Footer

scam

Agannad kadagiti manangallilaw

Maysa met a panangallilaw kadagiti umili dagiti dadduma a networking. Nasken iti panagusisa, panangadal ti taray ti kompania a serkan iti networking sakbay a sumrek wenno agaplay dita. Amangan no maipada kadagiti nagsagaba a gapuanan dagiti manangallilaw a tattao; dagiti mangar-aramat ti networking para iti bukodda nga interest.

Ti networking ket maysa a marketing strategy a panangawis kadagiti agkameng iti kompania wenno grupo wenno ania la ditan a pangawag. Ngem iti agdadata a kinapudno ket maysa laeng daytoy a pyramiding scheme.

Ti pyramiding scheme ket kalpasan a nakabayad ti maysa a tao iti kompania simrekanna, agrekrut met daytoy kadagiti adu a tattao nga agbayad met iti kompania. Ket tunggal agbayad a marekrut adda ti pannakabagi ti immuna, nga isu iti awagan ti kompania a gain commissions wenno benepisio.  No ad-adu iti marekrut, ad-adu met laeng iti commission wenno benepisio.

Adda pay dagiti kompania agibaga iti libre a panagbakasion iti nalatak a bakasionan iti pagilian no diman iti ballasiw taaw. Kadagiti amin a naallilaw, ti panagbakasion iti ballasiw taaw iti kaadduan. Wenno saan, kas iti mabasa a linaon ti advertisingda, tsansa a makapan iti head office iti ballasiw taaw, a kaaduanna ket iti USA.

Ti kastoy nga aktibidad ket maiparit iti linteg babaen iti Article 52 of the Consumer Act of the Philippines ken iti dadduma pay a probision Securities Regulations Code. Maiparit, ngamin naibasar daytoy iti saan nga umno a representasion a dagiti amin a partisipante ket makaawat iti dibidendo wenno maisubli ken umadu iti intapogda a kuarta.

Ngem iti kaanoman, daydiay laeng immuna wenno maikadua iti makaawat ngem dinan mapidua iti agawat lalo no awanen iti marekrutna.

Isu a nasken iti panagannad. Sapulen dagiti sungbat dagitoy a saludsod sakbay a mangitapog iti kuarta no adda iti agrekrut:

Agbayadka kadi iti registration fee? Mano ti bayadam? Ti lehitimo a networking ket saan nga agpabayad iti registration fee. Ket saan a mapasamak iti panagrekrut iti sabali tapno laeng adda iti sukat ti intapog a kuarta ken ti benepisio a maawat. Kaaduanna ngamin a pyramiding operators ket nasken ti panagbayad nga umuna iti nakanginngina a registration fee.

Ania dagiti eksakto a linaon dayta a registration fee? Registration fee laeng wenno adda pay ti kalaokna a package? Wenno dayta a registration fee ket adda ti gatangem a maminggasut iti nginana ngem ti actual a presio? Kaadduan kadagiti pyramiding operators ket agpabayadda kadagiti partisipante no adda ti laokna a product package. Awan dumana daytoy iti marketing strategy dagiti dadduma a marketing firm nga agan-anunsio iti trabahao. A nasken nga aglakoka nga umuna iti produkto iti maminpullo nga amang iti actual a presio ti ilako sakbay a makastrekka nga empleado. Isu nga inkapilitan a gatangem ti produkto no dimo mailako, ta nangina met ngarud isu a dimo malako, ngem iti kaanoman dika makastrek ta agpatinggaka laeng iti interbiu ket saanen a maulit pay a makastrekka iti kompania lalo no daytoy ket imbagada a tawagandakanto.

Adalen a nalaing dagiti balikas dagiti mangumkumbinsir. Kas koma iti napakaeksklusibo la unay a produkto. Daydiay ibagada nga awan iti merkado dayta a produkto ta isuda laeng iti exclusive distributor wenno isuda laeng iti addaan iti karbengan wenno inikkan ti producer nga agilako. No daytoy ti ibagada, namnamaemon a maysa a pyramiding daytoy. Ngamin, iti lohika, awan iti producer wenno agparpartuat a saanna a yasideg dagiti produktona iti mismo a consumer, ta ti customer ti producer ket ti consumer a mismo a saan ket a dagita aginkukuna nga exclusive distributor. Daytoy ti maysa kadagiti kalatakan a pyramiding scheme a mapaspasamak. Pasaray pay aramatenda ti produkto a nalatak la unay iti merkado a kas pang-engganio kadagiti agitapog iti kuartana. Aramatenda ti balikas a kas EXCLUSIVE DISTRIBUTOR.

Ti kadi kinaadu ti marekrut iti pagibasaran ti pannakaala ti bonuses, incentives ken dadduma pay a benepisio? No wen, peke daytoy a networking company. Ti lehitimo a networking company ket maibasar ti incentives, commissions ken dadduma pay a benefits babaen iti kinaadu iti malakom a produkto. Ket no iti panaglakom ket agaramatka kadagiti sabali a tattao babaen iti panangitedmo ti kagudua wenno ad-adu pay wenno basbassit iti ania la ditan kadagiti awatem nga incentives, commissions ken other benefits iti kompania ket maysa a legal. Ta base ditoy ket ti malako a produkto a saan ket a kinaadu iti narekrut a tao. Daytoy ti diperensiada: ti kinadu ti malako a produkto isu ti legal, ket ti kinaadu ti marekrut a tao isu ti illegal.

Ngem ti kasayaatan iti amin ket sakbay a mangitapog iti kuarta, nasken a beripikaen nga umuna ti istatus ti kompania a serkan. Mapan nga umuna iti Department of Trade and Industries no rehistrado met laeng daytoy a kompania wenno saan. Wenno iti Securities and Exchange Commision no daytoy ket ibagbaga ti kompania a multi-billion wenno multi million corporation. #

,