P16-M pategna a mula a marihuana, naparut, napuoran

 

SUGPON, llocos Sur – Sabali pay a plantasion ti marihuana ti rinaut dagiti polis iti pagbeddengan daytoy nga ili ken ti Benguet sada pinarut ken pinuoran tallo nga aldaw sakbay ti Paskua.

Idi sardam ti Disiembre 22, maysa nga operasion ti insayangkat dagiti joint elements ti Sugpon Municipal Police Station, Ilocos Sur Provincial Anti-Illegal Drugs Special Operation Task Group (PAIDSOTG), Ilocos Sur Police Public Safety Company (ISPPSC), nga indauluan ni Police Supt. Cornelio Paltoki Comila, PInsp. Apollo de Leon Calimlim, ken PInsp. Reynaldo Mendoza, Jr. babaen ti superbision ni OIC PSSupt. Noel Baguitan Amoyen, DSC, ken iti koordinasion ti PDEA RO1 iti nagbeddengan ti Barangay Licungan, Sugpon, Ilocos Sur ken Kibungan, Benguet a nagtungpal ti pannakaduktalda iti walo nga agkakaapiring a plantasion t marihuana nga aganay a 7,700 metro kuadrado ti kalawada amin.

Pinarut dagiti polis ti 74,4000  kapuon ti fully grown a mula a marihuana, ken agdagup iti 18,000 a seedlings a mapattapatta nga agpateg amin iti P15,618,000.00, sada pinuoran.

Sumagmamano kabungkos ti nasao a mula ti impan dagiti rimmaut iti provincial police office kas ebidensia iti operasion.

Nupay awan ti natiliw dagiti polis a mangbambantay kadagiti plantasion, mangiwaywayatda iti follow-up nga inbestigasion tapno maammuan ti kinaasino dagiti mangtartaraken kadagiti maiparparit a mula.#