuy ti gapuananda, ngem adu pay dagiti nasken a dalusanna a mapagduduaan ti integridad ken kabaelanda. Napamodernon dagiti alikamen ti Armed Forces of the Philippines ken Philippine National Police, ken napangaton dagiti sueldo ken benepisioda.

Kalikaguman dagiti umili nga agwerrek latta koman ti mensahe ti Presidente kadagiti pudno a nasayaat a nagapuanan ti admininstrasionna. Ngem liklikanna koma nga ipanakkel a naindaklan a gapuanan ti pannakaparmek ti illegal a droga ta uray no adu dagiti natiliw a suspek, adu met dagiti napapatay ken naulila a pamilia.

Inkarina idi pay laeng panawen ti kampania a parmekenna ti illegal a droga iti las-ud ti tallo agingga iti innem a bulan. Nasuroken a 100,000 dagiti natiliw ken simmuko a drug personalities. Agarupen a 4,500 dagiti napapatay nga adda pannakainaigna iti illegal a droga. Nasuroken a duan a tawen ti administrasionna. Ngem agtultuloy pay laeng ti nainsaknapan a panagraira ti illegal a droga no ti pagbasaran ket ti kaadu dagiti matiltiliw a drug pushers. Para iti pagilian dagiti Kristiano, saan a maikanatad nga ipanakkel kas gapuanan ti adu a napapatay ken nadangran tapno agdur-as wenno agballigi ti kampania kontra illegal a droga.

Ipanakkel man ti Presidente a dumurdur-as ti ekonomia ti pagilian, saan la ketdi a marikna ken kanunongan dagiti adu nga umili nangruna dagiti napanglaw gapu ta mariknada ti dumagdagsen a kasasaad gapu ti ingangato ti presio dagiti kangrunaan a magatgatang a produkto ken serbisio gapu iti inflation rate wenno panagbaba ti balor ti piso, ken kas epekto ti nainayon a buis kas sagudayen ti Tax Reform for Acceleration and Inclusion Law.

Kayat a denggen dagiti umili no ania ti aramiden ti Presidente a mangted ti komportable a panagbiag dagiti adu nga umili, panagadu ti negosio ken trabaho, nayon a sueldo, ken ti pannakaigibus ti “endo” wenno “labor contractulization” kas inkarina idi kampania. Agpapan ita dakdakkel pay laeng a porsiento dagiti agbibiag iti kinapanglaw. Adu pay laeng dagiti awanan iti nasayaat a pagtrabahuan, ken agtultuloy pay laeng ti sistema ti contractualization.

Tarigagayan la ketdi a denggen dagiti umili ti panangirupir ti Presidente iti karbengan ti soberenidad ken panagtagikua ti Pilipinas kadagiti teritoriona iti West Philippine Sea a kinednganen ti International Tribunal a paset ti pagilian; ken ti panangisardengnan a panangidepdependerna iti China kas nasinged a gayyem ti Pilipnas gapu ti agtultuloy a panangsakupda kadagiti teritorio ti pagilian iti mapag-iinagawan a paset ti taaw.

Iliwen pay dagiti Pilipino a denggen ti panangikagumaan ti Presidente a magibusanen ti gubat iti nagbaetan dagiti tropa ti gobierno ken dagiti rebelde iti New People’s Army / Communist Party of the Philippines; ti pannakaigibusen riribuk sadiay Mindanao iti nagbaetan ti gobierno ken ti Moro Islamic Liberation Front ken Moro National Liberation Front; ken ti naan-anayen a pannakapaksiat ti terorismo nga iwaywayat ti Abu Sayyaf Group, Maute Group, Bangsamoro Islamic Freedom Fighters ken dadduma pay a terorista a grupo, tapno agarin ti naan-anay a kappia ti pagilian.

Ania man dagiti balikas nga agaon iti bibig ti Presidente, tartarigagayan dagiti umili nga awan koma dagiti narugit ken dakes a maisawangna a mangsugat iti kaunggan dagiti umili a makaigapu iti ad-adda a saan a panagkikinnaawatan ken pannakawarawara. Lisianna koma dagiti balikas a manginsulto iti uray ania a sektor kas kadagiti naibalikasna iti naglabas a panangatakar iti Simbaan Katolika ken Pammati dagiti Kristiano a kaaduan nga umili iti Pilipinas. Rebbengna a dagiti balikasna ket pagkaykaysaenna dagiti umili a makitimpuyog kenkuana tapno matungpal ti karina a mangipaay iti komportable ken natalged a panagbiag. (Eden Alviar)

Comments are closed.