Footer

SINURSURAN: Dika man agang-angaw, apong…

  1. BEAN, dayta ti awagda kenkuana iti pagadalanda no maminsan. Nalabit gapu iti kinaangawna, kinamanagpakpakatawana. Joker. Naragsak ti patangan, panagsasarita kalpasan ti klase no adda. Ngem no awan, nakaserserioso ti aglawlaw.

Uray kadagiti ubbingna, nagbalinen a markana ti kinaangawna. Ti kinamanagpakatawana. Ngem daytay panagpakpakatawa wenno panagangaw a di makasair ti rikna, ti pride wenno ti kinatao ti maseknan.

Mangpakatawa laeng, dayta ti kangrunaan a panggepna. Iti kasta, naannayas ti panangibisikna kadagiti adal a rumbeng a sagrapen dagiti ubbing. Iti agdama a panawen, saanen a kumna kadagiti ubbing ‘tay nakaserserioso a siled a pagadalanda. Masapuldan ti espasio wenno aglawlaw a mariknada ti kinawayada.

Ket ti mangpakatawa, agpakatawa ti napanunotna a pamuspusan tapno di agdudukot dagiti adalanna.

Namin-adun a napaneknekanna ti kinasamay ti pannakipaset iti lubong a kayat dagiti ubbing no kayat nga ibisik ti adal kadakuada. Ngem maigunamgunam ti limitasion ti tunggal maysa. Saan a gapu ta mayaten a makiangaw wenno makipagkatkatawa ket maiwalinen dayta adda iti nagbabaetanda kadagiti ubbing.

Mapagtalinaed latta ti respeto ti tunggal maysa.

Nangrugi ti kastoy a galadna idi addan iti kolehio idiay Tuguegarao (saan pay a siudad idi idi) a kabisera ti probinsiada. Nautobna a serioso unay dagiti kabaddungalanna ta naynay a naririgat dagiti sangsanguenda a subject-da. Engineering ti kursoda. Inaldaw a numero ti mulmulagatanda. No saanda nga ikaso, daytay agpalpaliwawengda laeng, sigurado la ketdi a saanda a makapasa. Isu a kasta la unayen ti panangigubetda ti bagbagida kadagiti leksionda.

Arig awan payen ti panawenda nga umisem. Pagadalan, library, kasera lattan ti inaldaw a turongda. Awan dayta panagbuya iti sine (nga uso pay laeng idi).  Wenno ipapanda kadagiti pagpalpaliwaan. No rummuarda man kalpasan ti klase, mapanda laeng agbatil-patong, ti ipagpampannakkel ti kabisera a luto ti pansit.

Nga isu ti nakapanunotanna nga agpakatawa. Agangaw, agpakatawa a saan a makasair iti rikna. Naimbag la a pangikkat iti stress-da kadagiti klaseda.

Pangpalag-an iti riknada. Pangpalag-an kadagiti aramidda.

Napaneknekanna a dakkel ti naitulong dayta a kinamanagpakatawana. Inkatkatawadan dagiti simmaruno a tawenda iti kolehio agingga a dida napuotan ti pannakalpasda ti lima a tawen pakairamanan ti panag-OJT-da (a nakairamananna a nag-cover idi mapasingkedanen ti panagsiudad ti Tuguegarao).

Iti panagrepasoda idiay Manila, intugtugotna latta ti kinamanagpakatawana. Isu a kasta la unayen ti lag-an ti riknada a nageksamen iti board.

Kenkuana, dina pinanunot ti rigat ti eksamen. Inis-isemanna laeng iti isipna.

Apaman a nalpas ti eksamen, saanda nga impadlaw ti panagdanagda iti mabalin a resulta. Kasta unay man a danag dagiti nakagiddanda idi rummuardan iti pasdek a nageksamenanda.

Nalagipna manen ti panagpakatawana. Idi sinabat dagiti padada nga Ilokano (taga-Ilokos) ti grupoda, kinuna dagitoy: “Agawidtayon, kailian… intayon agmula iti kamotig.”

Maawatanna no apay a kasta. Namnamaen lattan dagitoy padada nga Ilokano a saanda a nabaelan ti eksamen ket masapul nga agawiddan.

Ngem insungbatna: “Agkikitatayonto laengen ‘ton oath taking, kailian!”

A nagkakatawaanda.

Sipud idin, paseten ti biagna ti agpakatawa. Aklonenna met ketdi a no dadduma, adda dagiti gundaway a dina mapuotan a makasair iti rikna aglalo no adda ‘tay ngedngednged ti pannakaawat ti maseknan. Ngem saanna nga itulok nga agnunog ti sugat a maparnuayna.

Agkiddaw iti pasensia, pammakawan ken makikappia a dagus.

Ta kasta la ngarud ti maitutop— panagkikinnaawatan iti nagbabaetan para iti nasaysayud, nataltalna, ken nalaglag-an a panagkakadua.

No apay ngamin nga agpakpakatawa pay, mamati a dakkel ti maipaay daytoy a pagimbagan iti salun-at. Saan laeng kadagiti magasin, journal, internet, social media, telebision ti nakaammuanna kadaytoy. Mismo a kadagiti lisensiado a mangngagas a nakapulpulapolnan.

Kinapudnona ngarud, idi sineknan ti stress, nagpaiduma nga stress, imbalakad ti doktorna a bukodna a bagbagi ti makaagas kenkuana. Aklonenna dagiti pagteng, mamakawan ken agragsak. Dina demdemdemen dagiti napalabasen. Naglabasen dagitoy, rumbeng a lipaten; mangrugi/mangabaruanan para iti masakbayan.

Kastoy ti naibalakad kenkuana kalpasan a nagdalan kadagiti adu a panagagas kadagidi dina maawatan a narikriknana. Nga awan met naduktalanda a diperensiana kadagiti naglasatanna a laboratory exam.

Binaliwanna ngarud ti panagkitana iti biag. Nagbalin a naragsak. Inisemanna laeng dagiti bambanag a mangipaay koma kenkuana iti stress. Ditan ti nanipudan ti limmag-anan ti riknana.

Wen, pudno la unay a dakkel ti maitulong ti kinaragsak, kinamanagpakatawa iti salun-at. Paluk-ayenna dagiti piskel a nautoyan, pababaenna ti presion ti dara ken ruk-atanna dagiti hormone a makatulong iti nadaras a panagimbag kadagiti sagubanit a kimpet.

Ken mariknana, awan dayta nabantot a barukong iti panagisuroda kadagiti ubbing no pagtalinaedenna ti kinakalma wenno panagpakatawana kadagiti adalanda. Malaksid kadagiti jokes (wenno pakpakatawa) nga iserserrekna iti topikoda tapno makapaisem laeng, uray saan a makuna a millenials, makiuso metten kadagiti hugot dagiti ubbing. Ken kadagiti trend iti biag dagiti agtutubo ita. Pagarigan ti linia a nalatak ita kalpasan ti ‘walang forever’: advance mag-isip. Padpadasenna pay ngarud nga adalen ti pagsasao dagiti adda iti third sex a makuna tapno ad-adda a nasayud ti pannakilangenna iti aglawlawna.

Laeng, marigatan latta a mangadal kadagitoy. Agkannawil ti dilana. Nupay kasta, addada met dagiti naadalna.

Isu a kasta la unayen ti kinadekket dagiti ubbing kenkuana. (Ngem adda latta met ketdi dagiti mangliblibbi iti likudanna, aglalo kadagiti kanayonna nga alaen ti atensionda gapu iti kinasulpengda. Ngem ad-adda a dina maaklon no baybay-anna lattan dagitoy. Maipamatmat laeng a dina ipatpateg dagiti adalanna. Uray guraenda, ti napateg, madillaw, isurona dagitoy nga ubbing a mangtagidakes kadagiti ar-aramidenna.)

NGEM daytoy ita kinaangaw ken kinamanagpakatawana, kasla kayatna nga idian wenno isardeng.

Saan a gapu kadagiti ubbing a naitalek kadakuada.

Ketdi, gapu iti maysa a maibilang ita metten a bulbullagaw, wenno payaso kuna dagiti Tagalog.

Pagaammo ti sibubukel a pagilian ti kinaangaw daytoy a bulbullagaw. Wenno kina-joker-na, kunatayo kad’ lattan.

Adda dagiti ikarkari daytoy a bulbullagaw. Nga inton panagkitana ket nagkabsiw, ket madlawna a sidiren dagiti umili, kunaennan a di man la maangaw dagitoy.

Nga angawna laeng dagiti imbagana!

Iti kas kenkuana a tangtangaden dagiti umili, saan koma a rumbeng a kasta. Agbalin a napudno kadagiti isawangna. Sinanama ti sibubukel a pagilian kenkuana.

Ngem kasla metten karnibal ti entablado a yanna. Pagaangawanna dagiti isyo, dagiti serioso a bambanag a mapaspasamak iti pagilian.

Saan met ngarud a talaga a bulbullagaw nga agpakpakatawa iti entablado ti akemna. Pagilian ti rienriendaanna. Umili dagiti mangnamnama. Saan ida a rumbeng a pagaangawan.

Ta ania man a bileg nga adda kenkuana, nagtaud iti ima dagiti umili.

Imbes ngarud nga agpakatawa, maitutop a sanguenna ti parikut ti pagilian. Ummongenna dagiti kakaduana tapno balabalaenda ti pagturongan ti pagilian. Maikanatad a kitaenna a naimbag dagiti isawangna iti sanguanan dagiti mangnamnama, agtaltalek kenkuana nga umili.

Makiddaw a saan koman a makisagpaw dagiti agpalpaltuad kadagiti biddut a damag. Ta saan nga ang-angaw dayta mangyalis iti alipuspos tapno laeng madayaw ti idaydayawda a bulbullagaw.

Saan ngamin nga inaangaw ken mapagaangawan ti turongen ti pagilian. Serioso a banag. Rumbeng a tugawan, adalen ken mennamennaen a naimbag para iti arapaap a panagdur-as.

Awan sabali a kiddawna ita no di ti pannakaisardeng daytoy pannakaang-angaw ti pagilian. Agtrabaho ketdi a sipupudno. Ibelleng ti kinaangaw no pagilian ti pagsasaritaan.

Ta tunggal angaw ken panagpakpakatawa, adda lugarna.

Isu a no mabalin, dika koma aging-angaw, apong… #.

No comments yet.

Leave a Reply

This site uses Akismet to reduce spam. Learn how your comment data is processed.