Footer

Gakat a TRAIN 2, nasukatan iti TRABAHO bill

ADDAN naisaang a gakat sadiay House of Representatives mainaig iti tax wenno buis iti laksid nga agsagsagaban ti napakaro a dadagsen iti panagbiag dagiti adu a Pilipino nangruna dagiti napanglaw gapu iti inflation rate wenno panagbaba iti balor ti piso, ken ninayonan ti dakes nga epekto ti implementasion ti Tax Reform for Acceleration and Inclusion Law.

Uray no saanen nga agbayad iti personal a buis wenno income tax dagiti agtatatrabaho ken mangmangged a ti masapulanda ket P250,000, agpababa iti makatawen, ken ad-adun ti mayawidda a sueldo, ngem ti dakesna, naingato met ti buis dagiti kangrunaan a produkto ken serbisio, pakairamanan ti gasolina, krudo, ken dadduma pay a petroleum products, ken dagiti material iti panagpataud iti enerhia. Ti pannakaingato pay iti buis dagitoy a produkto ket nagpataud iti nagsisilpo nga epekto wenno “domino effects” a nangparnuay iti itatayok ti presio dagiti dadduma pay a produkto ken serbisio.

Ipapilit man dagiti economic managers ti administrasion ni Presidente Rodrigo Duterte a ti laklak-amen tatta dagiti umili nga ingingina ti presio dagiti produkto ken serbisio ket epekto laeng ti inflation rate ti piso gapu ti ipipigsa ti sukat ti doliar iti world market, ngem saan a patien dagiti adu a Pilipino nangruna dagiti eksperto ken makaawat iti panagtaray ti ekonomia.

Patien dagiti adu nga umili a ti pannakaisayangkat ti umuna a TRAIN Law ket pinakarona pay ti nadagsenen nga epekto ti inflation rate. Ngem ipilit latta ti administrasion a palawaen pay ti implementasion ti TRAIN Law, kas inrakurak ni Presidente Duterte kabayatan ti panangipaayna iti maikatlo nga State of the Nation Address tapno adda pangsuporta ti gobierno para kadagiti adu a programa ken proyekto. Kiniddaw ti Presidente kadagiti kameng ti Kongreso ti panangipasada a linteg iti maikadua a TRAIN bill kas paset ti legislative agenda ti administrasion.

Gapu iti negatibo a reaksion dagiti tattao iti nadagsen nga epekto ti TRAIN Law, inaklon da Senate President Vicente Sotto III ken Majority Floorleader Miguel Zubiri nga awan pay ti mayat a senador a mangisponsor iti gakat sadiay Senado ta agamakda iti epektona kadakuada nangruna ket umasidegen ti 2019 Elections. Patien dagiti senador a political suicide ti panangesponsorda iti dayta a gakat.

Sadiay House of Representatives, iti liderato ti baro nga Speaker a ni sigud a Presidente ken agdama a Pampanga 2nd District Gloria Macapagal Arroyo, nagrubuaten ti TRAIN 2 bill, ngem nabaliwanen ti titulona gapu ta patien dagiti kongresista a nadagsen ti implikasion ti orihinal a naganna.

Inaprobaranen ti House Committee on Ways and Means nga idauluan ni Quirino Representative Dakila Carlo Cua ti gakat a kasukat ti TRAIN kas Tax Reform for Attracting Better and High-Quality Opportunities wenno TRABAHO. Kalpasan ti pannakaipasan ti TRABAHO bill iti komite, maipanen daytoy iti Committee on Rules tapno mapagdedebatean iti plenario.

Ti gakat a TRABAHO ket panggepna a pamodernuen ti wagas ti panagbuis dagiti negosio ken ikkatan dagiti agdama a corporate tax incentives dagiti kompania tapno makaatrakar ti gobierno kadagiti ad-adu nga investor iti pagilian a mangpataudto kadagiti nayon a pagtrabahuan.

Kayat dagiti mangidurdruon a kongresista a daytoy a gakat ket pababaenna ti corporate income tax a baybayadan dagiti 95 a porsiento dagiti amin a kompania iti pagilian, agpababa iti 20 porsiento agingga inton 2029.  Iti agdama dagiti kompania ket agbaybayadda iti 30 porsiento a corporate income tax. Daytoy a baro a tax package ket idiayana dagiti baro a fiscal incentives kadagiti kualipikado nga umawat a mangipapaay iti tulong ti panagdur-as ti pagilian babaen kadagiti pro-poor investments ken pagtrabahuan.

Kas ti TRAIN Law, nagpintas ti pannakaiparang ti panggep ti TRAIN 2 Bill wenno TRABAHO Bill, ngem kontraen daytoy dagiti dadduma a kongresista ken senador ta no agbalin dayta a naan-anay a linteg ket dakesto ti epektona iti mabayag a panawen ta dagiti kompania ket in-inutda nga agserra wenno umakar kadagiti sabali a pagilian gapu iti pannakaikkaten dagiti corporate tax incentives.

Nabaliwan man ti titulo a TRAIN iti TRABAHO, saanen a maikkat ti amak dagiti ordinario nga umili iti dakes nga epekto ti panagbayad iti buis iti kasasaad ti panagbiagda. Para kadakuada, narigatda a maawatan ti kaipapanan dagiti maar-aramid a linteg maipapan iti ekonomia. Nalaklakada ketdi a maawatan dagiti dakes a bunga dagitoy a linteg inton maipakatda kas ti implementasion ti TRAIN Law ta marikna ken sagsagabaendan ti nadagsen nga epektona iti panagbiag.

Agparparang a nagsayaat ti panggep ti TRABAHO bill, ngem rebbengna a dagiti economic managers ti agdama nga administrasion ken dagiti kameng ti Kongreso a mangidurduron ti TRABAHO Bill ket adalen ken amirisenda nasayaat dagiti dakes nga epektona iti biag dagiti adu nga umili ta amangan a bekkelenna pay dagiti adun nga agtungtunglab iti rigat a Pilipino. (Eden Alviar)

Comments are closed.