Footer

Arsobispo Edmundo Madarang Abaya, pimmusay

VIGAN CITY – “DIOS ti kumuyog kenka, Arsobispo Edmundo Abaya iti panangisublimon ti biagmo iti Apo a Namarsua; malaglagipdakanto latta dagiti adu nga ayat a naipaaymo kadagiti tattao ditoy Arkidiosesis ti Nueva Segovia.”

Dayta ti nagkaykaysa a balikas ken karirikna dagiti adu a padi, relihiosa ken laygo iti Nueva Segovia iti ipupusay ni Arsobispo Emeritus Abaya iti tawenna a 89 gapu iti komplikasion ti sakit a ginubuay ti kinalakayna.

Pimmusay ni Abp. Abaya sadiay Cardinal Santos Medical Center, San Juan City, Metro Manila idi malem ti Setiembre 20, 2018.

Kalpasan ti pannakaimassayag ti bangkay ni Abp. Abaya sadiay parokia iti Candon City a nakaipasngayanna, ken iti Narvacan a nagserbianna, naipan sadiay Diocese of Laoag a nagserbianna nga obispo iti unos ti 20 a tawen. Naisubli ti bangkayna iti Ilocos Sur sadiay St. Paul Cathedral, Vigan City ken Palacio Arzobispado agingga iti pannakaipumpona iti museleo dagiti obispo iti katedral idi Oktobre 1, 2018.

Iti Misa ti pumpon, kinadua da Abp.  Marlo M. Peralta, Arsobispo Emeritus Ernesto A. Salgado, Nueva Segovia Auxiliary Bishop David William V. Antonio ken papadi ti arkidiosesis dagiti adu a sangaili nga obispo ken papadi a makikaysa iti Misa ti Pumpon ni Abp. Abaya.

Naipasngay ni Abp. Abaya idi Candon, Ilocos Sur idi Enero 19, 1929, kadagiti nagannak kenkuana a da Valentin Abaya ken Laura Madarang. Maikapat kadagiti lima a pimmusayen nga agkakabsat a da Leonilo, abogado; Arnulfo, inhiniero, Josepa, negosiante; Basilio, ken Antonio, nagpaay nga Officer-In-Charge Governor ti Ilocos Sur.

Nagturpos iti Elementaria sadiay St. Joseph Institute, Candon, eskuela Katolika a tartariwidwidan dagiti madre ti Sisters of. St. Paul of Chatres. Nagadal iti Sekundaria sadiay Immaculate Conception Minor Seminary. Nagturpos iti Philosophy ken Theology iti University of Santo Tomas Central Seminary. Naordenan a padi idi Marso 21, 1953. Inleppasna dagiti dua a post graduate studies iti Sacred Theology and Philosophy major in Political Science sadiay Pontificium Athenaeum Angelicum (Rome), ken sadiay Marquette University, Wisconsin, USA. Naordenan a maikatlo nga Obispo ti Laoag idi Enero 19, 1979 iti motto-na a “Cor Ardens Caritate.”

Sakbay ti panagbalinna nga Obispo ti Laoag, nagpaay kadagitoy a parokia ken institusion: St. Joseph Parish, Laoag, Ilocos Norte; St. Joseph Parish, Milwaukee, Wisconsin, USA; Sts. Cyrill and Methodius Parish, Milwaukee, Wisconsin, USA; Immaculate Conception Minor Seminary, Vigan; Sacred Heart Parish, Galimuyod; St. Lucy Parish, Narvacan; ken St. Paul Cathedral, Vigan.

Malaglagipto dagiti mamati iti Dios iti Diosesis ti Laoag ni Abp. Abaya gapu kadagiti adu a tulongna kadagiti marigrigat, napanglaw ken uray dagiti balud. Saanto met a malipatan dagiti taga-Nueva Segovia ni Abp. Abaya iti panangilungalongna iti pannakapadur-as dagiti catechetical programs, ken financial management ti arkidiosesis. Inlungalongna ti pannakapatakder ti Domus Patri Retirement Home dagiti retirado ken masaksakit a padi ti Nueva Segovia. Inyusuatna ti pannakapayupa dagiti sanikua ti Nueva Segovia kadagiti dadakkel a commercial companies tapno adda pangsuporta kadagiti pastoral programs ti arkidiosesis.

Ni Abp. Abaya ti maika-lima a nagserbi nga Arsobispo ti Nueva Segovia, manipud idi nagbalin nga arkidiosesis idi 1957. Immuna daydi Abp. Santiago Sancho (1957 – 1966); maikadua daydi Abp. Juan C. Sison (1981); maikatlo daydi   Abp. Jose T. Sanchez a nagbalin a Cardinal ken nagserbi sadiay Roma, Italia (1982 – 1985); maikapat ni Abp. Orlando B. Quevedo, OMI, a Cardinal itan ken Arsobispo ti Cotabato (1986 – 1999); maikalima ni Abp. Abaya (1999 – 2005); maikanem ni Abp. Salgado (2005 – 2013); ken maikapito ni Abp. Peralta (2014 agingga iti agdama).

Sakbay ti panagbalin ti Nueva Segovia nga arkidisosesis idi 1957, kas diosesis manipud idi 1595, addan nadutokan ken nagserbi a 32 nga obispo a kaaduanna ket dagiti Kastila a dinutokan ti Ari ti España ken insaad ti Santo Papa agingga idi 1902. Sakbay ti panagakem daydi Bp. Sancho idi 1957, tallo met nga Amerikano nga obispo dagiti nagserbi iti Nueva Segovia manipud idi 1903 nga adda iti kolonia ti Estados Unidos ti Pilipinas.

Ni Abp. Abaya ti umuna a taga-Ilocos Sur a nadutokan nga Arsobispo. Isuna ti umuna a Pilipino nga obispo a dinutokan daydi Papa Juan Pablo II a maysa itan a santo ti Simbaan Katolika. (Eden Alviar)