Footer

Panagkirang dagiti PUV iti Ilocos Sur, naidatag iti SP Transportation Committee

VIGAN CITY – Pannakaparigat ken panaglilinnetlet dagiti adu a pasahero kadagiti pampubliko a lugan gapu ti panagkurang dagiti public utility vehicles a pinataud ti napainget a pannakaipakat ti linteg ken ordinansa iti panagmaneho ti motorsiklo iti Ilocos Sur.

Dayta ti indatag dagiti kameng ti media ken ni Sangguniang Panlalawigan Member Mildred Elaydo, Chairperson ti Committee on Transportation kabayatan ti naangay a Dap-ayan Ilocos Sur iti Provincial Capitol.

Immuna nga impakaamo ni SPM Elaydo a nangrugin ti panagsitar ken panagtiliw dagiti kameng ti Task Force Bantay Kalsada kadagiti aglabsing iti linteg ti trapiko, ken kadagiti pagannurotan nga inyetnag ti Land Transportation Office, ken dagiti lokal nga ordinansa mainaig kadagiti pagallagadan dagiti demotor a lugan nga agtartaray kadagiti kalsada. Impakaammona nga adda agarup 105 a kameng ti Philippine National Police, dagiti lokal a traffic enforcers ti naikaan ti LTO deputation order a mangipakat kadagiti national laws ken local ordinances mainaig kadagiti de-makina a lugan.

Inlawlawag ni SPM Elaydo a kasapulan ti pannakasurot dagiti pagalagadan tapno maaddaan ti urnos ken kinatalged kadagiti kalsada. Impaganetgetna a nasken ti panagaruat ti tumutop a helmet dagiti agmotmotorsiklo tapno nataltalgedda no maaksidenteda ket maliklikan ti ipapatay. Impasagepsepna pay ti nainget a pannakaipawil dagiti ubbing ken menor de edad nga agmaneho, ken pannakarehistro dagiti lugan kas mayataday iti linteg.

Naidanon ken ni SPM Elaydo nga iti kellaat a pannakapainget a pannakaipakat dagiti pagannurotan ket saan a magabenan dagiti LTO office iti San Ildefonso, Ilocos Sur ken Candon City nga akomodaren dagiti adu nga agala iti lisensia ken agpabaro iti rehistro ti lugan, aglalo ta agkurang dagiti emission testing center a mang-testing ti asuk dagiti lugan, ket napilitan a mapan dagiti taga-Ilocos Sur kadagiti LTO office sadiay Bangued, Abra, Batac City ken Laoag City.

Naipakaammo pay ken ni SPM Elaydo ti sentimiento ti publiko nga iti kalaksidan dagiti adu a behikulo nga agdaldaliasat kadagiti kalsada, kas kadagiti 4-wheel vehiclex, ken PUV ket dagiti motorsiklo dagiti kaaduan a masitsitar ken matiltiliw.

Nayallawat pay ken ni SPM Elaydo a gapu ti napainget a pannakaipakat dagiti linteg iti kalsada nangruna dagiti agmotmotorsiklo, ket kellaat ti yaadu dagiti PUV commuters nangruna dagiti estudiante a sigud nga agmotmotorsiklo. Nailawlawag ti nakaro a pannakaparigat dagiti agluglugan kadagiti pampasahero a behikulo nangruna iti panawen ti panagtututdo, iti bigat ken malem manipud Lunes agingga iti Biernes. Naipaganetget a gapu ti kinakurang dagiti PUV ket adun dagiti maladladaw nga estudiante kadagiti klaseda. Naipakaammo ti panaglilinnetlet dagiti pasahero iti laksid a kaso dayta ti overloading dayta a mailabsing iti pagannurotan ti Land Transportation Franchising and Regulations Board,

Kiniddaw ni SPM Elaydo ti panagan-anus dagiti commuters ta saan pay a napatgan ti kiddawda iti LTFRB a nayon a prangkisa dagiti pampasahero a bus, jeep ken van nga agbiahe iti nadumaduma a rota iti Ilocos Sur tapno umadunton dagiti PUV a pagluganan dagiti pasahero. Impakaammona nga iti dayta nga aldaw ket adda dagiti operatiba ti LTFRB ngem masdaaw ta awan dagiti natiliwda a kolorum ken naglabsing iti pagannurotan. Inaklonna a mabalin a naammuan dagiti operator ken drayber, isu nga awan ti natiliw a PUV violators.

Impeksa ni SPM Elaydo nga adu dagiti maikawa ken maparigatan iti pannakapainget dagiti linteg iti kalsada, ken kiniddawna ti panagan-anus ken panagpasensia dagiti motorista ken commuters ta ti gakatna ket para ti sapasap a pagsayaatan. Kiniddawna met kadagiti naikkan ti LTO deputation order ti napudno a panangannongda kadagiti akemda, saan ketdi nga abusaren ken irurumenda dagiti sitaren wenno tiliwenda a motorista tapno agari ti disisplina kadagiti kalsada para iti natalged a panagdaliasat. (Eden Alviar)