Footer

rice

ISur addaan naan-anay a supply ti bagas – NFA Branch Manager

BANTAY, Ilocos Sur – Adda naan-anay a supply ti bagas iti Ilocos Sur kalpasan ti iduduprak ni Bagyo Ompong iti Northern Luzon gapu ta agsangpeten dagiti imported a bagas nga inangkat ti National Food Authority manipud ballasiw-taaw a pagilian.

Dayta ti pinasingkedan ni Beverlyn Peralta, Branch Manager ti NFA iti Bantay, Ilocos Sur, kadagiti umili, ken kadagiti retailers, kalpasan ti kaadda ti panagamak dagiti taga-Ilocos Sur ti posible a panagkirang ti magatang a nalaka a bagas gapu ti kaadu dagiti mula a pagay a nadadael kabayatan ni Bagyo Ompong.

Pinasingkedan ni Ms. Peralta nga agsangpeten ti bagas manipud ballasiw-taaw ken maalanton ti alokasion ti probinsia, ken maiwaraston kadagiti retailers dagiti naituding nga alokasion. Impakaammona nga iti agdama ket adda pay laeng umanay a supply ti bagas kadagiti bodega ti NFA, ngem maikkan ti prioridad dagiti kasapulan para ti relief operations kadagiti biktima ni Bagyo Ompong.

Nagpalagip ti Manager kadagiti NFA licensed retailers ti panangsurotda kadagiti pagannurotan ti panaglako iti bagas nga agpatingga laeng iti lima kilo ti tunggal kustomer iti inaldaw ti mabalinda nga ilako. Nagballaag pay ti pannakaipaay ti tumutop a dusa kadagiti agisaysayangkat ti re-sacking kadagiti NFA rice ken ilakoda kas commercial rice iti nangatngato a presio. Iti agdama, mailaklako ti NFA rice iti P27/ P32/P34 ti kada kilo, nababbaba nga amang ngem dagiti regular a commercial rice.

Iti pannakiuman ti media kadagiti mannalon nga agmulmula iti pagay, naammuan a gapu ti kaadu dagiti nadadael a mulada ket manamnama a bassit dagiti maapitda a mabalin a gapu ti panagkirangto ti supply iti bagas, ken ngumina ti presio dagiti komersial a bagas. Impalgakda nga awan metten ti mailakoda kadagiti traders ta dagiti maapitda no adda man ket kurang pay a taraonda.

Maibasar iti report ti Provincial Disaster Risk Reduction Management Council ti Ilocos Sur, nasurok a P1.2 Billion ti gatad dagiti nadadael a mula a pagay iti intero a probinsia a kaaduanna ket dagiti nakadawan ken nakabagasen ken dandanin maapit, ngem pimmuraw ken narurosen ken ubbawen dagiti dawada. Kidkiddawen dagiti mannalon ti naan-anay a suporta ti gobierno kadakuada tapno makabangonda iti pannakadalebda iti didigra. (Eden Alviar)