Footer

election

Rugianen a tingitingen dagiti kandidato iti May 13, 2019 Elections

MAISAYANGKAT ita nga Oktobre 11 – 17, 2018 ti panangipila iti certificate of candidacy dagiti kandidato para iti National and Local Elections inton Mayo 13, 2018.

Kalpasan ti panagipila iti COC dagiti kandidato kadagiti opisina ti Commission on Elections, nasken a rugianen dagiti umili ken botante a tingitingen wenno amirisen a nasayaat ti kinatao, kababalin ken kabaelan dagiti agngayangay a papili tapno maisaad iti akem dagiti kapkapnekanda a kandidato ket saandanto nga agbabawi iti kamaudiananna no nagbiddutda iti binutosanda.

Uray adayo pay ti kampania, nasken a paliiwen ken amirisenen dagiti botante dagiti kandidato nangruna dagiti agngayangay para iti nasional a posision gapu ti kalawa ti Pilipinas ket saanda a makapan agkampania kadagiti amin nga ili, siudad ken probinsia, kas dagiti agsasalisal iti 12 puesto iti Senado, ken dagiti nominado para ti party-list representative iti House of Representatives. Uray pay dagiti kandidato a para district representative, ken dagiti amin a posision iti lokal a gobierno, ket saanda a personal a makampaniaan dagiti botante.

Iti panangtingiting dagiti botante kadagiti agkandidato, kasapulan ti silulukat ken managamiris a panagpampanunot ta iti panawen ti kampania ken eleksion ti pannakaipakat dagiti nagduduma a nasayaat ken dakes a taktika ken estratehia dagiti politiko tapno maallukoyda dagiti umili a mangsuporta wenno mangitandudo kadakuada. Iti daytoy a panawen ti panagraira dagiti pudno ken palso a damag a mangpapintas wenno mangdadael ti imahe dagiti kandidato.

Nabayagen a maus-usar ti mainstream media, kas ti telebision, radio, pagiwarnak ken magasin para ti pannakaital-o wenno panangdadael ti kandidatura. Agbayad dagiti makabael a kandidato iti political advertisement tapno mapabanglo ti kandidaturada. Daksanggasat dagiti napanglaw a kandidato a no man pay nasayaat ti kinataona ken makabael nga agserbi, ngem awan met ti pagbayadda iti political ads, ket saan a maam-ammo ida a nasayaat dagiti botante.

Ay-aywen wenno pasuksokan met dagiti politiko dagiti dadduma a kameng ti media tapno adda dagiti maipadamag a positibo a publisidad maipapan kadakuada. Nasken a dagiti botante ket saanda a dagus a patien dagiti mairakrakurak iti media ta adu dagiti parbo a nairanta a pangallilaw kadagiti tattao.

Iti agdama, nagrairan ti panagaramat ti social media iti internet para ti panagkampania nangruna kadagiti millennials wenno dagiti agtutubo ken agkabannuag. Idi 2016 National and Local Elections, napaliiwen ti kinaepektibo ti social media iti panangpasayaat ken panangdadael iti kandidatura.  Adu dagiti trolls ken palso nga accounts iti social media a naisangrat a mangpasayaat ken mangdadael iti kandidatura.

Nagduduma met dagiti maisaysayangkat a subvey a mangipakita ti ranko wenno puesto ti kandidato. Ngem adda dagiti survey groups a mabayadan a dagiti iparuarda nga umun-una kadagiti surbey ket dagiti nagpasuksok kadakuada. Ipaneknek dayta a saan amin a surbey kadagiti naglabas nga eleksion ket pimmudno dagiti resultana. No dadduma, maisayangkat dagiti surbey kas pagbasaran dagiti botante ta adda dagiti maimpluensiaan wenno mapasurot iti kapanunotan iti sabali iti panagpili kadagiti kandidato.

Iti agdama, addan dagiti maisaysayangkat a pakauna a surbey maipapan kadagiti sumrek iti Top 12 para iti 2019 Senatorial Election. Nakastrek dagiti kaaduan nga incumbent wenno reelectionists, malaksid iti maysa nga adu dagiti nagapuananna para ti sapasap a pagimbagan dagiti umili. Nakastrek pay iti Top 12 dagiti dadduma a nalatak a personalidad, ngem mapagduduaan met ti kinatao ken kabaelanda.

Nasagraduan nga akem dagiti umili ti panangipakatda iti “right of suffrage” a naipalaon kadagiti naglabas a Pamunganayan Linteg ken iti 1987 Constitution tapno pilien dagiti umili dagiti tumutop a mangidaulo ti gobierno ti pagilian. Ngem manipud pay idi punganay agingga ita, saan a nakapili dagiti Pilipino kadagiti lider ti gobierno a napudno ken nasamay ti panagserbida kas ipaneknek ti agdama a narigat a kasasaad ti panagbiag iti pagilian. Adun nga eleksion dagiti naglabas, adun a nasasam-it a balikas ken kari ti inibbatan dagiti politiko, ngem ania ti napasamak kalpasan ti pannakaisaadda iti akem?

Idi panawen ti kampania idi 2016 Elections, saan kadi a nagkari ni Presidente Rodrigo Duterte nga iti las-ud iti tallo agingga iti innem a bulan ket gibusanna ti illegal a droga ken krimen, parmekenna ti kurapsion, ken pagbalinenna a komportable ti panagbiag dagiti umili. Maguduanton ti terminona, ngem ania dagiti mapaspasamak iti Pilipinas?

Iti panagpili kadagiti kandidato para district representative, ken dagiti amin a posision iti lokal a gobierno, nagasat dagiti botante nga adda pagpilianna a kandidato ta iti naglabas nga eleksion ket adu nga ili, probinsia ken siudad dagiti awan ti nagbabalubal a kandidato. Saan amin a kaso nga awan kinabalubalna ket gapu ta awan ti mayat a makisalisal iti tunggal maysa ta adu ti nagapuanan wenno nasayaat ti panagturay ti maysa a kandidato, ngem adu dagiti sumango koma a naareglo wenno nabutbuteng tapno agbabawida.

Nakasaysayang dagiti naglabas nga eleksion iti Pilipinas ta adu a botante dagiti saan a nangusar dayta a gundaway ken kalinteganda nga agpili kadagiti tumutop a makawesan iti turay, adda pay dagiti botante a napurar iti sileng ti pirak wenno nangisukat iti pabor iti karbengan ken opurtunidad a maaddaan ti pagilian kadagiti napudno nga opisial a mangiturong kadagiti umili iti kinalinteg ken nagin-awa a panagbiag. #