Footer

BANNER NEWS: Pautang a pangtulong kadagiti mannalon, ipaay ti DA

CAOAYAN, Ilocos Sur – Adda naan-anay a pondo manipud iti Department of Agriculture a maipautang kadagiti mannalon iti Ilocos Sur nangruna kadagiti agmula iti bawang a maipaay kadagiti kualipikado a miembro ti kooperatiba.

Dayta ti maysa kadagiti kangrunaan nga inrakurak ni Ms. Divina Quemi, Chief Executive Officer ti Nueva Segovia Consurtium of Cooperatives kadagiti kameng ti Ilocos Sur Integrated Press kabayatan ti pannakiumanda kenkuana iti naangay a Kapihan iti Amianan Media Forum.

Pinatalgedan ni Ms. Quemi ti kaadda ti dakkel a pondo manipud iti DA a naitalek iti NSCC a maipautang kadagiti mannalon iti nalaglag-an nga interes kas tulong kadagiti agpapaay iti agrikultura a sektor. Impalgakna a dagiti mannalon ket mabalinda ti agdamag kadagiti kaasitgan a branch ti NSCC iti Ilocos Sur a masarakan iti Vigan City, Caoayan, Santa Maria ken Cervantes, ken kadagiti dadduma pay a probinsia, tapno maammuanda ti naan-anay nga impormasion iti proseso ti pannakaipaay iti loan. Impakaunana a dagiti umutang a mannalon ket nasken nga adaptaren ken tungpalenda met dagiti katulagan ken wagas ti panagtalon tapno manamnama ti nasayaat a panagapitda.

Pinagyamanan pay ni Ms. Quemi dagiti dua a diputado ti Ilocos Sur da 1st District Rep. Deogracias Victor Savellano, ken 2nd District Rep. Eric Singson, ken Gov. Ryan Singson, iti agtultuloy a suportada iti kooperatiba, ken panangtulongda kadagiti mannalon ken dadduma pay a sektor tapno mapadur-as ti biag dagiti umili iti probinsia.

Kinanunonganna ti nairakurak iti Department of Agriculture Congress a kaadda ti pakauna a P20 Million a maipautang kadagiti mannalon nga agmulmula iti bawang tapno maparegta daytoy matmatayen nga industria ti bawang iti Ilocos Sur. Inawisna dagiti mannalon nga agkurang iti puonan ti pananggun-odda daytoy a pautang kas tulong ti DA kadakuada.

Impakaammo ni Ms. Quemi a dumanonen iti P3.8 Billion ti kadagupan a pondo ti NSCC, maysa kadagiti kabaknanganen iti Pilipinas. Impanakkelna ti panagdur-as ti kooperatiba nga addaanen iti 16 a sanga iti nagduduma a probinsia ken rehion, ken dadduma pay a business ventures a makatulong kadagiti mannalon ken napanglaw a mangpadur-as ti panagbiagda.

Impalagipna a nangrugi laeng iti P13,500 a puonan ti kooperatiba manipud idi nabuangay idi 1992 babaen ti panangilungalong idi ti agdama nga Arsobispo ti Nueva Segovia, Cardinal Orlando Quevedo. Sinalaysayna a manipud iti nailet nga opisinada sadiay Caritas Nueva Segovia, ken iti tallo nga staff ket nagsaknapen iti nagduduma a probinsia iti Luzon ken addaanen iti nasurok a 200 a personnel. Impeksana ti panagyamanna iti Dios, ken kadagiti amin a miembro iti kooperatiba iti agtultuloy a talek ken suportada.

Impakaammona pay ti saan a pannakaituloy ti pannakairaman nga agbuis dagiti kooperatiba gapu ti panangirupirda sadiay Kongreso ken panangsuporta kadakuada dagiti adu a kongresista. Impalgakna pay a napili isuna a number one nominee iti Luzon ti COOP – NATCO party list representative para iti House of Representatives. (Eden Alviar)