Footer

Sir Jaybert (Maikadua a paset)

Agkulibagtong, kunak gayam itay. Wen, talaga a diak patien dayta aglalo no kunaenda a nabuyogan iti napudno nga ayat. Panagkulibagtong ti rikna no kasta nga umbiendak dagiti ampiang, mabalin pay. Ngem awan ti kabuyogna a panangipateg. Normal a panagkulibagtong ti rikna. Kas iti kinanormal ti panagalipaga ti rikna ti babai ken lalaki no agdennes ti bagida.

Ngem nabalbaliwan daytoy a pammatik (nga ammok nga itay pay rugrugi, impatom la ketdi a kastoy ti tarayen dagiti pasamak) idi adda kabarbaro a kaduami a titser ditoy Cabaybay West National High School, iti ili iti dayaen ti nakayanakak.

Ni Ma’am Joelyn ti kayatko a sawen. Duapulo ket uppatna laeng. Naggapu iti kabangibangmi nga ili iti laud. Gapu ta saan a nakastrek a dagus, intarapnosna ti nangala iti National Certificate-na iti TESDA. Daytoy ti nagpangalanna a nakaala iti item iti SHS ditoy pagisursuruak. Iti TVL (technical and vocational livelihood) isuna a pakaibagayan ti innalana a Foods iti TESDA.

Dua laeng nga strand ti ipapaay ti pagadalanmi kadagiti agturpos nga ubbingmi iti JHS — ti TVL ken GAS (general academic strand). Nasurok laeng a 300 amin nga ubbingmi iti JHS ken SHS. Bassit.

Kalalainganna ti kapudaw ni Ma’am Joelyn. 5’1” ti tayagna (nakitak iti impasana a dokumento). Iti rupa ken bagbagi, adda panagkakaarngida ken ni Sanya Lopez. Napudaw dagiti kumpleto a ngipenna ken umabot iti bukotna dagiti nakataytayengteng ti ngisitna a buokna. Nasam-it ti panagis-isemna a lumtawan ti sawsaway a kallidna.

Ti la unay nagtilmonak idi damo nga aldawna a nagreport iti pagadalan, isu ti nasabang a patongna ken ti nakarit a barukongna­– a normal san nga umuna a miraen ti maysa a lalaki iti babai no kasta a damoda ti agkita wenno agam-ammo, uray pay maysa a propesional dayta a lalaki. Isu a pagkunkunaak a normalak pay laeng iti baet ti edadko.

Mimmimistroan ngem kadaydi a panawen, nagalikuteg ketdin ti panunotko. Naimbag ta sinipatnak manen ti kasigudko nga anghel.

Ngem ti diak malipatan, isu ti inggiteb ti bangir a pispisko: isu ti asawaemon. Gundawaymo daytan a makaasawa metten uray ta nakitam a “single” ti status-na.

A tinubngar ti bangir a pispis: uray ket no SINGLE no NOT AVAILABLE, lodde’!

Piman!

Aklonek, nakayawanak iti pintas ni Ma’am Joelyn—iti dayta damo a pannakakitak kenkuana! Dina la ngata magustuan ti panagkakaingasmi iti Nailian a Bannuar gapu iti bisngayko a kas kadagiti ladawan daytoy kadagiti libro? 5’4” ti tayagko, kalalainganna iti kapudaw, apagisu laeng a pammagi ngem madlawen ti panagdakkel ti boksit. Nalabit, gapu iti pagaayatko a kape.  No apay a di bumassit ket nariturak met iti trabaho. Ta nupay agisursuroak, adda sangadakulapan a bangkag a mulamulaak iti nagduduma a natnateng. Naimbag la a pangalaan iti sidaen.

Wen, ni Ma’am Joelyn ti nakadadaelan ti pammatik iti love at first sight!

Ngem diak impadpadlaw kadagiti kakaduami iti pagadalan a nganngani adiek amin ida iti bilangmi a sangapulo ket siam. Tallo laeng dagiti in-inauna ngem siak— da Sir Nardex, Ma’am Vida ken Ma’am Rona nga apaglabesda a kaurenta.

Ti makadakes, no kaano pay a nagkaedadak, isu ketdin ti iruruar ti taramidong iti makanawan a pingpingko.

Ayat a di sumngaw…/Ilemmengmo… ‘ta rupam lumtaw/ Taramidong…

Kasla kanayon nga umaw-aweng kadagiti lapayagko dayta a kanta a limmatak idi agad-adalak pay iti hayskul.

Kinantiawandak la ngarud dagiti kakaduami.

“In-love ni Sir Jaybert?” ni Ma’am Dianne ti immuna a nakadlaw iti taramidongko.

“Dakes kadi?” insungbatko. Madama nga agmeriendakami ta agkasangay ni Sir Nardex. Nagpaluto iti pansit ken ni Ma’am Mary Anne nga eksperto iti kosina. Addakami amin iti office.

“Di kad’ nasayaat ta agsimpa metten,” inyisem ni Sir Omar a prinsipalmi. In-inauna iti innem a tawen ngem siak.  “Malikudanen ti biahe.”

A nagkakatawaanda.

“I-push mo na ‘yan, sir,” uray la nagkulot ti timek ni Sir Leo. Iti kaaaplayna iti no ania la ditan a pagpapudaw, kasla naukisanen a bawang ti rupana. Ti pakakatawaak iti nalimed, kaskasdi a nangisit dagiti sikona. Sumagpaten a tallopulona. Dakkel ti panagkakaingasda ken ni Terry Onor a komediante.

“Asino kadi ti nagasat, sir?” inamad ni Ma’am Lanie a kaabayko iti lamisaan. Dumnaak iti makanigid a bakrang ti office.

“Maammuanyonto latta,” kinunak lattan. Ngem inrantak nga insagud ti panagkitak ken ni Ma’am Joelyn a nakapuesto iti likudan ni Ma’am Lanie. Napakulibagtong manen ti pusok iti panagsabat dagiti imatangmi. Inisemak a sinubadanna met iti nasam-it nga isem.

Madlaw a mababain latta ni Ma’am Joelyn. Agdua bulannanton iti pagadalanmi. Ngem kasla saan pay a naka-adjust.

Maikutak la koma dagita nga isem, inyalikuteg manen ti isipko.

Ngem papananna, aya, no napaguska iti tarigagaymo, kasla naikatos pay.

Sinukisokko a dagus ti facebook account ni Ma’am Joelyn idi damona iti pagadalan. Saanak a narigatan. Nag-friend request-ak. Ngem saanna nga in-accept.

Nalabit, natakkaban ti rekuesko, kinunkunak iti bagik. Ginasgasut ket ngata dagiti mayat a makigayyem kenkuana iti FB. Ket saanen a mabalin pay nga ag-accept ta nadanonnan ti limit ti gayyemna?

Wenno saannak a kayat a gayyem iti FB? Wenno adda nalimed a mangiparparit iti pannakigayyemna kadagiti lallaki?

“ANIA dayta pakakumikomam, sir?” diak napakpakadaan ti itatakder ni Ma’am Joelyn iti abay ti lamisaanko a pangdumdumogak iti netbukko. Huwebes idi a bakantek iti maikadua a period iti malem. Duakami la a nabati iti opisinami. Adda klase dagiti kaduami. Nakiseminar ken adda rinantada iti Division dagiti dadduma.

Diak nakasungbat a dagus ta nabaludak ketdin iti nasam-it nga isemna. Ti panagkulibagtong ti rikna, adda manen a simmangbay. Namrayak lattan nga iniseman.

“Ilokano met dayta, sir…” intudona ti iskrin ti netbukko.

“A, e… wen!” kinunak. “Ilepleppasko man daytoy entry-k a sarita.”

“Sarita?” ad-addan a rimmimat dagiti matana. Ginuyodna ti monoblock a tugaw ni Ma’am Lanie ket inabaynak.

Nagadiwara ti banglona ket kasla agtatapawak iti ulep iti panagriknak. Amaya!

“Wen, man, ma’am. Ikamakamko ket ngannganin agngudo ti pakisalipak.”

“Mannuratka gayam, sir,” kinunana a bulonna pinalabsan ti adda iti iskrin.

“Agbibisin a mannurat, kunam, ma’am,” inyisemko.

“Maipanggep sa met iti pamilia ti temam, sir?”

“Aglalaok, ma’am. Diak ngarud ammo no pagturongan daytoy sursuratek ta adu met ti sumsumrek ita iti panunotko. Kasla diak masurot ti kayatko a suraten…”

“Alla, basaekto man ngarud ‘ton malpas, sir.”

“Pakaidayawak, a, ma’am, no mayanusmo a basaen. Ken nasayaat man nga agpayso ta sikanto ti umuna a mangkritik.”

“Ni sir met! Para basaak la’ng…”

“Amman, ma’am, urayek ti makunamto. Apagisu ta Literature ti isursurom iti English a nayon a subject-mo.”

“Agpameriendaka pay ngarud, a, tapno ikritikkonto,” impallilitna.

Kunam pay, kasla kasalun-at ti kabbukar a sabong ti dragon fruit ti riknak nga agtatapaw iti dayta a gundaway. Napanak nangala iti inumenmi ken saggaysami a biskuit.

Daydi ti nangrugian ti kinadekketmi ken ni Ma’am Joelyn.

Korni, kunkunak iti nakemko no kasta a makasalawak (iti FB) kadagiti agtutubo nga agkunkuna a maris-rosas ti aglawlawda gapu ken ayat. Ngem napungtil manen dayta a pammatik gapu ken Ma’am Joelyn.

(ADDA TULOYNA)

Comments are closed.