Footer

Panag-leave of absence ni Mocha Uson iti gobierno?

RUMBENG kadi nga ag-leave of absence wenno maikkaten ni Presidential Communication Operations Office Assistant Secretary Esther Margaux “Mocha” Uson gapu iti kaudian a kontrobersia a nakainaiganna?

Dayta ti nagkaykaysa a saludsod ken karirikna dagiti adu a Pilipino iti sango ti sabali manen a kontrobersia nga inaramid ni Uson, a panangiruarna iti social media iti sensitibo a video para ti pannakaikampania ti federalismo nga idurduron ti administrasion ni Presidente Rodrigo Duterte. Mapapati a dayta ket mailabsing iti Code of Ethics dagiti agserserbi iti gobierno.

Naglak-am iti adu a pammabalaw ti video da Uson ken Drew Bolivar a nangipabuya iti panagsala ken rap a nakakantaan iti “Ipepe, ipepe. Idede, idede. Ipede, pede, pede, pederalismo!” nga iti panirigan dagiti adu a Pilipino ket insulto kadagiti babbai ta iparparangarang dagiti balikas ti pribado a paset ti bagi dagiti babbai.

Adu dagiti nadismaya iti dayta a video agraman dagiti kaaliado ti administrasion a da Senator Aquilino “Koko” Pimentel III, ken ti amana a ni sigud a Senate President ken Consultative Committee on Charter Change member Aquilino “Nene” Pimentel Jr., agpada a mangilunglungalong iti pannakabaliw iti federalismo iti agdama a unitary system ti gobierno. Para kadakuada, maibilang ti video a nakababbaba a wagas ti panangikampania iti federalismo a makaipaay iti insulto kadagiti Pilipino.

Adun dagiti opisial ti nangipaay iti negatibo a reaksionna iti video, agramang dagiti kameng ti Con-Com nga idauluan ni retired Chief Justice Reynato Puno, a nangaramid iti rekomendasion iti Presidente ken Kongreso maipapan ti pannakasukat ti 1987 Constitution ken pannakaadaptar ti federalismo. Inrakurakda a saanda nga inikkan ni Uson iti autoridad kas opisial a mangikampania iti federalismo.

Inrakurak met ni Presidential Spokesman Harry Roque, nga awan aniaman ken ni Presidente Duterte ti inaramid a video ni Uson ta patienna kano ti “freedom of expression.” Ngem kas opisial ti gobierno, nangruna ket PCCO Assistant Secretary, rebbengna a naannad ni Uson iti inaramidna a video, saan a gapu ta nawaya a mangipaduyakyak ti riknana, ket makadagil met ti rikna dagiti tattao.

Segun met ken ni Uson, awan ti malisioso iti inaramidna a video, ken naaramiden dayta sakbay ti pannakidkiddaw kenkuana a tumulong iti information campaign maipapan iti federalismo. Para kenkuana, dagiti dadduma a senador a kritikona ti narugit ti panagpampanunotna. Iti panangipagarupna, disente ti inaramidna kas met laeng dagiti seksi a pabuya ti grupona a Mocha Girls, sakbay a nadutokan nga opisial ti gobierno. Ngem para kadagiti adu nga umili, makainsulto kadagiti babbai, ken saan a maikanatad a propaganda para iti federalismo.

Binabalaw met ni PCOO Secretary Martin Andanar ni Con-Com spokesman Ding Generoso iti panang-bypass-na kenkuana a nangkiddaw iti tulong ni Uson para iti federalismo information campaign. Impakaammona a saanda napagpatangan ken ni Uson ti umno nga aramidenna.

Impakaammo met ni Generoso a nagpatangda ken ni Uson maipapan iti federalism campaign, ti pannakai-post iti social media maipapan iti federalismo, ken draft constitution ti Con-Com, ken interview kadagiti eksperto iti dayta nga isyu. Inaklonna a ti kayatna a wagas ti information campaign ket saan a kas ti video da Uson ken Bolivar.

Gapu iti video ken dagiti kontrobersial nga inaramid ni Uson iti naglabas kas ti panagiparuarna kadagiti palso a damag wenno “fake news” iti blog-na ket umad-adun dagiti mangkidkiddaw ti panag-leave wenno panaglusulosna. Iti naglabas, naawisen a nagparang iti Senado iti panagimbestigar iti pannakaiwaras dagiti palso a damag a mangdadael ti reputasion ken nasayaat a panaglalangen dagiti umili, ken ti administrasion ken adda iti oposision.

Mairaman kadagiti agkidkiddaw ti panag-leave ni Uson ket ni Harold Clavite, Director General ti Philippine Information Agency, maysa kadagiti ahensia a sakup ti PCOO, a nangibilanganna a ti kontrobersial a video ket saan laeng nga insulto, pababaenna pay ti lebel ti propesionda iti benneg ti communication and information, ken ipababana dagiti babbai ken inna kadagiti komunidad. Kiniddawna a a kasapulan ti panag-public apology ni Uson, ken panag-leave of absence-na tapno makapagpanunot a nasayaat kadagiti umno nga aramidenna.

Para kadagiti adu a Pilipino, nakaro a biddut ti video nga inaramid ni Uson a naipabuya iti blog-na ken iti official Malacañang facebook account, ta iyanninawna ti kinatao dagiti adda iti likudan dayta a pabuya, a mangapektar iti panggep ti federalismo nga idurduron ti administrasion. Kasano a maallukoy dagiti kaaduan a Pilipino a mangsuporta iti federalismo no dagiti mismo opisial ti gobierno a mangikamkampania ket iparangarangda ti kinaawan ti kinadisente ti panagserbida.

Namin-adun a nagsagrap kadagiti nagasang a kritisismo ni Uson kas nangato nga opisial ti PCOO a nadutokan iti saadna kas panagsubad ti Presidente iti suportana idi kampania uray no saan koma a mayanatup iti kualipikasionna.  Anak ti mararaem a pamilia iti Dagupan City ni Uson. Sigud a Regional Trial Court Judge ti amana, ken pediatrician a doktora ti inana. Nagturpos iti kurso a Medical Technology ken inrugina ti Medicine iti University of Santo Tomas, ngem nagsardeng gapu iti iseserrekna iti show business. Nasurok a maysa a million dagiti follower-na iti social media a nangikampaniaanna idi ken ni Duterte, a maysa kadagiti gapu ti nakadutokanna idi a kameng ti Movie and Television Review Board sakbay iti agdama nga akemna iti PCOO.

Rebbengna a maarisit koma a nasayaat dagiti agakem a nangato nga opisial ti gobierno tapno saanda a tubeng kadagiti nasayaat a plano ti administrasion, ken saan a masayang ti pondo a nagtaud iti buis dagiti Pilipino. #

Comments are closed.