Footer

Red October

Pudno ngata ti Red October Plot?

PUDNO wenno saan ti Red October Ouster Plot, ti plano a panagtignay ita a bulan ti Oktobre dagiti nagduduma a grupo iti pagilian tapno mapadisi iti turay ni Presidente Rodrigo Duterte?

Immuna nga inrakurak ni Presidente Duterte kadagiti kameng ti media ti maipapan iti Red October Plot a nangibutaktakanna a nagkukomplot dagiti rebelde a komunista, makinkanigid a grupo, kadagiti kameng ti Armed Forces of the Philippines, makaamarilio wenno dilawan (maris a simbolo ti Liberal Party) ken dadduma pay a grupo a sumusupiat iti administrasion. Impeksa ti Presidente ti sakit ti nakemna kadagiti dadduma a militar ti pannakikumplotda kadagiti rebelde a komunista, nga iti laksid ti napalaus a suportana iti AFP ken kadagiti soldado, ket makikakaiddada kadagiti kabusor.

Immuna a kinompirmaran ni Brig. Gen. Antonio Parlade, AFP Deputy Chief for Operations, ti kinapudno ti Red October Plot. Inrakurakna nga inurnos dayta a plano ni Jose Maria Sison, Founding Chairman ti Communist Party of the Philippines, ken dagiti lider lider ti progresibo a grupo, ken nayusuat idi Setiembre 21, 2018 a maika-46 nga anibersario ti pannakaideklarar ti Martial Law iti Pilipinas, ngem saan a nagballigi ti gannuat. Imbutaktakna a dagiti komunista ken nakitulag kadagiti kameng ti Tindig Pilipinas, grupo dagiti komonkontra iti pannakaidadanes dagiti umili, ken pakairamanan dagiti kameng ti Liberal Party a nakaikappengan ni Vice President Leni Robredo, ken ti Magdalo Party a pagmiembruan ni Senador Antonio Trillanes IV. Impakaamona a nagbabawi ti Tindig Pilipinas a makikaysa iti Red October Plot idi naammuanna a dagiti komunista ti nangurnos iti plano.

Impalgak ni Parlade nga agtultuloy ti plano ita nga Oktobre a pannakarambak iti lubong nangruna sadiay Europa iti bulan ti komunismo ken dagiti katutubo a tattao.

Sinupiat ni Vice Pres. Robredo ti pammabasol a kakumplot isuna iti plano a mangrippuog iti turay. Binabalawna dagiti mangiramraman kenkuana iti dayta a plano a polpolitkaenda ti AFP. Impasingkedna a saanna a kanunongan ti amin a wagas a mangsukat iti turay a saan a mayanatup iti 1987 Constitution a sinapataanna a dependeran.

Kinontra met ni Senador Trillanes ken ti Magdalo Party ti alegasion a karamanda iti Red October Plot. Impatalgedda a saandanto a pulos a makikumplot iti New People’s Army agingga nga agtultuloy ti pannakiranget wenno panagpatayda kadagiti soldado.

Tinagibaba met ni Senate Minority Floorleader Senador Franklin Drilon, opisial ti Liberal Party, ti kinapudno ti Red October Plot a mangpadisi iti Presidente iti turay. Impalgakna a ti plano a mangpatakias ken ni Duterte ket maulit-uliten a pammabasol a kasla dadael a plaka. Inrakurakna a ti plano ket naadaw iti pantasia a libro ti nalatak a mannurat a nobelista a ni Tom Clancy a napauluan iti “Hunt for Red October.”

Iti Senate hearing iti pondo ti AFP, inabsuelto ni AFP Chief of Staff General Carlito Galvez ti pannakainaig ti Liberal Party idi pagsaludsodan ni Senador Francis Pangilinan. Impalgakna nga awan ti “coalition” dagiti komunista ken LP.

Immunan nga impasingked ti AFP nga awan ti grupo dagiti militar nga agplanplano a mangrippuog iti panagturay ni Duterte. Impatalgedda saandanto a pulos a makikumplot iti uray ania a grupo a mangsukat iti turay babaen iti wagas a saan a mayanatup iti Konstitusion.

Adu nga umili dagiti agdudua iti kinapudno ti Red October Plot dagiti rebelde a komunista a panggepna a padisien ti agdama nga administrasion. Agduma ngamin ti ibagbaga ti Presidente ken dagiti nangato nga opisial ti AFP. Inakusaran ti Presidente a nakikumplot kadagiti komunista dagiti dadduma a kameng ti AFP ken Liberal Party. Ngem sinupiat dayta nga alegasion ti AFP Chief of Staff.

Iti pakasaritaan ti Pilipinas, saan a nagballigi dagiti plano a nangpadisi iti turay no awan ti puersa ken pannakitimpuyog ti AFP – kas idi napadisi daydi Presidente Ferdinand Marcos idi Pebrero 25, 1986, kabayatan ti umuna nga EDSA People Power Revolution, ken ni Presidente Joseph Estrada iti Enero 21, 2001 kabayatan ti maikadua nga EDSA People Power Revolution. Napasamak dagiti pito a kudeta idi panawen ni Presidente Corazon Aquino, ken namindua a gandat idi tiempo ni Presidente Gloria Macapagal Arroyo, ngem napaayda gapu ta awan ti naan-anay a suporta ti AFP kadagiti nangidaulo ti tignay a nangpadisi kadakuada iti turay.

Iti laksid ti adu a suporta ti Presidente iti AFP, ken panangingatona iti sueldo ken panangpaaduna kadagiti benepisio dagiti soldado, saanna a magemgeman ti sibubukel nga armada a puersa. Dayta ti kapanunotan ni Senador Panfilo Lacson, nagturpos iti Philippine Military Academy, sigud a Hepe ti Philippine National Police idi panawen ni Presidente Estrada, ken sigud nga opisial ti nawara a Philippine Constabulary.

Pudno ti paliiw ni Senador Lacson ta uray no napalaus dagiti ipapaay a suporta ti administrasion iti AFP nangruna kadagiti alikamen, sueldo ken benepisioda. Ngem saan amin a militar ket naan-anay a makontrol ti Presidente kas Commander-In-Chief, kas mayataday iti “Chain of Command.” Iti AFP, adda la ketdi dagiti saan a kumanong kadagiti addang ken pagtaktakderan ti administrasion mainaig iti posision ti gobierno iti West Philippine Sea a sinakupen ti China dagiti dadduma a paset ti teritorio ti Pilipinas; ti pannakisinged ti Presidente iti China ken Russia ken panagangkat kadagiti alikamen ken armas kadagitoy a pagilian; ken ti nabaaw a pannakilangen ti administrasion iti Estados Unidos iti Amerika a nabayagen a kaaliado ti Pilipinas.

Saan a mailibak nga adu a senior and junior commissioned officers ti AFP dagiti nagturpos kadagiti US military academies. Adu a heneral dagiti nagsanay ken nagturpos kadagiti post graduate ken specialization courses kadagiti nagduduma a US defense and military schools. Uray dagiti non-commisioned officers, adu kadakuada dagiti naibaon a nagsanay kadagiti US military schools. Adu la ketdi kadagitoy ti saan nga umanamong kadagiti defense and security policies ti agdama nga administrasion.

Nagballaagen ni Senador Gregorio Honasan, sigud nga Army Colonel ken lider ti Reform the Armed Forces Movement a nangiyusuat ti panagrebelde idi Pebrero 22 – 25, 1986 a nangpadisi ken ni Presidente Marcos, ken lider dagiti napaay a nadara a kudeta idi panawen ni Presidente Corazon Aquino, a saan koman a maulit dagiti pasamak iti naglabas a nagalsa dagiti militar, babaen iti pannakasolbar dagiti adu a problema iti pagilian.

No pudno ti Red October Plot, ket naka-red alert status koman ita nga Oktobre dagiti amin a kampo ken tropa ti Armed Forces of the Philippines, ken dagiti Philippine National Police tapno nakasaganada nga agtignay a manglapped no adda dagiti tumaud a riribuk.

Mababbabalaw ti administrasion iti kontrobersia ti Red October Plot ta no pudno dayta a plano ken adda naan-anay nga ebidensia, apay a saan a pinatiliw ti Presidente dagiti opisial ti gobierno ken pribado a tattao nga adda iti likudan dayta a plano?  Wenno ti Red October Plot ket nairakurak laeng a wagas ti pangiyaw-awan iti atension dagiti umili nga agtungtunglaben iti rigat gapu ti kinangato ti presio dagiti kangrunaan a magatgatang gapu kadagiti biddut nga addang ti administrasion? #