23 biktima iti illegal recruitment, nakaawidda met laeng iti ilida.

VIGAN CITY – Duapulo a biktima iti illegal a panagrekrut ti nakasubli met laeng iti lugarda babaen ti tulong ti opisina ni Governor Luis “Chavit” Singson ken ni Congressman Ryan Singson.

Napalalo a yaman dagiti biktima kadagiti dua nga agtuturay iti probinsia gapu ta nakaawidda met laeng manipud iti kaunasan sadiay Batangas a nagtrabahuanda kalpasan ti panangallilaw kadakuada dagiti dua a kalugaranda met laeng.

Iti pannakaisurat daytoy, nakaawiden da Erwin Tangonan, Premitivo Rosete, Elbren Tangonan, Kenette Suoc, Belprin Savellano, Francisco Guzman, Redelio Guzman, Lilly Savellano, Leymar Mata, John Paul Madrin.a,Rowel Ancheta, Arbie Ancheta, Roland Tangonan, Cristine Tangonan, Lheymar Mata, Bryan Tangonan, Jhonny Tangonan, Imelda Barcanse, Cecille Umbrero, Eddie Mar Tangonan, Magdaleno Arconado ken Mariano Barcanse.

Naggapu dagiti biktima iti Magsingal, Cabugao ken Sinait, Ilocos Sur ken Badoc, Ilocos Norte.

Kanaig daytoy, indagadag ni Governor Luis “Chavit” kadagiti kalugaranna a saanda nga agtalek unay kadagiti tattao a mangiyaw-awis iti trabaho ken kasapulan ti panangberipikada nga umuna no lehitimo dagitoy nga agrekrut iti trabahador tapno maliklikan ti panagbalinda a biktima.

Segun iti pannakangiwat ti grupo a ni Eddie Mar Tangonan, ginuyugoy ida ti kalugaranda a da Marino Timplanza ken Avelino Gonzales alias Inoc tapno mapanda agtrabaho iti kaunasan iti Lipa City, Batangas.

Innayon ni Tangonan a naay-ayoda a napan nagtrabaho iti nadakamat a kaunasan  agsipud iti pammatalged dagiti dua a kalugaranda a dakkel ti awatenda a sueldo a maalada kada lawas.

Segun ken ni Tangonan, kasungani met ti napasamak kadakuada ta mapan met laeng a P60-P120 laeng ti maawat ti tunggal maysa a sueldona iti kada lawas ket di pay umanay nga igatangda iti kasapulanda agingga iti awanen ti kanenda.

Kinontak ni Tangonan ni Barangay Captain Blayne Guzman ti Magsaysay, Sinait ket nagpatulongda tapno makaawidda.

Nakikoordinar ni Guzman iti opisina da Gov. Chavit Singson ken Cong. Ryan Singson ket dagus a nagtignay dagitoy tapno makasubli dagiti biktima iti naggapuanda nga ili. (Karaman ti report ni Mancielito S. Tacadena)