Footer

Pinnolitika iti sango dagiti agsasaruno a didigra

AGRURUTAP dagiti mapaspasamak a didigra iti Pilipinas iti agdama a tiempo – napaut a nepnep, napigsa a bagyo, nakaro a layus, panagreggaay dagiti bantay, panagrissuod ti daga ken dadduma pay a natural a kalamidad. Amin dagitoy a didigra ket padagsenanna pay ti kasasaad dagiti adu nga agrigrigaten nga umili nangruna dagiti napanglaw ken awanan-gaway.

Agtultuloy met dagiti maibilang a didigra a gapuanan dagiti tattao kas ti nangato nga inflation rate wenno panagsuek ti balor ti piso. Agtultuloy a panagraira ti illegal a droga, krimen, riribuk ken terorismo kadagiti nagduduma a paset ti pagilian.

Iti sango dagiti adu a didigra, agtultuloy dagiti dakes a pasamak iti pagilian gapu iti awan-sarday a panagririri ken saan a panagkikinnaawatan dagiti nabutosan nga opisial ti pagilian a mangiturong koma kadagiti umili iti naurnos ken nakomportable a panagbiag kas inkarida iti naglabas nga eleksion.

Nagkas-ang dagiti agsasaruno a natural a didigra kadagiti nagduduma a lugar ti Pilipinas sakbay ti rugi ti panagipila iti certificate of candidacy dagiti agkandidato para iti May 13, 2019 National and Local Elections. Nagsagaba ti Luzon iti napaut a nepnep a nanglayus kadagiti adu a siudad ken probinsia. Dinuprak ni Bagyo Ompong ti Amianan a Luzon a nangapektar iti nasurok nga uppat a million a tattao. Napasamak ti panagreggaay kadagiti bantay sadiay Itogon, Benguet, ken Naga City, Cebu a nakatayan dagiti adu a tattao.

Iti sango dagitoy a mapaspasamak a didigra, agtultuloy ti nakaro a panagpipinnolitika dagiti opisial ti pagilian nangruna dagiti agpapaay iti nasional a gobierno. Imbes a maipamaysa dagiti relief operations a mangtulong kadagiti biktima ni Bagyo Ompong, pannakasaranay dagiti pamilia dagiti nagaburan iti panagreggaay sadiay Benguet ken Cebu, sabali dagiti kangrunaan a pakakumikoman dagiti nangato nga opisial ti gobierno a manggabur kadagiti kangrunaan nga isyu a mangparigat iti biag dagiti Pilipino.

Gapu iti naiparuar nga isyu ti Red October Destablization Plot kontra ken ni Presidente Rodrigo ken ti pannakayetnag ti warrant of arrest ni Senador Antonio Trillanes IV ket mayaw-awanen dagiti isyu dagiti timmayok a presio dagiti kangrunaan a produkto ken serbisio gapu iti nangato nga inflation rate ken nakaro a panagbuis, ti panangtulong kadagiti biktima ti bagyo, panagkurang iti supply ti bagas manipud iti National Food Authority, ti agtultuloy a pannakaipuslit iti adu a bulto ti illegal a droga kadagiti puerto, ken dagiti kurapsion iti nagduduma nga ahensia.

Imbutaktak ni Presidente Duterte nga agkukumplot nga agplanplano ti grupo dagiti miembro ti Armed Forces of the Philippines, dagiti kameng ti New People’s Army ken Liberal Party a mangpadisi kenkuana iti turay ita nga Oktobre. Ngem pinaglibakanen ti AFP, NPA ken ti LP ti pannakainaigda iti dayta a plano.

No man pay nakapagpiansan ni Senador Trillanes iti umuna a kasona a rebelion, agtaltalinaed pay laeng iti inaladan ti Senado ta agamak iti pannakaarestona, nangruna ket saan pay a naresolbar ti sabali a kasona a kudeta nga awanan-piansa. Nagasang met latta dagiti balikas ken kritisismona iti Presidente a patienna a ti pana-

ngibabawi ti Presidente iti amnestia a naipaay kenkuana idi panawen ni Presidente Benigno Aquino III ket maysa a wagas ti panagibales ken panangpastidiar kadagiti kalabanna iti politika, ken tapno mapaulimek dagiti kritikona iti oposision.

Gapu kadagitoy nga isyu, agtultuloy ti panagsisina dagiti opisial ti gobierno ken dagiti umili. Nabara ti sinnungbat dagiti pasurot ken kumanunong iti administrasion ken oposision iti social media kas kadagiti idoloda.

Panagaapa ken panagpipinniltak iti dakes nga aramid ti kangrunaan a pakakumikoman dagiti nangato nga opisial ti gobierno, imbes nga agtignayda a mangpalag-an iti kasasaad dagiti agtungtunglaben a Pilipino gapu ti kinangina dagiti magatgatang a pinakaro pay dagiti agsasaruno a a natural a kalamidad.

Kabayatan nga umas-asideg ti panagipila ti kandidatura dagiti agngayangay iti eleksion inton 2019, ket mapaliiw ti pinnadakes, pinnastidiar ken pinnasikat dagiti opisial ti nasional a gobierno tapno madlaw ida dagiti tattao. Kalpasan ti panangideklararen dagiti partido kadagiti posible a kandidatoda a para senador inton 2019, nakadkadlawen ti panagpasikat dagiti adu a politiko ta uray dagiti relief and rescue operations iti panawen ti kalamidad ket bianganda tapno aglatak ken itandudonto ida dagiti botante inton eleksion.

Madlawen ti pinniltak ken pinnasikat dagiti politiko iti lokal a gobierno ken kadagiti probinsia ken siudad iti ruar ti Metro Manila kas ipakpakita dagiti nakatugaw nga opisial ken aggandat nga agkandidato iti agdama a tiempo. Makita idan nga agiwaraswaras ti relief goods, ken agimanmando kadagiti rescue operations kababayatan dagiti naglabas a bagyo. Managpakitan iti media dagiti politiko a nabayag a saan a nangnangeg ken nagpakpakita kadagiti kailian wenno kaprobinsiaanda.

Nakadkadlaw met no saan nga agkadua ti kongresista, gobernador, mayor ken dagiti babaenda ta uray no panagiwaras iti tulong kadagiti biktima ti kalamidad ket agpipinnasikat ken agpipinnolitikada. Uray iti panagited kadagiti calamity reports a pagibasaran ti panangipaay iti tulong ket saanda a makapagkaykaysa tapno masaranay koma a nadaras dagiti biktima ti didigra.

Uray tinawen nga adu dagiti mapaspasamak a kalamidad iti Pilipinas iti naglabas, adu dagiti makadlaw ti panagsasaruno dagiti nakaro a didigra iti agdama a panawen kalpasan ti agtultuloy a pannakabarengbareng ti nagan ni Kristo a Dios dagiti kaaduan a Pilipino. Nagsakit a panunoten dagitoy a mapaspasamak iti pagilian nga iti sango dagiti trahedia ken panagrigat dagiti adu nga umili ket agtultuloy ti saan a panagkikinnaawatan dagiti nabutosan nga opisial a mangiturong koma kadagiti tattao iti nalinteg a dalan ken kinaimbag ta mabigbig ti Pilipinas a kangrunaan a Kristiano a nasion iti Asia a pagnaedan dagiti nasurok a 104 Million a tattao, a ti 90% ket Kristiano, ken nasurok nga 80% ket Katoliko. Apay a saan a maibiag dagiti kaaduan a Pilipino dagiti panursuro ni Kristo a panagiinnayat ken panagkakappia? Gapu ngata nga adda dagiti mangidaulo nga ipapanda a nalalaing ken nangatngatoda ngem ti Dios a pagrukbaban dagiti kaaduan a Pilipino? (EDEN ALVIAR)