Footer

Ni Ester, ni Sabas, ken ni Gina Lou (Maikadua a paset)

Adda iti kasta a kasasaad idi sumangpet ni Gina Lou a naggapu iti eskuela. Sinabat ni Manang Ester ket inarakupna iti nairut banag a ngimmatuan ti kiday ti balasang. Kadawyan ngamin ni Gina Lou ti agmano no sumangpet daytoy ngem saan nga arakupen ti inana.

“Apay, Inang?” dinamagna.

Nagwingiwing ni Manang Ester. Pinerrengna ti anakna. “Awan, Anakko.” Inirutanna manen ti arakupna. Siak ti kakaisuna a sarikedkedmo, anakko. Ikarik nga awan pulos mangsagid kenka. No kasapulan nga isakripisiok ti bagik, aramidek, kinunana iti unegna. Immanges iti nauneg ta dina pinalubosan ti agayus koma a sainnek iti suli dagiti matana.

APAGKARAYAM laeng iti kudil ti lamiis iti dayta a nasapa a rabii ngem saan a makaturog ni Manang Ester. Agballikid, agdata sa no kuan agtugaw iti iking ti katre ket pamrayanna a kitaen ti nadaeg a Ladawan. Sa isaruno ti panunot ken pusona ti dumawat iti kired, pigsa ken kaasi.

Nakatugaw ita. Tinaliawna ti asawana a narnekan iti turog. Kapigsada ngamin nga agisagana iti talon ta dandanin masekka dagiti bunubonda. Nauyos ti maysa nga anges iti unegna ket sinarapa dagiti dakulapna ti mugingna. An’a daytoy a mapaspasamak kaniak? Dinamagna iti unegna.

Tinaliawna manen ti asawana. Iti idiar daytoy a mangisakad iti panagbiagda, awan a pulos uray puling a pangabakan ti ipabpabasol ti panunot ni Manang Ester kenkuana. Agalas-singko pay laeng iti bigat mangisasaangen daytoy. Inton makaisaang, isarunonanto met a punnuen ti panakkelen a baldi iti paginnawan ken iti banio ta nalawagto metten. Kalpasanna, agbalsig iti kayo santo mapan agsangat iti sigay wenno iskrin a pagala iti tilapia. Sangatenna met la dagitoy iti malem.

Kinapudnona, maas-asian ni Manang Ester iti lakayna. Isu nga unaanna no kua daytoy nga agriing iti bigat. Wenno saan ket ibaganan iti rabii pay laeng nga isunto ti mangisaang iti bigat tapno iladladaw bassit ti asawana ti agriing.

Awan met pagkunaanna iti talon. Nalaing nga agipamuspusan. Pakananna nga umuna kadagiti itik ni Manong Jojo dagiti kinelleng sakbay a paraepanna. Kalpasan a maraepan dagitoy anusannanton a pidutan iti bisukol isu kano pay a mainutda ti igatangda koma iti agas a pagpatay iti bisukol, adda payen sidaenda. Adu pay dagiti mulana iti arubayan. Agkarpintero wenno agmason no kasta a nalpasen ti panagraraep. Kinapudnona, agsobsobra ti maapitda iti maysa a panagani a para kaanda iti makatawen. Isu a daydi nagdiding iti tabla ken nagatep iti labig a binangon daydi Manong Loreto, nagbalinen a semento ti diding ken sim ti atepna. Malagip la unay ni Manang Ester a kayatna idi a brown glass koma met ti tawada ngem kinuna ni Sabas a jalousie lattan. Ta no ar-arigen ket agpadada kano met laeng. Nalaklaka pay. Ket ni lakayna ti napatuloy.

Manen, nagidda ni Manang Ester. Kayatna koma nga irakus ti kanawanna iti asawana ngem inggawid ti bangir a panunotna. Saan a rason ti kinasingpet ken kinagaget ti maysa a tao tapno dina maaramid ti agbasol. Kunada ngarud a kas iti kaadu ti darat ti sulisog ni Satanas.

Ngem apay ngamin a pagatapanna ni lakayna? Adda pammabasol iti unegna. Ipakpakitana laeng a nakurang ti panagtalekna ken lakayna iti dayta nga ar-aramidenna. Ngem uray no napigsa ti panagtalekmo iti asawam no nalaing a mangilimed iti aramidna, insupiat ti bangir a panunot ni Manang Ester. Kasayaatan met la dita ket saan a perdien ti panagtalek ti tunggal maysa.

Nauyos manen ti maysa a nauneg nga anges.

NALPASEN ti panaggagapas idi ipakada ni Manong Sabas a kumuyog kada Manong Abe a kumparina iti konstraksion. Idiay kano Bulacan ti destinoda. Mapandanto kanon inton maminsan nga aldaw. Dagus nga adda immuli iti isip ni Manang Ester. Kitaenna man no kalbitento ni lakayna iti umuna a rabii ti sangpetna. Ta no saan, pudno la ketdi.

“Maituredmo kadi ti umadayo, lakay?” insintir ni Manang Ester.

“Basta pagsayaatan ti pamiliak aramidek, baket.” Kasla la ket ngarud natungpa ni Manang Ester. “Uray ta makabulan pay saakto agisagana iti talon.”

Sumagmamano a segundo sa napasubli ni Manang Ester ti dati a riknana.

“Palubosanka, lakay, ta ammok a para kadatayo ti papanam.” Uray kaskasano ket adda liday a nayurit iti rupa ni Manang Ester. “Idawdawatko laeng a dika koma agar-aramid iti madi, a, sadiay.”

“Dika agdanag, baket, napalawlawan.” Inyangaw ni Manong Sabas. Di ammo ni Manang Ester no apay a bimtak ti iisemanna.

MAKALAWASEN ni Manong Sabas idiay Bulacan. Makalawas metten a palplaiiwen ni Manang Ester ni Gina Lou ngem awan met laengen ti madlawna a sabali iti anakna. Awan nadlawna a kasla koma adda napateg nga ibaga ti anakna a dina mairugrugi nga ibaga. Pinaliiwna pay daytoy iti agsapa. Ngem awan pagilasinan a nadlawna. Sapay koma ta saan met la a pumudno ti atapko, kinunana iti nakemna.

Napan pinasiar ni Manang Ester ni Manang Minnang a kumarina.

“Urnosem ngamin, a, ‘ta bagim, Mari,” kinuna ni Manang Minnang. “agpaseksika tapno saan a mauma ni lakaymo kenka.” Pinasarunuanna iti ayek-ek. “Ubingta pay met iti tawenta a kuarenta. Hi-hi!”

“Amangan no ibagananto ketdi nga adda pagpappapintasak, Mari.” Insungbatna

“Saan a napintas a napintas ti kayatko a sawen, Mari. Agbadoka iti mangpaubing kenka ngem saan met a dagitay tube, a, wenno nakiting a palda wenno shorts.”

“Ket wen, a, Mari. Tapno magargari ni lakay, ania?” inyisem ni Manang Ester.

(ADDA TULOYNA)

Comments are closed.