Footer

SINURSURAN: Addaak iti drug watch list, kunam?

NO agkiriring ‘ta selponmo, sigurado a magagaranka a mangammo no asino ti umaw-awag. Agalo no saan a nakaponbuk ti numero. Aglalabbet a saludsod ti rumtab iti isip sakbay a sungbatan ti awag. Asino ngata daytoy? Ania ti ibagana?

Ngem kasanon no aggapu kadagiti otoridad ti awag? Kasanon no kastoy ti ibagbagana?

Sika ni Angkuan dela Cruz? Addaka iti drug watch list-mi ditoy PNP.

Ania ti ubraem? Agkutukot dagita tumeng? Philippine National Police daytan. Kanigid-kanawan dagiti maipadpadamag a maipatpatli gapu kadayta Oplan Tokhang. Uray idi Oplan Double Barrel.

Agrasonka? Ibagam a saanka nga agus-usar iti maiparit nga agas? Ngem patiendaka ngata? Wenno saankan a makasao?

Kayatmo a maikkat ti naganmo iti listaan?

Aglawag ti rupam. Asino met ti di mangayat iti dayta? Nagrigat ngata ti mairaman iti listaan. Mapaliiw amin a gunay. Agpeggad ti biag. Koma no adda kinapudnona dayta panagusar iti maiparit nga agas.

No kasta met laeng, masapul a mangitinnagka iti kuarta. Ipagnam iti money courier…Yagawam, dimo baybayagen…

Kagatem a dagus? Ngem kasanon no rinibu wenno riniwriw ti gatad a kiddawen ti umaw-awag? Pangalaam koma?

Ilakom ti kakaisuna a talon? Ti kakaisuna a bangkag? Ti kakaisuna a pagpaspasada? Ti kakaisuna a dingo a pagtalon?

Ta napipian ngem ti maipatli a dina oras!

No dika agtungpal, ammomon ti sumaruno a mapasamak…

Ay, ket sigurado a dumanum dagiti tumeng. Saan la ketdin nga agsusurot dagiti sumaruno nga aramidem. Nagpardaska ngatan nga iremediom ti masapul a kuarta!

Ngem agurayka. Sakbay nga agdanagka iti kasta unay, umangeska iti nauneg. Agpanunotka a naimbag. Nagusar, naglako, wenno adda kadi nga agpayso pakainaigam iti maiparit nga agas?

No awan, awan met ngarud ti pagdanagam. No met adda, saan a rumbeng a mamatika lattan iti dayta naawatmo a tawag, wenno text.

Ammom metten, uso itan ti panangloko iti pada a tao.

Ken kas kuna met laeng ti PNP! Ta saanda nga aramid dagita kakasta nga addang.

Ania ngarud dayta?

Nasaon, maysa a panangloko. Scam. Wen, kasta ti kuna ti PNP. Ar-aramaten kano itan dagiti managdakdakes ti kampaniada kontra iti maiparit nga agas tapno makabiktima dagitoy. Inayon pay ditan ti haytek a teknolohia tapno naparpardas ti panangbiktimada.

Isu a nasken a dika kumagat a dagus. Narigaten ti mabiktima. Ti kano aramidem, alaem ti numero ti timmawag. Agreportka iti polisia tapno makaaramidda kadagiti addang a mabalin a manglapped wenno mangrippuog kadagiti adda iti likudan daytoy baro manen a klase ti panangloko.

Awan ti siled ti kinatanga iti daytoy a banag. Ken panagkarangkang.

Saan a mamati a dagus.

Kas kuna met laeng ti PNP, no pudno nga adda iti drug watch list-da ti maysa nga umili, saanda a pulos nga aw-awagan daytoy.

Tokhangenda a dagus?

Ti la manen mapampanunotmo. Saan. I-surveillance-da daytoy. Agkalapda kadagiti ebidensia no pudno met laeng ti naidanon nga impormasion kadakuada.

Ken no pudno man, saanda a tawagan ti maseknan tapno dawatanda iti kuarta katukad ti pannakaikkat ti naganna iti listaan. Saanda a kasta. Addaanda iti dignidad. Saanda nga agpabpabayad wenno mabaybayadan.

Isu nga agatapka kanon no dawatandaka iti uray mano a gatad ti kuarta ti umaw-awag kenka. Sindikato daytan.

Idi kano pay laeng rugrugi ti Oplan Double Barrel ken Oplan Tokhang nga adda naawat ti PNP a report a kasta a modus. Isu a manipud idin, rinugiandan ti nagkalap kadagiti impormasion.

Kayatna a sawen, ar-aramidenda ti akemda a mangsalaknib kadatayo nga umili.

No ngarud awan ti maikaniwas nga ar-aramidem, apay koma nga agdanagka?

Ket no naitublakka man, bumangonka. Arakupem ti kinapudno. Awatem dagiti programa a mabalin a makatulong kenka iti panagbalbaliwmo.

PUDNO la unay a nasirib itan dagiti sindikato. Usarenda amin a pangalapkapan tapno makabiktimada. Awanen ti pilpilienda a pamuspusan, makaliksabda laeng iti dakkel. Wenno agkakuartada laeng nga awan ti bambannogda.

Kas maysa nga umili, akemtayo ti agbalin a naridam. No kasano ti panangsintirtayo kadagiti mapaspasamak iti aglawlaw, damdamag, no fake news wenno saan, kasta koma met kadagiti maaw-awattayo a mensahe iti ramittayo kangrunaan ti selpon. Wenno iti email.

Sumursurot met iti uso dagiti manglokloko. Adun dagiti nadamdamagtayo a modus nga inusarda ti selpon wenno internet tapno makabiktimada.

Ngem ita, daytoy panangusarda iti programa ti PNP, aklonentayo a ditayo pulos ninamnama. Asino ti makapanunot kadatayo nga umili a mausar a panglokoda kadatayo dayta a kampania?

Sumirsiribda, kasta itan dagiti managdakdakes.

A no pauditayo, paunaantayo kadakuada, mabalin nga agbalintayo a biktimada.

Daytoy baro a modus, kaarngi met laeng dagiti nagkakauna a pananglokloko. Kas iti daydi modus (nga agpapan ita ket maus-usar pay laeng) a tawagan wenno patulodandaka iti text nga ibagbagada a nangabakka iti pa-raffle iti kastoy wenno kasdiay nga organisasion wenno kompania. Tapno maalam, masapul a mangitinnagka iti kuarta tapno maiproseso daytoy ket maawatmo.

Idi damdamo daytoy, adu ti nabiktima. Iti rigat ti panagbiag, adu ti kimmagat a dagus. Agasem met ngamin dayta ginasut a ribu a pisos, nga umabot pay iti riwriw dagiti dadduma. Agpapan ita, kas nasaon, adda pay laeng daytoy a modus.

Kinapudnona ngarud, itoy a tawen, nakapamitloakon a nakaawat iti text a mangibagbaga a nangabak ti numero ti selponko.

Tinawagak ti nag-text. Dagus a simmungbat. Lalaki.

Nagin-iinosenteak. Imbagana a pudno a nangabakak. Tapno kano maalak, mangitinnagak iti gatad a pangiprosesona iti inabakko.

Kinunak met a bayadanna pay laeng ti magastos yantangay P850,000 ti ibagbagana ngainabakko. Kunak pay a kukuana lattan diay P845,000. Ipaw-itna laeng kaniak diay P5,000.

Ne, ay, nagreklamo. Ta isu metten ti maysaak. Hehe!

Diniretsokon a dinamag no apay a manglokloko.

Ang dami kasing nagpapaloko…kinuna sa iniddepnan ti selponna. Saanen a matawagan uray idi awagak manen.

Adu ti agpalpaloko, kunana.

Kayatna ngarud a sawen, adda met laeng kadatayo no agtultuloy daytoy a pananglokoda. No saantayo nga agpalpaloko, awan ngarud ti mabiktimada.

Apay ngamin a malokodatayo?

No arisiten a naimbag, gapu dayta iti arapaaptayo a makaruk-at iti rigat wenno makananam man laeng iti uray sangkabassit a nam-ay.

Ala, saan a dakes dayta nga arapaap. Ngem masapul a pagbannogan. Trabahuen. Saan a basta manabtuog lattan iti dakulap.

Ngarud, no adda maidiaya nga ‘imbag’, panunoten a nasayaat. Narigat ti mabiktima.

Iti baro a modus, maulit, masapul ti panangtimbeng iti bagi. Makikoordinar kadagiti pannakabagi ti linteg tapno mapungtil daytoy nga aramid dagiti mananggundaway.

Ala, saanka ngaruden a madandanagan. Ikagumaan ketdi ti agbiag a nadalus. #

No comments yet.

Leave a Reply

This site uses Akismet to reduce spam. Learn how your comment data is processed.