Footer

Brgy Amguid, Candon City. Photo by Eden A. Alviar.

BANNER NEWS: Biktima ti didigra sadiay Brgy. Amguid, Candon City, tultulongan ti gobierno ken pribado a sektor

CANDON CITY – Naminsan pay a napaneknekan kabayatan ti napalabas a napaut a nepnep nga iti sango dagiti pannubok ken didigra a pinataud ti napaut a tudo ket adu latta dagiti institusion ken tattao a sumaranay.

Napaneknekan daytoy a panagtulong dagiti kameng ti nasurok a 40 a pamilia a nagbalin a biktima ti panagpababa ti daga sadiay Zone II, Brgy. Amguid, Candon City a nakadadaelan dagiti adu a pagtaengan. Nadadael pay dagiti kalsada, ken nagduduma a pasdek, ken talon gapu iti panagrissuod wenno panagpababa ti daga iti dayta a nangato ken Daya a paset ti Candon City.  Nagpaingen dagiti agindeg kadagiti natalged a lugar, kadagiti pagtaengan dagiti kakabagianda ken iti evacuation center.

Nadaras a naipaay ti pakauna a tulong kadagiti biktima ti didigra sadiay Brgy. Amguid babaen ti Candon City Government iti liderato ni Mayor Ericson Singson. Nangidanon metten ti pakauna a tulong ti Provincial Government babaen ken ni Gov. Ryan Singson. Indanon metten ti pakauna a saranay ti Caritas Nueva Segovia ken Parokia ni San Juan Sahagun manipud iti Simbaan Katolika. Nangipaay payen dagiti nagduduma a grupo ken institusion ti nagduduma a tulong kadagiti biktima ti didigra. Manamnama pay ti tulong nga aggapu iti National Government ta naidatagen ti problema iti Office of the President.  Gapu iti agtultuloy a tudo, agkasapulan latta dagiti biktima iti nayon a tulong.

Naamuan iti report a gapu iti napaut a nepnep a sinipsip ti daga ket nagruka ti paset ti Brgy. Amguid a nanggubuay ti panagpababa, panagreggaay ken panagrekka ti daga a nakadadaelan dagiti pagtaengan, kalsada ken dadduma pay a pasilidad ken imprastraktura. Mapattapatta a nasurok a P100 Million ti pateg dagiti sanikua a nadadael gapu iti napasamak a didigra.

Naammuan a maibasar iti panagamiris ti Mines and Geoscience Bureau ti Department of Environment and Natural Resources, maibilang a danger zone ti lugar a karaman iti agarup 200 nga ektaria a napeggad ken maipawil a pagnaedan.

Impakaammo ni Amguid Barangay Chairman Hermenigildo del Rosario nga adda latta dagiti sumagmamano a nabati nga agbambantay kadagiti pagtaengan gapu ta saanda a mapanawan dagiti napateg a sanikuada, ngem kaaduannan dagiti nagpaing kadagiti natalged a lugar.  Imbalakaden ti City Government ken MGB ti permanent relocation dagiti agindeg iti dayta a lugar gapu ta napeggad ti kasasaad ti daga.

Manamnama ti pannakayakar ti pagnaedan wenno permanent relocation dagiti agindeg iti danger zone iti Brgy. Amguid tapno natalged ti kasasaad dagiti agnaed iti dayta a lugar.  Manamnama met ti tulong ti gobierno para ti pannakabangon dagiti akaran a balay dagiti biktima ti didigra iti Brgy. Amguid.

Iti mainaig a damag maipapan iti epekto ti nepnep ket nagrussuod ti paset ti kataltalonan sadiay Brgy. Alincaoeg, Santa Lucia, Ilocos Sur, a nakaperdian ti talon ken dagiti mula a pagay. Maibasar iti pakauna a report manipud ti Provincial Agricultural Office, dumanon iti nasurok a P3 Million dagiti mula a nadadael gapu iti napaut a tudo iti intero a probinsia. (Eden Alviar)

, , , ,

Comments are closed.