Footer

Gapu iti imon, lakay inespadana tricycle driver

SAN VICENTE, Ilocos Sur – Maysa a pannagbat ti napasamak idi Setiembre 19, 2018 sadiay San Vicente-Bantay Road. Nainaganan ti suspek a ni Pedro Rodillas Y Tabbada, 67, naasawaan, residente ti Brgy Pudoc, San Vicente, Ilocos Sur, ken ti biktima a ni Johnny Pilien y Pilien, 63, naasawaan, tricycle driver, residente ti Brgy. Quimarayan, Bantay, Ilocos Sur.

Segun iti inbestigasion, ginandat ni Rodillas a batoen ni Pilien idi nakitana a bimmaba iti tricycle ni Pilien ti nobia ni Rodillas nga agnagan iti Remy. Saan nga inkankano ti biktima ni Rodillas ket minanehona ti tricycle-na nga immadayo. Dina ammo a sinurot ni Rodillas a nagmotorsiklo. Idi nakadanon ti biktima iti nakapasamakan ti krimen tapno mangilugan iti baro a pasahero, impaigid ni Rodillas ti motorsiklona ket inasitganna ti biktima sana tinagbat iti iggemna nga espada. Natamaan ti abbong ti tricycle ni Pilien santo timmama iti makinkannigid nga abagana. Timmaray nga immadayo ni Piliem ngem kinamat ni Rodillas sana tinagbat manen. Sinarapa met ni Piliem a nakadunoran ti makinkannigid a dakulapna.

Naitaray ti biktima iti San Vicente Rural Heath Unit. Naarestar met ni Rodillas ket naipan iti San Vicente MPS. Mapapati nga imon ti motibo ti krimen. (Tawid News Team)