Footer

Ania pay ti kayat a paneknekan ni Manny Pacquiao?

NAGSAYAAT a pabuya ken apagapaman a liwliwa dagiti Pilipino kabayatan ti nakaro a panagsagaba gapu iti rumigrigat a panagbiag ken nagduduma a problema ti pagilian.

Nagsardeng iti apagapam dagiti adu a Pilipino kadagiti inaldaw a trabaho ken pakakumikomanda ket nagkaykaysada a nagbuya iti laban ti “People’s Champ.” Nagragsak dagiti umili iti panangpatumba ni Senator Boxer Manny Pacquiao iti Argentino a boksingero a ni Lucas Matthysse kabayatan ti panaglabanda sadiay Kuala Lumpur, Malaysia.

Pinarmek ni Pacquiao ni Matthysse kalpasan iti dua minutos ken 43 a segundo iti maikapito a rikus babaen ti technical knockout kalpasan a namitlo a daras napatugaw ti Argentino a boksingero.

Iti panangabak ni Pacquiao, inagawna ti championship belt iti World Boxing Association Welterweight Division. Naabak man ni Matthysse, nakayawid met iti $2 Million a tangdaanna. Kadakkelan daytan a kantidad a tangdanna iti unos ti panagboksingna.

Nagballigi ni Pacquiao kalpasan dagiti nagsasaruno a pannakaabakna kadagiti boksingero a nakalabanna agraman ni Floyd Mayweather Jr. ken Jeff Horn. Saan a naipadamag no mano ti kinita ni Pacquiao iti naudi a pannakilabanna ta kukuana met laeng ti MP Promotions a nangmanehar ti labanna. Amin a ganansia iti napastrek iti tiket, pannakaipabuya ti laban ken advertisement ket naala ti kompaniana.

Iti panangabak manen ni Pacquiao, nagdir-i dagiti adu a Pilipino a fans-na iti balligi a nagun-odna. Babaen iti dayaw a nagun-odna iti panangparmekna ti kinasalisalna ket maibilang a bagbagkatennan ti bandera ti Pilipinas, ket ti pammadayaw a magun-odna, dayaw metten ti pagilian. Iti panagawidna iti Pilipinas, sinarabo dagiti adu a fans-na ket ibilangda a kas bannuar.  Ngem ania kadi ti pudno a kaipapanan ti maysa a bannuar?

Nagapit ti adu a kablaaw ken pammadayaw ni Pacquiao iti panangabakna. Dinawdayaw ni Presidente Rodrigo Duterte, ken dagiti kakaduana a senador iti balligina. Ngem saan kadi koma a kas senador ket ipamaysa ni Pacquiao nga ibaklay ti responsibilidad a sinapataanna kas opisial ti gobierno? Uray naka-recess ti Senado a ginundawayan ni Pacquiao ti dua a bulan a panagsanayna tapno makapagsagana a nasayaat iti dayta a laban. Ngem adda kadi napaut a bakasion ti opisial ti gobierno iti sango dagiti adu a problema dagiti Pilipino?

Naidumduma ti kaudian a pannakilaban ni Pacquiao ta mismo a personal a nagbuya da Presidente Duterte ken Malaysian Prime Minister Mahathir Mohamad. Mairaman pay a nagbuya da Senate President Vicente Sotto III, Foreign Affairs Secretary Allan Cayetano, Bucor Chief Ronald de la Rosa ken dadduma pay a nangato nga opisial ti nasional ken lokal a gobierno.  Nagbuya dagiti opisial sadiay Malaysia iti sango ti panagrigrigat dagiti napanawan a kailianda.

Kas kadagiti nagkaunan a laban ni Pacquiao, nagkaykaysa dagiti Pilipino a nangbuya kadagiti pagtaenganda ken kadagiti pangpubliko a lugar. Iti pannaka–televised ti laban, dakkel la ketdi ti kinita ti MP Promotions kadagiti nangipabuya iti cable television iti lubong ken dagiti major networks iti Pilipinas gapu kadagiti aglaplapusanan nga anunsio. Dakkel ngarud ti napastrek ni Pacquiao iti dayta a labanna.

Maysa ni Pacquiao kadagiti kagasatan iti lubong. Manipud iti nakapuotanna a kinarigat ti panagbiagna sadiay General Santos City, saan a nakangato ti adalna agingga a dimmur-as a namimpinsan ti panagbiagna gapu iti laing ken panaglatakna iti boksing.

Mabigbig ni Pacquiao iti sangalubongan iti panagkampeonna iti walo a division iti nadumaduma a boxing organizations. Iti kaudian a labanna ket maika-12 a world title-na. Naballigi met iti benneg ti politika ta uray naabak idi damona ti kandidato a kongresista sadiay General Santos City a lugarna, immakar sadiay Sarangani a probinsia ni Jinkee Pacquiao nga asawana a nangabakanna kas Congressman. Nangabak pay a senador ken nagbalin met a bise gobernador ti asawana iti probinsiada.

Iti panaglatakna iti lubong ti boksing, naikappeng pay iti Reserve Force ti Philippine Army manipud Master Sergeant a rangkona, naital-o a Lieutenant Colonel kalpasan a nakaturpos ti kurso iti kolehio babaen ti special program. Malaksid kadagiti pakakumikomanna, maysa pay a playing coach ken manager iti team iti Philippine Basketball Association. Nagparangen nga artista iti pelikula ken telebision. Recording artist pay iti panagkanta.

Manipud iti sigud a kinarelihiosona kas Katoliko ta idi nabiit pay a naglatak iti boksing ket tunggal makilaban ket agugis ken no mangabak ket umuli iti suli ti ring nga itagtag-ayna ti rosariona, ken mapan latta agyaman iti simbaan sadiay Quiapo, ngem itan ket maysan a pastor iti Born Again Christian.

Saan a maliklikan ti panangdillaw dagiti kritiko ni Pacquiao a kabayatan ti panangipadpadayawna iti Dios ket agtultuloy met ti pannakidangadangna iti ay-ayam a mangdangran iti padana a tao. Saan a mailaksid a ti boxing ket contact sports a tunggal umaayam ket ikagumaanna a dangran wenno pasakitan ti kasalisalna.

Iti panangabak ni Pacquiao iti tawenna a 39, adu dagiti mangibagbaga a panawenen tapno agretiro iti boksing ket uray ket billionarion ken saannan a magastos iti panagbiagna ti urnongna. Naisaganaanna metten ti pamiliana iti umdas a kinabaknang. Panawenen nga ipamaysana ti trabahona kas public servant.

Kalpasan ti panangabakna, impalgak ni Pacquia a dua wenno tallo pay a laban ti mabalin a sanguenna sakbay nga agretiro. No matuloy dagita a laban, dakkel la ketdi a kuarta ti akupenanna, mangabak man wenno maabak.

Nagun-oden ni Pacquiao ti alimpatok ti balligi iti benneg ti boxing, politika, negosio ken kasasaad ti biag. Manipud iti biag a kinanumo, adda aminen kenkuana – dayaw, kinabaknang ken turay. Ania pay ti tarigagayanna? Kayatna a paneknekan iti bagina nga awan ti pannakapnek ti tao? #

Comments are closed.