SAN FERNANDO CITY – Duapulo ket tallo a pagpatrolia a lugan ti inwaras
ti police regional office ditoy kadagiti napili a police stations iti
rehion tapno manayonan ti agdama a luganda para iti isayangkatda a
preventive patrol ken visibility operations kadagiti lugar a
responsibilidadda, daytoy ti impakaammo ni Regional Director Police
Chief Supt. Romeo C. Hilomen.

Kinuna ni Hilomen a paset dagiti sasakayan ti procurement program ti PNP tapno maitag-ay ti “move, shoot, communicate and investigate” a kapabilidadna para iti panagbalin dagiti amin nga estasion ti polis iti nadumaduma rehion ti pagilian  a “fighting units” maikontra iti kriminalidad, insurhensia ken terorismo.

Naiwaras ti 16 a Toyota Hi-Lux 4×2 Patrol Jeep kadagiti police stations dagiti nadumaduma nga ili a pakairamanan ti Adams, Carassi, Bangui, Burgos, ken Vintar,  iti Ilocos Norte; Burgos, Galimuyod, Santiago, ken Banayoyo iti Ilocos Sur; Balaoan, Burgos, Tubao, and Bangar iti La Union ken Alcala, Malasiqui ken Umingan iti Pangasinan.

Naited  ti 5 a Toyota Altis Patrol car kadagiti police stations ti Badoc ken Pagudpud iti Ilocos Norte; San Emilio, iti Ilocos Sur, Agoo, iti La Union ken Bolinao, iti Pangasinan.

Naiyawat met ti 2 a 200cc Honda Motor Cycle para iti police stations ti Dumalneg, Ilocos Norte ken Bagulin, La Union.

Kanaig daytoy, imbilin ni Hilomen kadagiti amin a police units iti rehion a mangiwayat iti naing-inget a panagpatrolia ken madagdagus a panagresponde kadagiti tawag  nga agpatulong ti polis.#