Footer

Tribu ni Cain (Maikadua a paset)

Mumalemen idi mausawan ni Mayor Rodis. Simken ti babawi kenkuana a nangpirma kadagiti papeles. Amangan no adda sabali a nailaok a di rumbeng a pirmaanna koma. Nalagipna ni Dondon. Sigurado a gumura iti pannakaited ti Bantay Ligsay ken ni ulitegna nga Elmer. Nalagipna met ni Alex nga anak ni Elmer. Idi laeng kalman, kinasao ni Alex ti mayor no mabalin a bukodanna kano ti mangimaton iti jueteng.

“Plano ni Benjamin ti mangimaton iti jueteng,” insungbat ni Mayor Rodis idi kalman iti kaanakanna. “No ngata agtulagkayo nga agkapidua?”

“Ngem, uncle, baknangen ni Benjamin. Uppat dagiti balay-pagliwliwaan a kukuana!”  Nagrikiar ni Alex.

Napaulimek ti alkalde.

“No adda pannakabalinna, uncle, bukodak la koman…” impakaasi ni Alex, natibnokan iti apas ti timekna.

“Bay-am, kaanakan, ta kasaok ni kapiduam,” kaay-ayona daytoy a kaanakanna.

Ammo ti mayor ti ugali ni Alex. Makiringgor no adda di mangpagusto wenno mangipasuli kenkuana. Sharp shooter pay iti caliber 45. Ti panagribalda ken ni Benjamin iti sabsabongenna, nagistay napaltoganna ti kapiduana. Naimbag ta nakataray ni Benjamin sakbay a maasut ni Alex ti paltogna! Daytoy metten ti sipudna a nagragut ni Benjamin iti paltog. Nadumaduma a kalibre ti ilemlemmengna. Ken nagbalinen nga arkos ti siketna.

Rabiin idi sumangpet ni Mayor Rodis iti balayda. Agdiwerdiwer pay bassit ti panunotna. Dina narikna ti bisinna. Mayat ti pinulotanda ken Elmer a bagnet, chitcharon ken kilawen a pasayan. Nakiragup iti pamiliana nga agtutugaw iti salas. Ken, kas ugalida, kalpasan ti panangrabii, ibaga ti tunggal maysa ti inaramidna iti nagmalem. Umuna ni Benjamin nga agipadamag.

“Adda man damagek, pa?”  Kinuna ni Benjamin.

“Wen, hijo,” inyalbat ti ama a dimmenna ken ni Puring nga asawana. Agpadada a lukmeg.

“Idi immay ni Kapid Alex ditoy balay idi kalman, pinatganyo ti kiddawna nga isu ti mangimaton iti jueteng?”

“Imbagak nga agsugponkayo.”

“Apay ngaruden nga agrekrekrut iti tattaona a tumulong kenkuana?!”

Bay-am ta allukoyekto ni Alex,” nagkuretret ti muging ti mayor. “Ngem, no agsukir, bay-am ditan no di dumngeg ti ballaag!”

“Ania ti nagsaritaanyo ken ni Ucle Elmer, itay, pa?”  Inamad met ni Dondon, idiay Rodis Lailo Beach House?

Naimayeng ti mayor.

“Ti Lailo Beach Resort ti nagsaritaanmi,” kagudua ti pudno ti inlatak ti mayor.

“Amangan no intedyon kenkuana ti Bantay Ligsay!”

“Kinaagpaysona, kiniddaw ni Elmer dayta…”

“Ket, intedyon kenkuana?”

“No ngata no agsugponkayo nga ag-uliteg?”

“Bukodak ti kayatko!”

“Ngem, isu ti mangsungbat iti four million pesos nga itapogko iti Lailo Beach Resort!”

“Uray pay!”  Insalpika ni Puring.

Nasair ti kinalalaki ti mayor, ti kinapadre de pamiliana. Nasindian ti gurana kadagiti annak ken asawana.

“Siak ti pangulo itoy a kaamaan!”  Indil-ag ti mayor. “Ti pagayatak ti matungpal. Basta sika, Dondon no ibagak nga agsugponkayo ken ni Elmer, agsugponkayo!  Kasta met kenka, Benjamin. Agsugponkayo ken ni Alex iti jueteng!”

“Dika agpungtot, Roding,” kinuna ni Puring. “Laglagipem ti sakitmo.”

Kellaat a dimteng ni Joe, ti messenger-janitor ni Mayor Rodis. Ugali daytoy ti makipangrabii kadakuada.

“Aniat’ damag, Joe?”  Dinamag ti mayor.

“Kua, mayor,” inikkat ni Joe ti kipisna nga arinsaluduen. Naipalgak ti pulingasna. “M-mangrugi kanon ti jueteng inton bigat.”

“Siasino ti mangimaton?!”  Dil-ag ti saludsod ti mayor.

“N-ni Alex, mayor.”

“Anak ti sal-it!”  Nagtabbaaw ti mayor.

“’Nia, makitam, pa?!”  Inkanunong ni Benjamin

“Ania pay ti damag, Joe?”  Nagsaludsod manen ti mayor.

“A-asideg kanon a maminas ti Bantay Ligsay, mayor.”

“Siasino ti mangimaton!?”  Dinamag ni Mayor Rodis, agparparang ti rupa ni Elmer iti mugingna.

“Ni… kasinsinmo nga Elmer, mayor.”

“Anak ti sal-it!”  Gimluong ti tabbaaw ti alkalde. “No kallepleppasmi laeng a nagsarita. Kinunak a kasaok ni Dondon tapno agsugponda!”

“No pinnartakan ti tignay, narigat nga arusen dagita nga ag-ama,” inlibbi ni Puring.

“Kasano itan, pa?”  Inamad ni Benjamin ken Dondon, di masinunuo ti naluklukmeg kadakuada.

Dinarup ti mayor ti lamisaan a lugar ti telepono iti suli ti salas. Nagkawit iti numero ti tammudona.

“Hello, hello,” kinunana. “Elsa, ni manongmo a Roding daytoy.”

“… ”

“Kasaok koma ni Elmer.”

“… ”

“Kaluluasna a nagpa-Manila?”

“… ”

“Ti cell phone number-na, itedmo koma.”

“… ”

“Ni laeng Alex ti makaammo iti cell phone number-na?”

“… ”

“Kasaok nga’d biit ni Alex.”

“… ”

“Awan ni Alex?  Ania metten. Good night, Elsa.”

Nagsubli ni Mayor Rodis iti sango dagiti annak ken asawana.

“Adda pay nabati a pamuspusan,” kinuna ti ama. “Patiliwko ni Alex no pudno nga agpapa-jueteng. Diak ipalubos nga agminas ni Elmer idiay Bantay Ligsay. Ibabawik iti isusugponko iti Lailo Beach Resort. Ibabawik amin a pinirmaak kenkuana!”

Nagkinnita da Benjamin ken Dondon.

“Siak ti mangtiliw ken ni Alex!”  Impangta ni Benjamin.

“Siak ti mangpasardeng ken ni Uliteg Elmer nga agminas!”  Insaruno ni Dondon.

(ADDA TULOYNA)