Footer

Sir Jaybert (Umuna a paset)

“SAANAKTO a paikasar kenka…”

Naalimpayengak ken di makapamati iti dayta nga insawang ni Joelyn idi agpatangkami iti SSG (Supreme Student Governement) office a paggigianak no maminsan. Kas adviser, akemko ti mangkita iti turongen ti organisasion. No maminsan, kunak, ta saan nga inaldaw. Kaaduanna nga iti opisinami a mannursuro ti pagtalinaedak no awan ti klasek.

Apaguni ti buzzer para iti sumaruno a period idi immuneg ni Joelyn. Nairana nga adda exam dagiti agbantay a lider isu a kinunak kadakuada a siak pay laeng yantangay bakantek. Ditoy nga impudno ni Joelyn ti kasasaadna– dua darasen a naglangan ti binulan a bisitana. Saanakon a masdaaw ta namitlon a nakalipatkami.

Kiniddawko nga agkallaysakamin sakbay a madlaw ti tianna.

Ngem dayta ketdin ti insungbatna!

“Ta apay?” napalalo a siddaawko.

“Basta…” Serioso ti rupana. Ket tinallikudannakon.

Kamakamek koma ngem kaslaak metten naidarekdek iti nagtakderak. Insurotko lattan ti imatangko iti likudanna.

AGKULIBAGTONG ti rikna, kasta kano iti oras a maimatangan (uray damdamo laeng) ti babai a mamagpitik iti puso. Saan a mailadawan. Dinaka paidnaen. Arigmo kan’ ‘tay kasla di makaanak a pusa. Love at first sight, pudno dayta, kunada.

Kunak met: linoloko! Apay, agsinggalot ti rikna iti damo laeng a panagkita? Masigurado kadin nga ayat dayta a rikna nga immassibay? Baka gartem laeng! Masapul met, a, a maluom ti rikna ti tunggal maysa sakbay a maibaga nga ayat!

Kuna dagiti millenials: Na-love at first sight ako sa kanya, bez!

A masungbatan:  Allaka, bakla, kitaem, a, no ipanmon a rikna!

No ania ket dagita a, a lengguahe dagiti agtutubo ita!

Ti pakasiudotak pay no maminsan, nakalawlawag a babbaida nga agpatpatang, ngem bakla ketdin ti innawagda! Ken no kasano nga agkikinnaawatanda ket naka-headset-da pay nga agpapatang!

No dadduma: Amman, girl, nainlababo ako ng todo!

Bez, bakla, girl… aglalaok! Maulawak la koma ngem naruamak pay ketdin. Masapul nga adalen dagitoy a taray ti agdama a panawen tapno saan a maudi a kunada.

Ngem basta para kaniak, awan dayta first love at first sight. Paluomen ti rikna, period! Iti kasta, naragragsak ti mabukel nga ayat.

Isu a dayta ti pagkunaak no apay a nadanonko daytoy edadko a tallopulo ket walo nga awan pay ti nakaigalutak. Kinapudnona, agpadlawen dagiti puraw a buok. Sa pay la kasla kabambantayanen ti sumilapen a tuktukatokko. Umingpis nga umingpis dagiti buok iti ngatuen ti mugingko.

Dagiti sutil nga ubbingmi, birbirngasanda payen ti liklikudak iti “kukko.” Kayatna a sawen iti pagsasaoda, kalbo, makalkalbo, wenno iti Tagalog, panot!

Ti siudotko idi maammuak ti kayat a sawen dayta a balikas nga immuna nga insuratda iti pader ti CR ti pagadalan. Idi damok a mabasa, ta nalabsak iti panaglikawlikawko iti pagadalan kas paset ti panangkitak iti disiplina dagiti ubbing, saanko nga inkankano ta diak ngarud maawatan. Sa maysa, adda makaay-ayo iti abayna: Guapo ni Sir Jaybert. Ngem idi maammuak ti kinapudno, nariknak lattan ti panagpaulo ti darak.

Ti makadakes, awan ti masnop a tuduek a nagaramid tapno pagsasawak koma. Wenno bagbagaan (ta narigat itan ti dumisso iti ubing gapu ta pagkaritda ti Child Protection Policy wenno CPP). Awan met ngarud ti uray maysa nga ubing nga immasideg a nakakita no asino ti nagsurat kalpasan a nagdamdamagak.

Sabagay, addada (saan la a maysa) dagiti atapek: dagiti kanayonko a bagbagaan a di mangsursurot iti pagalagadan ti pagadalan. Isuda laeng dagiti ammok nga adda gurana kaniak. Kanayon a sitarek ida iti dida panaguniporme, pannakaladaw a sumrek, panagsusugalda iti kasamekan iti likud ti eskuela ken panagpayubyob payen.

“Dakami la ti makitkitam, sir,” nakunada payen iti naminsan.

Nagsibo ti darak. Ngem nagari pay laeng iti panunotko ti CPP a sineminarmi. Binagbagaak latta idan; kinasaritak ida a nasayaat nupay nagtadem ti kusilapda. Papananna no didanto met laeng aglimpio? pakonsuelok laengen iti bagik.

Saanak met ketdin a masdaaw no nasapaak nga aguban. Immalaak ken ni nanang. Pulida. Apaglabesna la a kuarenta idi aguban. Ita ta ngannganin ag-senior citizen, naisapawen ti ubanna. Nasapa a nagasawa isu a mapan laeng a sangapulo ket siam a tawen ti baetmi.

“Ubanandaka, sir,” kuna no dadduma dagiti babbai, nga aw-awagak iti ampiang, nga ubbingmi iti Senior High School (SHS). Ranrantaendak iti opisina ti SSG. Iti Junior High School-ak ngem adda maysa a load-ko iti SHS.

Ampiang, kunak, ta garatigitda ken kasda la agpapaarem. Aguanta siketendak pay wenno gabbayen. Adda pay ‘tay diak mapakpakadaan a mangarakup iti likudak no agumbi.

Abnormal laengen ti lalaki a di sumgar iti kasta a kapadasanna. Ngem ania ngarud ket kellaatendak met.

Ngem nupay mapaseggarak ken bangonan ti nagpaiduma a rikna, matmatdaak, piman, nga agtepteppel. Aglalo ket pudno man met a nabaludbodda ken agadiwara ti agat-pinipig (kuna man dagiti sutil) nga ayamuomda. No sugal a lucky nine koma, mabalin nga ibaga a kartada nuebe ti dadduma kadakuada. Ngem nalaka, aya, ti maireklamo? Kakaisuna a nakastrekakon iti gobierno kalpasan ti uppat a tawen a panagap-aplayko a nakaparigatak la unay ta awan idi ti kumarapetak nga asideg iti sakaanan dagiti babassit a didiosen.

Sabagay, no maminsan, adda dagiti gundaway a kasla sabtek ti panagumbida. Ngem apagapaman laeng. Amkek no ibagada a gunggundawayak ida. Ken amkek no ania ti panunoten dagiti dadduma nga ubbing a makakita.

Sutilak pay no dadduma no mailuyosak. Tuladek ‘tay pannakaarkos ti ngiwat ni Sir Redel, kaduak a baro pay: “Kiss-nak man!” Nagbalin pay ket a normal daytan a sangkasaona. Sawenna pay kadagiti babbalasang, uray naasawan, a kaduami no sumro ti kinaangawna. Awan pilpilienna. Pati siak! Naimbag ta awan ti masuron kadakami.

“Ibagam ken ni Sir Leo dayta,” kinunak a ti kulot ti timekna a kaduami ti kayatko a sawen.

A permi a nagporpordiosan ni Sir Redel.

Ti ketdi madlawak, kasla awan aniamanna kadagiti “ampiang” ti pannakailagudlagod ti barukongda. Ken no irantak, no kasta a riknak ti makiangaw, a sabten ti umbida, awan ti reklamoda. Kasla kaykayatda pay ketdi. Ngem dagusak nga umikay no sipaten ti ammok a kasigudko nga anghel  ti panunotko.

Lagipem saan laeng a ti CPP ngem pati ti makunkuna a child abuse, agallangugang no kua iti isipko.

Piman a rikna ta dagus a masebseban!

“Bay-anyon dagita nga uban,” pamrayak nga isungbat. “Nasurok a tallo a dekada nga inur-urayko. Sa ita… ikkatenyo laeng?”

A pagkakatawaanda.

“Agpayso nga awan pay ti nobiam, sir?” saanda pay nga agalumiim a nangdamag iti naminsan.

“Dikayo mamati?” sinaludsodko ketdi.

Pilia ti panagiinnisemda. Sada pay la nagiinnapir! Saanak a nayanak idi kalman tapno diak masirok ti riknada.

(ADDA TULOYNA)

Comments are closed.