Banner News: 240 HIV positive iti Ilocos Sur; 1400 cases ti teenage pregnancy — SPM Jimboy Singson | Tawid News Magazine - Weekly Ilocos News 📰

240 HIV positive iti Ilocos Sur; 1400 cases ti teenage pregnancy — SPM Jimboy Singson

VIGAN CITY — Dumanonen iti 240 dagiti positibo iti Human Immune-defficiency Virus (HIV) iti Ilocos Sur; ken 1400 ti kaso dagiti nagsikog a balasitang wenno teenage pregnancy, ken lima dagiti nagpakamatay wenno suicide cases ita a tawen. 

Dagitoy nga impormasion ti inrakurak ni Sangguniang Panlalawigan Member Jaime “Jimboy” Singson, Chairman ti Committee on Health, kadagiti kameng ti media kabayatan ti naangay a media fellowship sadiay Session Hall ti Provincial Capitol, Vigan City.

Inlawlawag ni SPM Singson ti agtultuloy a panagadu iti Ilocos Sur dagiti kaso ti HIV a makaigapu iti saan pay a maagasan ken makapatay a sakit nga Acquired Immune Deficiency Syndrome (AIDS) ket kasapulan ti pannakaipaay ti naan-anay nga importansia a pannakatratarna tapno malapdan pay ti pannakayakar ti virus.

Inlalawagna a ti naireport a bilang dagiti HIV positive ket dagiti laeng nagpa-test, ken adu pay dagiti nalimed a possible a positibo iti dayta a virus a mabalin a mayakar kadagiti inosente a tattao. 

Sinalaysayna ti natakuatan a kaso ti maladaga a positibo ti HIV, nga idi na-test ti inana ket naduktalan met iti dayta a virus; ngem nagkitakit ti ama a nagpa-test tapno matakuatan koma no positibo iti dayta a virus.

Impaganetgetna a saan a mapilit dagiti tattao a mapan agpa-HIV test, ngem nasayaat a boluntario nga agpa-test dagiti high risk ti lifestyle-na tapno matakuatan ken makontrol ti panagsaknap ti virus.

Impakaammona nga adun dagiti HIV testing center iti Ilocos Sur a mabalin a papanan dagiti mayat nga agpa-test. Mairaman ti Gabriela Silang General Hospital – Ilocos Sur Provincial Hospital a libre nga agisaysayangkat iti HIV test. 

Inlawlawag met ni SPM Singson a napartak ti panagadu ti teenage pregnancy iti Region I pakairamanan ti Ilocos Sur gapu ti nakaro nga impluensia ti kinamodernon a panawen ken teknolohia ken panagbaybay-a dagiti nagannak gapu kadagiti adu a pakakumikomanda. Impasagepsepna a kasapulan ti pannakatarabay ken pannakaaywan dagiti agtutubo nangruna dagiti balasitang wenno teenagers tapno malapdan ti nasapa a panagsikog ken panagasawada.

Impaganetgetna a no agsikogen ti balasitang ket adu nga oportunidad ti mapukawna kas ti panagbasa iti pagadalan tapno makaileppas iti kurso para iti naraniag a masakbayan. 

Impakaammo pay ni SPM Singson a makaalarma ti kaadu dagiti nairekord a kaso ti panagpakamatay wenno suicide cases iti Ilocos Sur ta umad-adun dagiti manggibus iti bukodda a biag gapu iti depression ken kinaawanen
iti namnama.

Indariragna a dagiti agsagsagaba iti depression wenno napalaus a leddaang ket kasapulanda iti suporta nangruna dagiti kapamiliada, isu a rumbeng a paliiwenda dagiti addaan iti sintoma ti depression tapno matulonganda ida ket malapdan ti panagpakamatayda. 

Impakaammona nga mangiwayat ti Provincial Board iti gakat ken Provincial Government iti epektibo a programa tapno malapdan ti panagadu pay dagiti kaso ti HIV positive, teenage pregnancy ken
suicide incidents. ●