Footer

Internal cleansing iti PNP

ANIA ti gapu nga adda pay laeng dagiti polis nga agar-aramid iti maikontra iti linteg tapno makadelisensiada iti kuarta uray no naipangaton iti dakkel dagiti sueldoda? Dayta ti saludsod dagiti adu nga umili kabayatan ti panagsasaruno a reklamo ken pannakatiliw dagiti polis a nainaig kadagiti illegal nga aktibidad kas ti hulidap, kidnap for ransom, robbery, extortion ken dadduma pay a krimen.

Napalaus ti rurod ni PNP Chief Director General Oscar Albayalde ken National Capital Region Police Office Director Chief Supt. Guillermo Eleazar iti panangkomprontada kada PO2 Joey Maru, PO1 Bryan Amir Bajoof ken PO1 Paolo Ocampo kalpasan a natiliw ida dagiti padada a polis, kalpasan a napatay iti shoot out ni PO1 Gererdo Ancheta, maikapat a kaduada iti krimen. Napasamak ti insidente ti kidnap-extortion ken entrapment operation kadagiti uppat a polis idi parbangon ti Hulio 31, 2018 sadiay Taguig City kalpasan ti panangserrekda iti maysa a balay a nagsamsamanda iti kuarta ken alikamen, ken panangtiliwda iti agnobia ken panangkikilda kadakuada iti kuarta. Napilaanen iti kaso dagiti tallo a polis, ken narelibuan metten dagiti 39 pay a nakadestino iti Precint 1.

Iti sumaruno a rabii ti Agosto 1, 2018, tiniliw met dagiti operatiba ti PNP Counter Intelligence Task Force dagiti tallo a polis sadiay Valenzuela City gapu iti reklamo ti extortion kadagiti junk shops. Naaresto sadiay Brgy. Ugong da SPO4 Serafin Adante, PO1 Rey Harvey Florano, PO1 Ryan Paul Antimaro ti Precinct 8, ken Amado Baldon Jr. Naaresto dagiti tallo a polis ken ti kaduada a sibilian kalpasan nga inawatda ti marked money a P200 manipud iti empleado ti maysa a junk shop. Naisayangkat ti operasion gapu iti reklamo a dagiti polis ket regular nga agkolkolektada iti P200 – P500 kadagiti agtagikua kadagiti junk shops.

Dagiti nagsaruno a dua nga insidente a nakainaigan dagiti police scalawags ket sumagmamano laeng kadagiti adun a pasamak a mangdaddadael ti imahe ti sibubukel a PNP uray no ad-adu nga amang ti bilang dagiti napudno iti serbisioda. Dagitoy a pasamak ket pataudenna ti panagbaba ti panagtalek dagiti umili kadagiti dadduma a polis. Ngem laglagipen koma dagiti umili a dagiti polis a napudno iti serbisio ti nangtiliw met laeng kadagiti padada a polis a rinuker ti aramidda.

Kinuna ni Albayalde a nakaladladingit dagitoy a pasamak nga iti laksid ti pannakaingaton ti sueldo, pannakaited kadagiti nayon a benepisio, ken suporta ti gobierno kadagiti polis ket adu latta dagiti rinuker. Impakammona pay a saan nga agsarday ti pannakadalus ti PNP kadagiti rinuker a polis tapno magun-odda ti naan-anay a talek dagiti umili. Impalgakna nga adda listaan dagiti sipsiputanda ngem mabalin nga adda pay dagiti polis a saan a nairaman.

Nagkas-ang ti agtultuloy a pannakainanaig kadagiti illegal nga aktibidad dagiti polis nangruna kadagiti nabiit pay iti serbisio ta isuda ket nakawesan ti autoridad nga agimet iti paltog ken mangipatungpal iti linteg. Ipaypayduma pay ida ti agdama nga administrasion a suelduan iti nangato ken ikkan iti nayon a benepisio, ngem agtultuloy met ti panagbaban ti disiplinada ken panagaramidda iti illegal.

Susuelduan ken ar-armasan ti gobierno dagiti polis tapno serbian ken salaknibanda dagiti umili, ken tapno ipakatda ti linteg ngem isuda met ti mangbikbiktima kadagiti sibilian, ken isuda pay ti agisaysayangkat kadagiti krimen. Ania ti nasamay nga aramiden ti liderato ti PNP tapno madalusan ti institusion kadagiti rinuker a polis? Tunggal agsukat ti PNP Chief, maibanbando ti nainget a pannakaipakat ti disiplina kadagiti polis, ngem nakapuy ti implementasionna.

Patien dagiti sigud a nangato nga opisial ti Philippine Constabulary, ti namunganayan ti PNP, a nakaron ti nagbabaan ti disiplina dagiti polis iti agdama a panawen, manipud idi nagbalinen daytoy a “civilian in character” kas sagudayen ti 1987 Constitution, ken naisinan kas branch of service ti Armed Forces of the Philippines iti salinong ti Department of National Defense. Naaramid dayta gapu iti tarigagay a mangisina ti police organization iti AFP gapu kadagiti panagabusar dagiti militar idi panawen ti Martial Law, ken gapu kadagiti napasamak a kudeta kalpasan ti 1986 Edsa People Power Revolution.

Ti PNP kas sibilian nga institusion iti salinong ti Department of Interior and Local Government, ket naginad ti pannakaipakat ti justice system kadagiti polis a makaaramid iti maikanniwas, saan a kas iti AFP, a ti commanding officer ti maysa a unit ket addaan iti naan-anay a turay a mangdisiplina kadagiti babaenna, ken nadaras ti court martial proceeding. Dagiti non-commissioned officer ti PNP manipud PO1 agingga iti SPO4 ket regularen a miembro, ken dagiti kualipikado ket mabalin pay nga agderetso a maital-o nga inspector.  Saan a kas dagiti NCO iti AFP manipud private agingga iti master sergeant nga agre-enlist-da iti kada tallo a tawen tapno agdalanda iti nainget a proseso no kabaelanda pay laeng ti mangituloy ti serbisioda.

Adu dagiti singasing tapno maisubli ti disiplina dagiti polis, kas ti pannakapabiag manen ti PC, pannakaipaay ti military justice system para kadagiti kameng ti PNP. Ngem saan a maaramid dagitoy no saan a maamendaran ti Konstitusion a mangimanmandar iti sibilian a karakter ti PNP.

Ti maaramidan ti liderato ti PNP manipud ken ni Presidente Rodrigo Duterte kas Commander-In-Chief agpababa ken ni Albayalde ken dagiti heneral, ket ti nainget a pannakasagat dagiti agngayangay a sumrek a polis, ken saan a panangkonsintir kadagiti kameng ti PNP nga aglabsing iti linteg, kas ti panagtalinaed wenno pannakaisubli iti serbisio dagiti naikkaten gapu kadagiti nadagsen a kaso. #