23 motorista, natiliw iti implementasion ti “no plate, no travel policy” iti Tagudin

TAGUDIN, Ilocos Sur – Duapulo ket tallo a tattao ti tiniliw dagiti polis  iti nagsaruno nga aldaw a panangiyimplementarda iti ordinansa a mangibilbilin iti panagaramat amin a motorista iti helmet no agdaliasatda ditoy nga ili.

Pito a motorista ti tiniliw dagiti polis iti sanguanan ti Tagudin Yellow public Market idi Disiembre 5 idinto a 16 ti tiniliwda iti national highway a sakup ti Barangay Las-ud idi Disiembre 6 bayat ti panangipakatda iti “no helmet, no travel policy” kas sagudayen ti Municipal Ordinance No. 2 series of 2008.

Karaman dagiti natiliw idi Disiembre 5 da Alvina Silapan, 25, residente iti Barangay Pudoc West; Luison Dauz, 51, taga-Barangay Dardarat; Edgar Dauz, 33; Felipa Tejada, 59; ken
Victor Carreon, 28, agpapada a residente iti Barangay Las-ud; ken Elizer Aupac, 19, residente iti Barangay Anaan, Alilem, Ilocos Sur.

Nainaganan met dagiti natiliw idi Disiembre 6 a da Crizan Laranang, 25, taga-Quirino; Michael Villanueva, 30, taga-Barangay Libtong; Dante Bayuga, 40, taga-Barangay Tallonen; maysa a Ferdinand a taga-Barangay Las-ud; Margie Bandolin, 38, taga-Barangay Dardarat; ken Juan Munez, 66,  taga-Barangay Las-ud; Sebastian Domaoan, 35, taga-Lidlidda; Robin D. Cuello, 27, taga-Barangay Pattiqui, Sta Cruz; Jem Marquez, 34, taga-Sta. Lucia; Winston Sario, 29, taga-Sta. Cruz; Ramonito Lazaga, taga-Barangay Poblacion, Suyo; Roderick Peralta, 28, taga-Barangay Paras, Candon City; Roderick Abuey, 27, taga-Salcedo; Julius Sacla, 33, taga-Barangay Poblacion, Suyo; Diomel, taga-Balaoan, La Union ken Nemir Versola, 53, taga-Luna, La Union.

Naruk-atan met laeng dagiti lugan dagiti natiliw kalpasan ti panagmultada.

Naipasa ti nasao nga ordinansa ditoy gapu iti pammaliiw nga adu dagiti matmatay iti aksidente a nakainbolbaran ti lugan agsipud ta saan a nagaruat iti helmet dagiti biktima bayat ti panagdaliasatda nangruna iti national highway.

Uray iti Candon City, maipakpakat met ti no helmet, no travel kadagiti motorista nga agdaliasat iti kalsada a sakup daytoy siudad.

Ngem iti Vigan City, saan pay a naakkal ti pammilin ni Gov. Luis “Chavit” Singson a pannakaiparit ti panagaramat iti helmet iti sanguanan ti kapaliiwan nga ar-aramaten dagiti kriminal daytoy a pangilinged iti kinasiasino iti panangisayangkatda iti krimen iti siudad.

Nagramut ti pammilin idi nagudas ti maysa a barangay captain  iti mismo nga abagatan ti provincial capitol ken iti baet nga oras ti panaggaawid dagiti empleado.

Maysa pay a polis ti nagudas iti nasao a pammapatay nga insayangkat dagiti di am-ammo a kriminal a riding in tandem.#