Footer

Linteg panagusar iti motorcycle helmet maipatungpal manen iti siudad ti Vigan

VIGAN CITY – Kas kadagiti dadduma nga ili ken siudad iti Ilocos Sur, maipakaten ti Motorcycle Helmet Act of 2009 iti intero a Vigan City, mangrugi inton Agosto 1, 2018, tapno maliklikan ti pannakatay ken nakaro a pannakadangran dagiti nakamotorsiklo a maak-aksidente kadagiti kalsada.

Dayta ti maysa kadagiti kangrunaan nga inrakurak ni Vigan City Mayor Juan Carlo Medina kabayatan ti naangay a press conference iti City Hall idi Hulio 19, 2018.

Impakammo ni Mayor Medina ti nainget a pannakaipakat ti nailian a linteg iti intero a Vigan City gapu ti kaadu ti bilang dagiti matmatay ken nakaro a madangdangran kabayatan ti aksidente iti panagluganda iti motorsiklo. Nagballaag ti Mayor kadagiti amin nga agmotmotorsiklo iti uneg ti siudad ti panagusarda ti standard motorcycle helmet tapno saanda a mamulta kas sagudayen ti linteg. Impakammona pay nga addan deputation order dagiti polis ken traffic aide iti Vigan City a mangipatungpal iti linteg.

Naipalaon iti Republic Act No. 10054 wenno “An Act mandating all motorcycle riders to wear standard protective motorcycle helmet while driving and providing penalties therefor.”

Maibasar iti dayta a linteg, ti agmaneho ken agraman dagiti pasahero a nakalugan iti solo a motorsiklo ket nasken a nakaaruatda iti standard motorcycle helmet a mayataday iti specification nga intuyang ti Department of Trade and Industry, ken addaan iti selio wenno marka a “Product Standard” para kadagiti lokal a produkto, wenno “Import Commodity Clearance” para kadagiti imported a helmet, manipud iti Bureau of Product Standard.

Naipalaon pay iti linteg a dagiti agmaneho ken aglugan iti tricycle ket saanen a nasken nga agusarda iti helmet.

Nailanad pay iti R.A. No. 11054 a ti sino man a matiliwan nga aglabsing iti daytoy a linteg a nakalugan iti motorsiklo, asideg wenno adayo ti papananda a saan a nagusar iti standard protective motorcycle helmet ket madusa babaen ti panagmulta iti P1,500 para ti first offense; P3,000 para ti second offense; P5,000 para ti third offense; ken P10,000 ken pannakakompiskar ti driver’s license para ti fourth and succeeding offenses.

Maibasar iti information poster ti Vigan City Government mainaig iti Helmet Ordinansa a mangrugi a maipakat inton Agosto 1, 2018, dagiti matiliwan nga aglabsing ket mamulta iti P500 para ti first offense, P1,000 ti second offense, ken P1,500 para ti third offense.

Iti mainaig a damag, maipakpakaten ti National Helmet Act kadagiti dadduma pay nga ili ken siudad iti Ilocos Sur kalpasan ti panagseminar ken pannakaited ti deputation order kadagiti polis ken traffic enforcers mainaig iti pannakaipakat ti linteg ti trapiko.

Iti dayta met laeng a press conference, impakaammo ni Mayor Medina a nakagatangen ti City Government iti amphibious back hoe a maus-usar iti pannakakutkot ken pannakadalus dagiti karayan iti uneg ken aglawlaw iti Vigan City tapno maliklikan ti pannakalayus ti siudad.

Inrakurakna pay nga adda programa ti City Government a mangbukel iti grupo a pagpatulongan dagiti agtutubo nga addaan kadagiti problema tapno mapatibkerda ken maliklikan ti panagpakamatayda. Impalgakna pay ti programa ti City Government a mangtulong kadagiti agtutubo a maaddaan iti libre nga edukasion ken skills training.

Impakaammo pay ni Mayor Medina nga iti Vigan City ket adda 24 a positibo iti Human Immune-defficiency Virus a gapu ti sakit nga Acquired Immune Defficiency Syndrome, ken umad-adu pay ti bilang dagiti sexually transmitted deseases.

Impalgak pay ti Mayor a ti makaalarma a bilang dagiti HIV positive ken STD positive ket awan ti kompirmasion nga adda pannakainaigna iti panagadu dagiti turista iti siudad manipud pay idi naideklarar a World Heritage Site ken maysa kadagiti New Seven Wonder Cities of the World gapu ti kaadda dagiti nalimed a commercial sex workers iti siudad. Impasingkedna ti panangmandarna kadagiti polis a siputan ken tiliwenda dagiti mainanaig iti prostitusion tapno madalusan ti siudad iti daytoy nga illegal ken immoral a pagsapulan a maysa a gapu ti panagraira dagiti makaakar a sakit a maala iti pannakinaig.

Inyawis ti Mayor ti libre ken nalimed nga HIV testing kadagiti umili ken saan nga agindeg iti siudad tapno matakuatan dagiti addaan iti virus wenno sakit ket malisian ti panagraira ti STD. Impakaammo pay ti Mayor nga adda 54 a kaso ti teenage pregnancy iti Vigan City, wenno adda dagiti masikog wenno naganaken nga ikagkagumaan ti City Government a tulongan.

Impasingked pay ti Mayor ti pannakayalisto ti pannakaileppas dagiti construction projects iti sentro ti siudad a mataktak gapu ti matutudo a panawen ken panagkurang ti cobblestone a mausar kadagiti kalsada. Kiniddawna ti panaganus ken panagpasensia dagiti umili ken bisita iti siudad gapu iti problema ti trapiko ken saan a naannayas a panagdaliasat kadagiti maar-aramid ken matartarimaan a kalasada. Inyawisna ti pannakitinnulong ti media ken amin a sektor iti siudad tapno agbalin a natalged ken nagin-awa a pagnaedan ti Vigan City. (Eden Alviar, with reports from PIA)