25 motorsiklo, nakumpiska iti 2 pagtagilakuan

BANTAY, Ilocos Sur – Agdagup iti duapulo ket lima a motorsiklo ti kinumpiska dagiti otoridad iti dua a pagtagilakuan a masarakan ditoy nga ili idi malem ti Agosto 6.

Lima a Motoposh Intense 110 motorcycles ti nakumpiska iti MP Cycleparts Trading, Inc. ken/wenno Exponent Motor Corporation idinto a 16 a Rusi MP-Y 100 ken 4 DL-Y125 motorcycles ti nasamsam iti Luzon Ram Cycles Inc., nga agpada a masarakan iti Quezon Avenue, National Highway, Zone 5, Bantay, Ilocos Sur.

Iggem dagiti otoridad ti writ of search and seizure, SW Civil Case No. 02-2014-June para iti MP Cycleparts Trading, Inc. ken/wenno Exponent Motor Corp. ken SW Civil Case No. 03-2014-June para iti Luzon Ram Cycles, Inc. nga inyisio ni Judge Rico Sebastian D. Liwanag ti RTC Branch 159, Pasig City, Manila a napetsaan iti Agosto 4, 2014.

Dagiti abogado ti Honda Giken Kogyo Kaisha wenno Honda Motor Co. Ltd. dagiti nagaplikar iti search warrant.

Kinuna ni Bantay COP Andrew Rabang nga immuna a naikoordinar kadakuada ti itutulongda iti implementasion ti writ of search and seizure maikontra kadagiti dua a pagtagilakuan nga impatungpal da Commissioner Atty. Ma Rosario Aranguren ken Sheriff Rene P. Jomada ti RTC, Branch 159, Pasig City.

Segun ken ni Rabang, kas maibatay iti writ of search and seizure, mapapati a natulad ti imprints ti patent ti Honda Motor Co. Ltd. a naikabil kadagiti nakumpiska a tagilako a motorsiklo.

Sinaksian dagiti pannakabagi ti Honda Giken Kogyo Kaisha wenno Honda Motor Co. Ltd. a pakaibilangan da Atty. Jose Eduardo T. Genilo, Rey Ortiguera ken Erichmond Lee, dagiti empleado dagiti dua a pagtagilakuan ken sumagmamano a barangay officials ti naisayangkat a pannakasukisok ken pannakakumpiska dagiti tagilako a motorsiklo.

Nagpatingga ti search and seizure iti agarup 3:35 ti malem iti nadakamat nga aldaw ket imbiahe a dagus ti grupo dagiti nakumpiska a motorsiklo ken naipaima iti kustodia ti sheriff ti RTC, Branch 159, Pasig City.

Kinuna ni Rabang a maipresentar kas ebidensia dagiti nakumpiska a motorsiklo iti nasao a korte a nangiyisio iti writ of search and seizure.#