Footer

BANNER NEWS: Amin a siudad ken ili iti Region 1 a dumna iti baybay, mabalin a madidigra iti ginggined

VIGAN CITY – Kalaksidan ti Vigan City, amin a siudad ken ili iti Region 1 a dumna iti baybay ket mabalin a madidigra iti napigsa a ginggined no agkuti ti Manila Trench iti paset ti West Philippine Sea, isu a kasapulan ti naan-anay a panagsagana dagiti maseknan a local government units.

Dayta ti ballaag nga inrakurak ni Philippine Institute of Volcanology and Seismology Deputy Executive Director Bart Bautista kabayatan ti naangay a press conference kalpasan ti naballigi a pannakaisayangkat ti 3rd Quarter National Synchronized Earthquake Drill iti Vigan City. Naangay ti presscon iti Vigan City Hall idi malem ti Agosto 16, 2018.

Impakaammo ni Bautista a dakkel a peggad ti kaadda ti Manila Trench ken Wrench fault system iti baybay iti laud ti Ilocos a no agkuti daytoy ket mabalin nga agpataud iti Intensity 8 a ginggined a manggubuay iti nakaro a didigra kas ti pannakarebba dagiti pasdek, ken agparnuay iti tsunami wenno dakkel nga aluyo a manglayus ken mangipaay ti kalamidad kadagiti asideg iti baybay.

Sinalaysay ni Bautista a maibasar iti data iti ahensiada iti pakasaritaan dagiti napigsa a ginggined a napasamak iti Ilocos Region ket mabalin a maulit daytoy a mangipaay ti nakaro a didigra, aglalo iti Vigan City ken kabangibangna nga ili ta asideg iti Abra River fault.

Nagballaag met ni Office of the Civil Defense Region 1 Director Melchito Castro kadagiti agindeg kadagiti amin nga ili ti Ilocos Sur a dumna iti baybay iti possible a pannakadidigrada no tumaud ti napigsa a ginggined ket inggunamgunamna ti panagsagana dagiti amin a lokal a gobierno babaen ti panangsanay ken panagipaayda kadagiti naan-anay nga alikamen dagiti lokal a Disaster and Risk Reduction Management Office ken dagiti barangay volunteers ta saan nga ammo no kaano a dumteng ti ginggined.

Impatalged met ni Office of the Civil Defense Executive Director Undersecretary Ricardo Jalad nga agtultuloy ti panagsagsagana dagiti amin nga OCD iti nagduduma a rehion tapno mapalag-an ti epekto dagiti amin a didigra agraman ti ginggined aglalo ti maaw-awagan iti “Big One” a mabalin a mapasamak sadiay Metro Manila ken kabangibangna a probinsia. Nagapila ti opisial ti naan-anay a suporta dagiti umili kadagiti amin nga earthquake drills, panagridam ken panagtungpalda kadagiti balakad ken panangiwanwan ti gobierno no sumangbay dagiti kalamidad.

Impakaammo met ni Vigan City Mayor Juan Carlo Medina ti ar-aramiden ti City Government kas wagas ti panangsaganada iti possible nga idadateng ti ginggined a mangdidigra iti siudad kas ti earthquake drill. Impakaammona pay ti pannakaisayangkat ti 3D scanning kadagiti kadaanan a pasdek ken balbalay iti Vigan City tapno maduktalan ti kasasaadda ken mapatibkerda tapno nalagdada a sumaranget kadagiti ginggined.

Sakbay ti press conference, naisayangkat ti earthquake drill iti sentro ti siudad. Narugian daytoy babaen ti ababa a programa iti Plaza Burgos a nakikaysaan dagiti opisial ti nagduduma a departamento ken ahensia ti gobierno kas ti Department of National Defense, Department of Interior and Local Government, Department of Science and Technology, Department of Social Welfare and Development, Philippine Information Agency, Provincial Government ken City Government. Iti alas-dos iti malem napuligos ti alarma babaen kada Gov. Ryan Singson, Mayor Medina, Usec Jalad, Dir. Castro, ken Dir. Bautista, a senial ti rugi ti earthquake drill.

Nangrugi ti earthquake drill a dagiti nakipaset pakairamanan dagiti estudiante iti Divine Word College ken dagiti agtatatraho iti nagduduma nga opisina ket nagtugaw, nagrukob, ken inyabbongda dagiti imada kadagiti uloda ken nagnada a naurnos a simmurot kadagiti nangiwanwan kadakuada kadagiti natalged a lugar wenno evacuation centers. Naaddaan iti tunggal akem dagiti agserserbi iti gobierno kas dagiti kameng ti Philippine Army, Philippine National Police, Bureau of Fire Protection, ken dadduma nga ahensia ken sanga ti gobierno, ken pribado a sektor. (Eden Alviar)

, , , , , ,

Comments are closed.