SAN JUAN, La Union – Nasurok a dua a gasut ket tallupulo a kappisa a pawikan ti naibulos iti kabaybayan ti Ili Norte, ditoy nga ili idi Enero 22, daytoy ti naammuan manipud iti coordinator ti Coastal Underwater Resource Management Action a nakabase iti nadakamat a barangay.
Segun ken ni Regine Tibong, coordinator ti Coastal Underwater Resource Management Action, imbulosda ti 237 a pawikan a maawagan Olive Ridley iti kabaybayan kalpasan a napissaanda iti hatchery.
Agdagupen iti aganay a 1,500 nga itlog ti pawikan ti napissaan iti nasao a hatchery ken naibulos iti kabaybayan.
Kinuna ni Tibong a mapattapatta nga adda pay nasurok a 10 a nagitlogan dagiti pawikan a manamnama nga agpissa kadagiti sumarsaruno nga aldaw.#