Footer

Trabahador napaltogan sadiay Bantay, Ilocos Sur

BANTAY, Ilocos Sur – Maysa a trabahador ti napaltogan bayat iti panagawidna a napan gimmatang iti pangrabii ti pamiliana idi 8:05 ti rabii, Hulyo 31, 2018, iti mismo a national highway ti Bulag East, Bantay, Ilocos Sur.

Nabigbig ti biktima a ni Joseph Nabata y Nocos, 35, naasawaan, tubo iti Camalig, Albay ken agnanaed iti Naguidayan, Bantay, Ilocos Sur.

Segun iti inisial nga inbestigasion, limmugan ti biktima iti motorsiklo tapno gumatang iti pangrabii iti maysa a restoran ngem idi agawiden daytoy, pinaltogan ti di pay nabigbig a suspek iti namin-adu a daras.

Intaray dagiti nagresponde a polis ti biktima sadiay Metro Vigan Cooperative Hospital ngem natayen daytoy a dimmanon iti nasao a pagagasan.

Saan pay nga ammo no asino dagiti suspek ken no ania ti motibo ti pammaltog ken no anya a paltog ti nausar. (Tawid News Magazine)