23 sako a gold ore, nasukainan dagiti polis a naikarga iti lugan

CERVANTES, Ilocos Sur –  Tallo sako a gold ore ti nasukainan dagiti polis a karga ti maysa a lugan sadiay Barangay Rosario ditoy nga ili idi malem ti Oktubre 8.

Segun iti report manipud iti polis ditoy, idi agarup 4:00 ti malem ti nadakamat nga aldaw, nakaawat dagiti polis iti impormasion manipud ti maysa a concerned citizen mainaig iti maysa a Green Hilux Toyota a naggapu iti Barangay Patiacan, Quirino, Ilocos Sur ken nagkarga kadagiti gold ore ti nakaparking iti sango ti balay dagiti ag-Abaya iti Barangay Rosario, ditoy nga ili.

Nagturong iti nadakamat a lugar da PO1 Tiri ken maysa a Sgt. Felix Tulagan y Estrada, kameng ti Philippine Army, CMO Batallion a naidestino iti Cervantes ket inasitganda ti drayber a nabigbig iti nagan a Joseph Alcantara y Ogay, 43, naasawaan, ken residente iti Barangay Patiacan, Quirino, Ilocos Sur.

Kalpasan ti panagpabigbig dagiti polis, kiniddawda ti pammalubos ti drayber a mangkita iti karga ti lugan ket naduktalanda ti 23 a sako ti gold ore a narunawen.

Sinapul dagiti polis ken ni Alcantara no adda Ore Travel Permit (OTP) wenno otoridadna a mangibiahe iti gold ore ngem awan ti maipakitana isu a pinakaammuanda daytoy iti kalinteganna ken iti panaglabsingna iti Anti-Illegal Mining Act.

Mapapati a bimmallaet ni Jonas Abaya sana imbugkaw kadagiti polis: “Apay nga sitsitarem ngay dayta customer mi agsarita ka lang ti nasayaat a laglag, kasubsublim lang a pulis kasla ka sigsiguron, no kayat mo ikatem ta paltog mo ta agboksing ta laglag.”

Nagtungpal dayta iti nabara nga argumentoda ken ni Tiri ket kalpasanna, pimmanawen dagiti pannakabagi ti linteg.

Inreport ni Tiri ti napasamak iti officer in charge ket inimbitaran daytoy ti akinkukua a mapan iti police station agraman ti lugan para iti maikanatad a disposision ken dokumentasion.

Iti pannakaisurat daytoy, agtultuloy ti inbestigasion.#