Footer

SINURSURAN: Nasalun-at nga organisasion

NARAGSAKAN idi nakastreken iti trabaho. Saan laeng a basta panggedan. Makuna a natalged. Nakananama. Ken sigurado a mangipaay iti nalukay nga aangsan ti binangonna a pagtaengan.

Idi, kitkitaennan no kasano ti panangisakadna iti pamiliana. No di la ketdi adda dakkel a tubeng, saan ng adayo a maibanagna iti naimbag a masakbayan dagiti annakda.

Napalalo a yamanna ta iti sumagmamano laeng nga aldawna iti trabaho, nariknanan ti pannakaibilangna a kas kadua, kabadang, ken saan a sabsabali kadagiti nadanonna.

Kasda laeng agkakabsat. Awan ti aglilinnimed, awan agpipinnasagid, awan ti agpipinniltak iti pitak.

No adda maangay a taripnong iti pagtrabahuanda, mariknana ti kinamaymaysada a mangisayangkat itoy iti nagan ti panagkakadua. Ken iti awag ti akem kas adipen ti tisa.

Iti tunggal aramid, awan ti pinnatudon. Akmen ti tunggal maysa ti obligasionna. No makita ti mairana a nawaya ti orasna, tulongan daytoy. Siuukrad ti dakulapda.

Saan ngarud a karkardayo iti grupoda ti ragsak ti panagtrabaho. Agbibinnagada kadagiti parikut; dagiti banag a nasagangda kadagiti adalanda a mabalin a pagsarmingan ti sabali; ken saan a maalumiim ti tunggal maysa a mangibaga ti adda a kapanunotanna kadagiti banag a masapul daytoy.

Adda ngamin dayta pana(n)grespeto, pana(n)gdayaw iti ideya ti tunggal maysa kadakuada. Agkakabsatda ngarud no ar-arigen. Aglalo ket manmanoda laeng. Sangapulo ket maysa pakairamanan ti kangatuan kadakuada.

Nadlawna pay nga awan ti nangato ti patayok ti isbona kadagiti nadanonna. Pudno a panagkakadua ti nariknana.

Mabain ti tunggal maysa a mangipasindayag ti adda kenkuana.

Ngem pudnon sa ‘tay nabasana iti social media ken maus-usar kadagiti teleserye: walang forever.

Iti panaglabas dagiti tawen, dumteng-pumanaw dagiti nagbalin a kakaduada. Ken gapu iti K-to-12, immaduda iti grupo/organisasion.

Nagbaliw ti aglawlaw. Nagrikki daydi nadanonanna a panagkakaduada. Gapu iti social media, rikna a di magawidan, ken pakaseknan ti bukod a pamilia, in-inut a nagadda dagiti anay iti grupoda. In-inut a rimmabanga dagiti pagteng a saan koma a rumbeng a pangrugian ti apuy a manggungtob kadakuada.

Taoda laeng, nupay makuna a rumbeng koma a modeloda kadagiti ubbing, saan a mailaksid kadagiti pagrukopan ti kinatao. Nupay natinggaw latta iti isipda ti akemda kas adipen ti tisa, saan a maliklikan no maminsan ti pannakasayyasayya.

Nariknana, marikriknana a nabingaybingayda itan. Addan bukod a lubong ti tunggal maysa. Rimtab dagiti negatibo nga aw-awid.

Ala, wen, adda pay laeng dayta panagsasarita, panagiinnisem no kasta nga agsasabat ken no nakaimatang ti ngatuenda.

Ngem bin-ig a pammarang. Kinaplastik!

Malagipna la ngarud idi ti sangkakunana no kasta a damagenda no apay a di agpayakar iti mismo nga ilina: Napipia sadiay yanko ta agaammokami. Awan ti agpipinnerdi. Napintas ti panagkakaduami.

Nadamdamagna ngaminen iti ilida, iti alma mater-na, iti kaadu dagiti adipen ti tisa, arigna dida agaammo. Adda grupo ti tunggal maysa. Agpapada ti major, agkakadua. By department.

Ti makadakes, agdidinnillawda iti nalimed. Tsismis, kanigid-kanawan. Makalkal amin a kabassitan a kinatao.

Maysa pay, addada dagiti natayok ti isbona. Dida mangipirpirit iti kapanunotan dagiti ipatoda a nababbaba ngem isuda. Isuda ti kalaingan. Nalaingda pay a mangpabain.

Dagita ti saanna a pagayatan a mai-homebase.

Ngem arigna kasta met itan ti mapaspasamak iti organisasionda. Umad-aduda, rumikrikut ti aglawlaw. Saanen nga agkakatunosan dagiti kapanunotan. Rumtaben ti pudpudno nga ugali a kupikop ti maysanmaysa.

Saanen a nasalun-at ti organisasionda!

Pagaammona, dakkel ti epekto daytoy kadagiti ubbing a naitalek kadakuada.

Kasano pay nga agbalin a produktiboda ita?  Pagturongan ti edukasion dagiti adalanda?

No ut-utobenna, bassit laeng a banag ti nagtaudan ti susik dagiti kakaduana. No koma laeng adda dayta panangpakawan iti nagbasol, saan nga adayo a maisubli ti langenlangenda— ti inlaslastogna a langenlangenda.

Malagipna man a ti panagtitipkel dagiti kameng ti maysa nga organisasion, daytoy ti pannakatulbek ti panagballigina.

Iti organisasionda, dayta panagbalin dagiti adalanda iti masakbayan ti makuna a balligida. Bassit man ti katukad dagiti adu nga akemda, saan ketdi a mabaybayadan ti ragsakda no madamagda ti panagballigi iti biag ti nagbalin nga adalanda.

Ngem kasano pay ita ti panagtitipkelda no adda dayta giwang, rikki iti nagbabaetanda?

Iti maysa a panagadal, 20 porsiento kano a nabungbunga ti aramid ti mangmangged a mangipamaysa iti aramidna. Wenno kunaentayo a committed. Ken 87 porsiento a di agikkat iti agdama a trabahona. Ngamin, adda dayta ragsak a marikriknana. Maparegta nga agpanunot iti pagsayaatan ti organisasionda agraman dagiti klienteda.

No maikkat dayta “commitment” iti barukongda, kasano dagiti adalan a klienteda?

Ti panangikumit a namnaminsan ti bagi iti trabaho, agsadag kano iti relasion kadagiti kabaddungalan iti trabaho. Ti naannayas a relasion ti tunggal maysa, kayatna a sawen a nabakbaked, napudpudno, nangatngato ti maparnuay a panangikumit iti bagi nga agtrabaho. A kas nakunan, agbanag a nabungbunga ti serbisio/aramid a maipaay kadagiti mangnamnama a kliente.

Dayta la unay ti kayatna koma. Saan a maaklon ti riknana a maisakripisio ti akemda kadagiti adalan gapu laeng kadagiti susik iti naglabas, wenno iti kinangato ti purua dagiti dadduma.

No kasano a mabukel dayta naannayas a relasion iti maysa nga organisasion, adda kadakuada idi daytan. Laeng, lepleplepan ti pride ti rikna ti tunggal maysa ita.

Pokus. Kasapulan la unay iti maysa nga organisasion. Itundana iti panagballigi daytoy.

Ngem di kad’ idi ket nakatalimudok ti imatangda iti panagbalin ti tunggal adalan a naikumit kadakuada? Sipsiputanda ti tunggal garaw dagitoy, no kasano ti panangagsepda iti mayal-allatiw kadakuada nga adal, ken panangiparikna kadagitoy a kamengda iti organisasion. A napategda iti pannakapataray ti organisasion.

Agbalin a napudno kadagiti ibagbaga. Nariknana idi dayta. Awan panaginkukuna dagiti nadanonna. Agsasao, agpapatangda idi a kasla agkakabsat, awan ti agilimlimed; napudnoda kadagiti ibagbagada. Iti kasta, marikna ti kinamaymaysa. Ti kinnayammet.

Panagtitinnulong. Maysa pay idi dayta a nadlawan ken nariknana. Iti panagbibinnadangda, adu dagiti patangan a naparnuay nga ad-adda a nangpasingked iti panagkakaduada. A kaaduanna, para kadagiti pagimbagan dagiti adalanda.

Naglag-an ti riknana idi. Awanen ti sapulenna pay iti trabahona.

Panagtalek. Maysa pay a napateg a ramen iti naannayas a taray ti maysa nga organisasion. Kas iti panagtitinnulong, nariknana met idi daytoy iti organisasionda. Adda panagtitinnalek, panangrespeto iti kapanunotan ti tunggal maysa. Awan ti mailidlid-i ti ideyana. Silulukat ti tunggal maysa a mangawat itoy.

Isu ngarud a dagiti personal a kabibiagda idi ket naibinglayda iti tunggal maysa. Nangnamnama nga isudanto laeng ti makaammo, makapagiinnadal kadagitoy a pagteng para met laeng iti panagdur-asda kas mannursuro.

Ngem iti mapaspasamak ita iti organisasionda, awan ti idawdawatna no dinto ti pannakakalbit ti puso ken isip ti tunggal maysa a masapul a nasalun-at ti organisasion a paggargarawanda. Awan ti kas iti napudnoda iti maysanmaysa ken adda kappia iti kaunggan.

Awan ngatan ti kararagsakan pay a paset ti panagtrabahona no di dayta mariknana nga adda ayat nga agar-ari iti nagbabaetanda— iti nagan dagiti ubbing a binbinorenda.

Ta ti nasalun-at nga organisasion, agtaud kadagiti kamengna. #

Comments are closed.