Footer

Lilang Miling

“LILANG, makseten ‘ta lutlutuenyo!” kinunak ken ni Lilang Miling. Makumikom a mangdumdumog iti selponna iti kabisera ti lamisaan a pangpangananmi. Tinakderak ti buybuyaek iti telebision ta adda naangotko nga agat-nakset.

“Ket iddepemon, a, apok!” kinunana ngem dinak pay kinita. “Ammom met nga iddepen dayta gasul!”

Nakudkodko laengen ti ulok. Saan manen a matakderan ni lilang ti panagay-ayamna iti Mobile Legends. Atiwna pay dagiti kas kaniak nga agtutubo.

Pitopulon ni Lilang Miling. Ngem naparagsit latta nga agkutikuti iti uneg ti balay. Segun ken ni tatang, duak la idi natay daydi Apong Pinong nga asawana. Addaakon iti Grade 12 kadaytoy a panagseserrek ti klase.

Napudaw ni Lilang Miling; medio agkakaingasda kadaydi Lilia Cuntapay nga artista a limmatak kadagiti horror movies. Puraw aminen a buokna

Idi, pulos a di kayat ni lilang ti maaddaan iti selpon. Adu la amin, kinunkunana. “No adda masapul wenno ibagak iti padak a tao, di mapanak kenkuana!” rasonna.

Ngem nayat met laeng a naaddaan idi kanayon a mabati iti balay. Mapanak iti eskuela ket malemton no agawidak. Agbalbalonak iti pangngaldawko. Da nanang ken tatang, malemto metten no makaawidda nga aggapu iti munisipio a pagtrabahuanda a dua.

“Naimbag laeng a pangtawagko kadakayo no adda nasken nga ibagak,” kinunana kada nanang ken tatang.

Idi damo, kasla ubing nga agsursuro ni Lilang Miling nga agteks ken agtawag. Siak ti tuparenna no kasta nga aggapuak iti eskuela.

No saan, iti la kaarruba a yanna. Agpaisuro kadagiti gagayyemna a padana a nataengan. Nupay sulinek a bario ‘toy ayanmi, saan metten a “just-just” ti selpon ti kaaduanna nga agindeg. Touch screen ti kaaduannan ta adu metten saglalaka a brand.

Idi kuan, addan grupo da Lilang Miling a buklen ti lima a padana a nataengan. Agsasarakda iti sirok ti mangga da Anti Imelda. Adda lamisaan ken saggagaysada a tugaw. Saanda nga agkikinnuto wenno agpipinggit iti baraha. Makumikomda iti nga ag-Mobile Legends.

Makais-isemak idi damo iti idiarda no kasta a malabsak ida iti panaggapuk iti pagadalan. Kasla saanda nga agaammo nupay agaabayda laeng:  nakatutok laeng dagiti matada iti selpon idinto nga adda nakakayang, nakadekuatro, ken nakatangad a mangipaspasir iti screen ti selponna. Nga inton kuan, agkikinnatawada. Ken agpipinnaggaakda.

Kinunkunak iti bagik, nasayaat met dayta a nasumok ni Lilang Miling tapno mailiwliwagna ti kinaagmaymaysana iti balay no kasta a makalikudkami a kabbalayna.

Ngem sabalin idi agbayag. Saanen a maaramid ni Lilang ti aginaldaw a nakairuamanna: agluto, agsagadsagad saggabassit a pagwatwatanna, ken aginnaw. Nakawaranto pay laeng ti lunglongan iti malem a sangpetanmi.

Binagbagaan ni nanang ni Lilang Miling iti maysa a malem.

“Uray, a, ta yinnawko met laeng iti malem kabayatan ti panangisaangko,” kinuna ni Lilang Miling.

“Wen, a, ‘nang, ngem kababain no adda um-umay a bisita,” inkalintegan ni nanang. “Ney, saanda man laeng a mainnawan ti nangananda, kunadan, a!”

“Maan-ano nga agsaoda! Saantayo met nga al-alaen kadakuada ti pagbibiagtayo!”

“Nanang…”

“Ay, dinak isuro ta ammok ti ar-aramidek, sika Sofia!” impugtit ni lilang. “Maileppasko met dagiti trabahok ditoy uneg ti balay.”

Mobile Legends Girl of Pammobo wenno MLGP ti awag ti grupo da Lilang Miling. Ni apong ti pannakaliderda.

Gapu itoy nga aramid da apong, pinanaganan ti purok iti Apong Milingnials. Wenno baket a feeling millennial baby.

Ngem kaykayatanna ketdin. Napintas kano a denggen!

Ni Miya ti paborito ni apong a karakter iti Mobile Legends. Magustuanna kano ti kinasiglat dayta a Miya.

Isemak wenno paggaakak la koma ni Lilang Milingnials kadayta a kunkunana ngem baka masipatnak.

“Bay-amon ni lilangmo,” kinuna da nanang ken tatang kaniak idi agangay.

“Nakababain sa nanang,” kinunak. “Aguubing! No siakto pay ket diak pagesman dagita ay-ayam iti selpon.”

“Pagpalabsanna ti oras, balong, isu a baybay-antay’ lattan.”

“Maksetan payen dagiti lutuenna gapu iti kaaayamna.”

“Sagpaminsan laeng met,” inyisem laeng ni nanang.

Ni met Lilang Milingnials ti insarunok idi a kinasarita.

“Saanyo unay ta agay-ayam iti selpon, lilang,” kinunak. Sabado daydi nga awan klasemi.

“Dinak man nga isuro nga ubing,” impugtitna ketdi. “Awan met dakesna daytoy ar-aramidek wenno ar-aramidenmi nga agkakadua.”

“Diyo alasen ta idiaryo, lilang, no kasta nga addakayo iti sirok ti mangga da Anti Melda?”

“Ay, lokoka nga ubing! Apay koma nga alasenmi ket bonding time-mi dayta a makuna? Mapatan-ay ti panaggagayyemmi. Makasarakkami pay iti gagayyemmi iti makunkuna a birtual a lubong.”

“Wen, a, ngem…”

“Agtalnaka dita, Anton! Dika ik-ikkan iti pensionko… makitam!” Ti bassit nga aw-awatenna iti SSS ti kayatna a sawen. Dinak a malipatan a papetpetan no kua.

“Lilang, kasanon no makaalakay’ iti sakityo kadayta kaaay-ayamyo?” insintirko latta.

“Ania koma a sakit ti lawlawatem?”

“Kissiw. Wenno panagpipikel dagita ramramay wenno tengngedyo? No saan, madadael dagita matayo? Kakaisuna a makabasakayo pay laeng iti laksid dayta edadyo.”

“Nagkuna dayta?”

“Mabuybuyak iti telebision!”

“Kunada la dayta ta awan ti maipadamag dagita nga anaunser!”

Isu a manipud idin, kas kada nanang ken tatang, saankon a tinubtubngar ni Lilang Miling. Uray idi nadamagmi kada nanang ken tatang nga agpipinnustada payen. Sugal ti pamay-andan.

PANAGAAWID iti malem ti Biernes. Kas naipakadawyan no kastoy nga aldaw, dinagasdak da nanang ken tatang iti eskuelami. Nagkukuyogkami a nagawid. Alas singko median idi agpa-Pammobo-kami ta nakitiendakami pay iti usarenmi iti uneg ti balay.

Nasangpetanmi dagiti kaarrubami iti paraanganmi. Nagtibbayoak. Nalagipko ni Lilang Miling. Addan sa metten napasamakna?

“Ania ti napasamak ditoy?” maar-arakattot ni nanang a nagdamag nga awan ti masnop a pakaiturongan ti saludsodna.

“Ngannganikayo napuoran, basang,” kinuna ni Lilong Sabas a kapidua kano daydi lilong.

“Ta apay, angkel?”

“Pakawanendak, nakkong,” ni Lilang Miling ti simmungbat nga isu gayam ti linawlawda a nakatugaw iti monobloc iti paraangan. Paypaypayanda.

“Nanang?”

“Nagipudotak iti sangatasa a danum a pagkapek. Inayabandak dagiti kakaduak ta agay-ayamkami MLGP. Kalpasan la ti maysa nga oras, umap-apuy metten ti kapeteria.”

“Gapu iti Mobile Legends, kasta, nanang?” idi la a makitak a kimmusilap ni nanang.

“Wen, nakkong,” napadumog ni lilang. “Naimbag ta alisto dagiti kaarruba a timmulong, nasayaat ta off-duty ni Michael a kameng ti Bureau of Fire Protection a nagtured a napan nangiddep diay gasul, ta no saan…” dina intuloyen ta nangapput lattan.

Napangilangil laengen da nanang ken tatang. Naimbag la ketdin ta iti kano laeng kosina ti dinilpatan ti apuy a dagus a nasebseban iti tulong dagiti kaarrubami. Awan ti ania man a napuoran. Ngem isutsutil dagiti sidingan ti dilana, a nakset kano ti impapudot a danum ni lilang isu a dandani dimmapo ti kusinami.

“Ikarik, saanakon nga agay-ayam iti selpon,” imbaningrot latta ni Lilang Miling. “Alaemon, Anton, ‘toy selponko…” ket inselselna lattan iti bulsa ti unipormek a polo.

Apagbingngi nga isem ti nataldiapak kada nanang ken tatang. #

Comments are closed.