Footer

Bangkay ti lalaki, nasarakan iti uneg ti lugan sadiay La Union

LA UNION – Adda nasarakan a bangkay ti maysa a lalaki a naisako iti uneg ti nakaparada a nangisit a Toyota Innova sadiay Sitio Quillo, Barangay Corro-oy, Santol, La Union idi 7:00 ti bigat, Hulyo 22, daytoy a tawen. Base iti press release ti Police Regional Office 1, nainaganan ti biktima a ni Reynard Mostoles, 23, residente ti Barangay Nagrebcan, Luna, La Union. Napaltogan ni Mostoles iti makinkannawan a pingpingna nga isu nakatayanna. Patien dagiti otoridad a napaltogan ti biktima iti sabali a lugar ngem ditoy Brgy Corro-oy a naibelleng. Dati a bodyguard ni Vice Mayor Jessie Ermitanyo ti Marcos, Ilocos Norte ni Mostoles.

Mangisaysayangkat iti road clearing operation dagiti Barangay Peacekeeping Action Teams (BPATs) ti Brgy Corro-oy iti dayta a bigat idi makitada ti nabaybay-an a lugan. Dimmawat dagitoy iti tulong iti kapolisan. Iti inspeksion dagiti nagresponde a polis nakitada ti agtedtedted a dara iti lugan. Nagsukimat dagiti polis ket nakitada iti likudan ti lugan ti bangkay a naisako.

Iti kanayunan nga inbestigasion, naammuan nga agnagan ti Cesar Tanguli Cabungcal, residente iti Tondo, Manila, ti akinkukua iti lugan.

Impaganetget ni Police Chief Superintendent Romulo E. Sapitula, Regional Director ti Police Regional Office 1, nga aramiden ti PNP ti amin a kabaelanda tapno maamuan ken maikulong ti makingapuanan ti pammapatay, iti kasta maikkan hustisia ti pamilia ti biktima. Nakikoordinaren ti La Union police kadagiti otoridad iti Manila para iti kanayonan nga inbestigasion.  (Tawid News Team)