Footer

Kasasaad dagiti eropuerto iti Pilipinas

NAKALALAAD a reputasion ti Pilipinas iti benneg ti panagbiahe, komersio ken turismo ti napaut a pannakataktak dagiti adu nga international and local flights dagiti eroplano nga agrubuat ken agdisso iti Ninoy Aquino International Airport gapu iti kapaut a naikkat iti naglabes iti runway ken nailumlon a Xiamen Airlines.

Naglabes iti runway ken nailumlon iti daga ti Xiamen Air Boeing 737 – 800 series a naggapu iti China ken addaan iti 165 a pasahero iti panagdissona iti NAIA kabayatan ti panagtudtudona idi rabii ti Agosto 17, 2018. Natalged dagiti amin a pasahero, ngem ti dakesna ket ti nakaro a pannakataktak dagiti tumayab ken agdisso koma nga eroplano iti eropuerto. Adu kadagiti incoming flights ti nagdisson sadiay Clark International Airport. Naitantan metten dagiti biahe nga agrubuat iti NAIA.

Nagpaut iti nasurok a 36 nga oras a naikkat ti nailumlom nga eroplano. Nagupa pay ti Manila International Airport Authority iti telescopic crane a nangingato ken nangipakni ti eroplano. Nagangayanna, reprep dagiti narurod ken nataktak iti biahena a pasahero sadiay Terminal 1 iti las-ud ti dua nga aldaw gapu ta napaut a naikkat ti nailumlom a Xiamen Airlines. Kalpasan ti sumagmamano nga aldaw, saan pay a naisubli dagiti regular flights schedules ket adu a pasahero dagiti nataktak ti panagbiahena pakairamanan dagiti rinibu a negosiante, turista ken dagiti Overseas Filipino Workers a naladaw ti panag-report-da kadagiti trabaho ken employer-da.

Nagkas-ang dayta a pagteng a nabayag a pannakaikkat ti nailumlon nga eroplano a nagbalin a tubeng iti main runway ti kangrunaan nga international airport ti Pilipinas a parupa ti pagilian iti lubong. Ipaneknek daytoy ti kinaawan ti contingency plan ken kinaawan ti panagsagana ti MIAA kadagiti kasta a kellaat ken emergency a pagteng. Kangrunaan nga international airport, ngem awanan gayam ti dadakkel a crane a mangalut-ot kadagiti mailumlom nga eroplano. Kasapulan pay a nagupada iti crane iti pribado a kompania. Agasem ti dandani dua nga aldaw a kapaut ti pannakaalut-ot ken pannakaipakni ti eroplano.

Impakaammo ni MIAA General Manager Ed Monreal a pagmultaenda ti Xiamen Airlines iti saan a nababbaba ngem P15 Million gapu iti insangbay ti eroplanoda iti eropuerto. Agasem ti P4 Million laeng ti panagupada iti crane.

Adu dagiti nataktak a pasahero dagiti marurod iti insidente nangruna ta dagiti paglugananda nga airlines ket saanda ida a naikkan iti naan-anay a tulong ken suporta kas ti libre a taraon, mainum ken pagyanan gapu ta saan a basol dagiti kompania ti pannakataktak ti biahe dagiti eroplano. Nataktak la ngaruden dagiti pasahero, nanayonan pay ti gastosda gapu iti pagbiag ken nagnaedanda kabayatan ti panagpaprosesoda manen kadagiti biaheda. Saan a maliklikan dagiti nataktak a pasahero a pabasolen ti gobierno ken ti management ti eropuerto ti kinakapuyda a mangsolbar kadagiti kasta a problema a tungpa iti agdama nga administrasion.

Ipampanakkel ni Department of Transportation and Communication Arthur Tugade ti gannuatda a mangpamoderno kadagiti pasilidad ken alikamen dagiti eropuerto iti pagilian. Nagadu dagiti proyekto nga inyusuat ti departamentoda a pannakapadur-as dagiti pasilidad dagiti eropuerto iti Pilipinas. Ngem away pay gayam ti moderno a crane ti MIAA. Pappapanan ngarud dagiti nagadu a nayalokar a pondo para ti pannakapadur-as dagiti alikamen dagiti eropuerto?

Nagkas-ang a padas ti impaay ti nailumlom nga eroplano iti main runway ti NAIA ta ipakitana a dagiti mangidadaulo iti MIAA ken ti DOTr ket saanda nga ammo dagiti prioridad a kasapulan ti ahensiada ken ti NAIA. Kadagiti naglabas a tawen, addan dagiti umasping a pagteng, addan dagiti eroplano a naglabes iti runway iti panagdissoda iti eropuerto. Ngem apay a saan a nakasagana ti NAIA iti daytoy kaudian nga insidente?

Ti kaudian nga insidente iti NAIA ket mantia iti nabiit pay a pammadayaw a nagun-od ti eropuerto ken impaay ti Skytrax World Airport Awards para iti Agosto 2017 agingga itay Pebrero 2018 a “one of the ten most improved airports in the world.” Maipalagip a kadagiti naglabas a dekada ket nairaman ti NAIA a maysa kadagiti kadaksan nga eropuerto iti lubong. Inkagumaan dagiti naglabas ken agdama nga administrasion a mapadur-as ti eropuerto tapno ad-adda pay a makaawis ti Pilipinas iti panagdur-as ti komersio ken turismo

Kas kangrunaan nga eropuerto ti Pilipinas, rumbeng a ti NAIA ket kanayon a nakasagana kadagiti kellaat ken dakes a pagteng tapno saan a nakaro a maapektaran ti panagdisso ken panagtayab dagiti eroplano. Dayta nga eropuerto ti rupa ti pagilian iti intero a lubong. No dakes ti padas dagiti ganggannaet nga agbambaniaga wenno nalaad a paliiwda ket dadaelanna ti imahe ti pagilian iti sangalubongan.

Kabayatan ti panagsagsagana ti Pilipinas iti possible nga idadateng ti “Big One” wenno ti napigsa a ginggined iti Metro Manila ken kabangibangna a probinsia, rebbengna a mapatibker dagiti pasilidad ti NAIA ken mapadur-as ken makompleto dagiti alikamen tapno saan a mapadagsen ti epekto ti didigra, ta iti eropuerto ti kadarasan a pakaiserkan dagiti ayuda wenno tulong nga aggapu kadagiti sabali a lugar nangruna dagiti taga sabali a pagilian. Ania a klase ti panagsagsagana ti gobierno iti napigsa a ginggined no awan pay gayam ti madadaan a crane a mausar no panawen iti didigra.

Saanto koman a maulit pay ti nakabaybayag a pannakaipakni iti runway ti NAIA ti nailumlom nga eroplano gapu ti kinaawan iti alikamen. Panawenen a padur-asen a namimpinsan dagiti pasilidad ken alikamen dagiti eropuerto para ti panagprogreso ti negosio, turismo ken seguridad dagiti tattao.   (Eden Alviar)

Comments are closed.