Footer

Presio dagiti nateng, ngimmina; presio dagiti produkto, bantayan ti DTI

VIGAN CITY – Ngimmato a namimpinsan ti presio dagiti nagduduma a nateng a mailaklako iti daytoy a siudad ken kadagiti nagduduma a public market iti Ilocos Sur gapu kadagiti adu a nadadael a mula a nateng iti probinsia kabayatan ti iduduprak ni Bagyo Ompong.

Sakbay pay ti idadateng ni Bagyo Ompong idi Setiembre 15, 2018, ket nanginan ti presio dagiti nateng gapu ta adun dagiti nadadael kabayatan ti dandani makabulan a nepnep gapu iti habagat itay Agosto. Napakaro pay ti pannakadadael dagiti mula a nateng kalpasan ni Bagyo Ompong nga ad-adda a nangpangina ti presioda.

Kangrunaan a timmayok ti presiona ket dagiti nateng manipud Baguio City, Urdaneta City, Cagayan ken dadduma pay a probinsia a dinidigra ni Bagyo Ompong, gapu ti kinakurang ti supply dagiti nateng kadagiti pagtagilakuan.

Uray dagiti lokal nga apit a nateng iti Ilocos Sur ket timmayok ti presioda gapu ti kabassit ti supply ta adu dagiti nadadael kabayatan ti nepnep ken Bagyo Ompong.

Inrakurak ni Provincial Agriculturist kadagiti kameng ti media a nasurok a maysa a billion a pisos ti pateg dagiti nadadael bayat ni Bagyo Ompong, ken kasapulan ti pannakasaranay dagiti mannalon iti panagmulada kadagiti nagduduma a produkto nangruna dagiti nateng tapno mapaadu ti supply ken lumaka iti presio.

Impasingked metten ni Gov. Ryan Singson ti panangipaay ti Provincial Government iti tulong kadagiti mannalon nangruna dagiti nadadael ti mulana kabayatan ti iduduprak ni Bagyo Ompong. Impatalgedna ti pannakaiwaras dagiti libre a bin-i, abono ken dadduma pay a kasapulan iti panagtalon tapno mapalag-an ti kasasaadda. Impakaammona a saan pay a makaideklarar ti Provincial Government iti baro nga “under of the state of calamity” ti Ilocos Sur kalpasan ti iduduprak ni Bagyo Ompong ta saan pay a naggibus ti 60 nga aldaw a palabsen kalpasan ti pannakaideklarar ti probinsia iti kasta a kasasaad ti pannakadidigra kalpasan ti napaut a nepnep itay Agosto a nangdadael iti adu iti benneg ti agrikultura.

Kabayatanna, nagtataripnong dagiti opisial ti Department of Trade and Industry iti Ilocos Sur ken dagiti akinkukua kadagiti dadakkel a department stores ken groceries iti probinsia para ti pannakakontrol ti ingangato ti presio dagiti kangrunaan a magatgatang. Nagkari dagiti agtagikua kadagiti pagtagilakuan a kabayatan a ti probinsia ket adda iti state of calamity ket saanda nga ipangato ti presio dagiti tagilakoda. (Eden Alviar)