Footer

Maysa ti natay, 1.5B pesos ti pateg dagiti dinadael ni Bagyo Ompong iti Ilocos Sur

VIGAN CITY – Maysa ti natay ken agarup 1.5 Billion ti pateg dagiti nadadael ken napukaw iti Ilocos Sur kabayatan ti iduduprak ni Bagyo Ompong iti intero nga Amianan a Luzon idi Setiembre 14, 2018.

Dayta ti nairakurak iti report ti Provincial Disaster Risk Reduction Management Office ken ni Governor Ryan Singson kabayatan ti naangay a post-calamity assessment conference a naangay iti Provincial Capitol idi Setiembre 18, 2018. Indauluan ni Gov. Singson ti komperensia a dinar-ayan dagiti opisial ti Provincial Government, PDRRMC, Philippine National Police, Social Welfare Office, ken dadduma pay nga opisial dagiti maseknan nga ahensia ti gobierno.

Naladingitan ni Gov. Singson ti kaadda ti natay kabayatan ti bagyo ta inkagumaan ti Provincial Government ti zero casualty wenno awan koma ti matay nga agbalin a biktima ni Bagyo Ompong. Malem pay laeng idi Setiembre 12, 2018, dua nga aldaw sakbay ti isasanglad ni Bagyo Ompong sadiay Baggao, Cagayan, ket nangipaulogen ti Gobernador iti Executive Order a nangsuspende iti klase iti amin a lebel, ken serrek kadagiti amin a pagtrabahuan iti publiko ken pribado a sektor iti intero nga Ilocos Sur tapno makapagsaganada iti idadateng ti napigsa a bagyo.

Sakbay ti idadateng ni Bagyo Ompong, binilin ni Gov. Singson ti PDRRMC, dagiti local government units, ken maseknan a government agencies ti panagsaganada iti bagyo. Naimandar ti pannakaipaing kadagiti natalged nga evacuation centers dagiti agindeg kadagiti napeggad a lugar nangruna dagiti agnaed kadagiti isla ken iti igid ti kabaybayan ken karayan, ken kadagiti kabambantayan a paset a posible a margay ti daga.  Napalagipan dagiti umili ti panagtudioda iti mandar ti gobierno, panagridam ken panagannadda iti iduduprak ti napigsa a bagyo tapno awan ti madangran wenno maisakripision a biag.

Iti laksid ti nasapa a panagsagana iti iduduprak ni Bagyo Ompong, natay ni Mauricio de la Rosa y Heraña, agtawen iti 82, naasawaan ken agnaed iti Brgy. Pila West, Santa Lucia, Ilocos Sur. Ti biktima ket natupakan iti sanga ti kayo ti manga a pukpukanenna idi madama ti napigsa nga angin ken tudo kabayatan ti Signal No. 3 ti kapigsana a bagyo iti Ilocos Sur. Naikamang nga addaan iti puot sadiay Razonable Candon Hospital babaen kadagiti rescuers ti Santa Lucia sakbay ti alas-10 iti bigat, ngem indeklarar ti doktor a nangatendar kenkuana idi alas-11:35 iti bigat.

Naipalaon pay iti PDDRRMC Report a napetsaan iti Setiembre 18, 2018 a pito dagiti nadangran a biktima ni Bagyo Ompong: dua sadiay Galimuyod, dua sadiay Nagbukel, maysa sadiay San Juan, tallo sadiay San Emilio, ken tallo sadiay Caoayan. Kaaduan kadakuada dagiti natupakan iti sanga ti kayo, ken dagiti naitayab a galba.

Maibasar pay iti dayta a report, agdagup iti 14,982 dagiti balay a nadadael kadagiti ili ken siudad iti Ilocos Sur. Kaaduan ti ili ti Santa Lucia nga addaan iti kadagupan a 2,454 a pagtaengan; 45 totally damaged ken 2,409 partially damaged. Maikadua ti Santo Domingo nga addaan iti kadagupan a 2,043; 64 ti totally damaged, ken 1,979 ti partially damaged. Maikatlo ti ili ti Santiago nga addaan iti 1,953 a balay; 47 totally damaged, ken 1,906 partially damaged.

Maikapat ti ili a Sinait nga addaan iti kadagupan a 1,778 a balay; 178 totally damaged, ken 1,600 partialy damaged. Maikalima ti ili ti San Esteban nga addan iti kadagupan a   1,409 a balay; dua ti totally damaged, ken 1,407 partially damaged. Maikanem ti ili ti San Juan nga addaan iti kadagupan a 1,045 a pagtaengan; 48 totally damaged, ken 997 partially damaged. Maikapito ti Caoayan nga addaan iti kadagupan a 960 a balay; 39 totally damaged, ken 921 partially damaged. Maikawalo ti ili ti Santa Catalina nga addaan iti kadagupan a 960 a pagtaengan; 24 totally damaged, ken 900 partially damaged.

Agdagup met iti P1,478,244,918.00 ti mapattapatta a balor dagiti nadadael iti benneg iti imprastraktura ken agrikultura kabayatan ti iduduprak ni Bagyo Ompong. Dumanon iti P272,437.578 dagiti nadadael a
government infrastructures pakairaman dagiti eskuela, kalsada, rangtay, covered court, river/sea wall ken dadduma pay nga imprastraktura.

Agdagup iti P1,205,807,340.00 iti benneg ti agrikultura ti gatad dagiti nadadael, kangrunaan ti pagay. Kangrunaan a napakaruan nga ili ken siudad ket Cabugao, Santa Lucia, Narvacan, Sinait, Magsingal, Nagbukel, Santo Domingo, Candon City, Vigan City ken San Vicente. Agdagup iti P5,083,929 dagiti nadadael a mula a natnateng; P4,754,386.00 iti livestocks wenno dinguen; ken P3,359,100.00 iti fisheries wenno piskaria.

Immandaren ni Gov. Singson ti panangideklarar ti Sangguniang Panlalawigan nga “under a state of calamity” ti Ilocos Sur, ken ti agtultuloy ti pannakaisayangkat ti relief operations kadagiti napakaruan a biktima, ken pannakaipaay ti tulong kadagiti mannalon. Nangipasa metten ti Sangguniang Panlalawigan iti liderato ni Vice Governor Jeremias Singson ti Resolution a mangkidkiddaw ti tulong ti nayon a tulong ti National Government para kadagiti biktima ni Bagyo Ompong iti Ilocos Sur. (Eden Alviar)