Footer

Hugpong ng Pagbabago ken BILEG Party, nagpinnirma iti aliansa iti Siudad ti Vigan

VIGAN CITY – Binisita ni Mayor Sara Duterte-Carpio, mayor ti Davao City ken Chairperson ti partido a Hugpong ng Pagbabago, ti siudad ti Vigan idi Setiembre 28 tapno makitaripnong kadagiti opisiales ti Ilocos Sur, Ilocos Norte ken Cagayan para iti pannakapatibker ti aliansa ti Hugpong Ng Pagbabago ken ti BILEG Party nga idauluan ni Governor Ryan Singson.

Kadua ni Mayor Carpio a bimmisita dagiti senatorial bets ti partidona a pakairamanan da Presidential Spokesman Harry Roque, Bureau of Corrections Chief Ronald (Bato) dela Rosa, Senador Cynthia Villar, Senador JV Ejercito, Congresswoman Pia Cayetano ti Taguig City, Congressman Zajid Mangudadatu ti Maguindanao 2nd District, ken ni Philip Salvador kas representante ni Special Assistant to the President Bong Go a saan a nakaatendar.

Sinarabo ida dagiti lokal nga opisiales nga indauluan da Ilocos Sur Governor Ryan Luis Singson, Ilocos Norte Governor Imee Marcos, Ilocos Sur Vice Governor Jeremias Singson, ken Ilocos Sur Representatives Eric Singson ti Segundo Distrito ti Ilocos Sur ken Rep. Deogracias Savellano (DV) Savellano ti Umuna a Dristrito ti Ilocos Sur.

Iti daytoy a taripnong a napasamak iti Vigan City Convention Center iti malem ti Setiembre 28, pormal a pinirmaan da Mayor Sara Duterte-Carpio, ti Hugpong ng Pagbabago, ken Gov. Ryan Luis Singson, Partido BILEG, ti alliance dagiti dua a nabileg a partido a naimatangan dagiti adu nga immatendar a miembro ti BILEG ken opisiales manipud iti nadakamat a tallo a probinsia ditoy Norte.

Maipalagip nga idi laeng Agosto 13 napagbalin met a pormal ti aliansa ti HNP ken Ilocano Timpuyog nga idauluan ni Imee Marcos.

Iti panagbitla ni Carpio, nagyaman kadagiti opisial ti Amianan a Luzon iti suportada iti amana a ni Presidente Rodrigo Duterte idi naudi a presidential election. Dinawatna ti panagtultuloy iti suportada para iti siam a senatorial candidates ti HNP iti umay a midterm elections. Sinaggaysa nga inyam-ammo ni Mayor Carpio dagiti kandidato ken inwaragawagna ti nasayaat a kababalin dagitoy. Sangkamaysa met a nagsao dagiti kandidato kalpasanda a maiyam-ammo.

Kalpasan ti panagpirma iti aliansa, indauluan ni Mayor Carpio ti oathtaking ti nasurok a 1000 a miembro ti BILEG Party.

Sakbay iti taripnong, binisita pay ni Mayor Carpio ti Caoayan, Ilocos Sur tapno mangited iti tulong kadagiti naapektaran iti Bagyo Ompong. (TNM)