Footer

2,500 Sasso a piek, naiwaras

San Juan, Ilocos Sur – Agdagup iti dua ribu ket lima gasut a piek (21 days old) a Sasso ti naiwaras kadagiti nadumaduma nga organisasion dagiti mannalon iti BArang-ay Demo Farm ditoy idi Nobiembre 28.

Naiwaras dagiti Sasso a piek iti duapulo ket lima nga organisasion dagiti mannalon manipud iti ili ti San Vicente, Caoayan, San Juan,Santa, Gregorio del Pilar, Burgos, Sto. Domingo, Magsingal, Sta. Maria, Lidlidda, Sinait, Bantay. San Emilio, San Esteban, Candon City, Quirino, Tagudin, Galimuyod, Banayoyo, Sugpon, Suyo ken Alilem.

Kinuna ni Gob. Deogracias Victor “DV” Savellano a napanunotna daytoy baro a programa a Developed Vigorous and Bountiful Sasso Chicken kas addang tapno masustener dagiti pammadayaw nga inawat ti probinsia itay nabiit.

Immawat itay nabiit ti probinsia kas Outstanding Poverty Reduction Program Implementer ken Green Banner Awardee.

Iti interbio kenkuana  bayat ti KABSAT Outreach Program iti Nagbukel, Ilocos Sur, inlawlawag ti gobernador a  two-in-one project daytoy agsipud ta makatulong iti livelihood dagiti umili ken makatulong pay iti nutrision.

“Maksayan ti kinapanglaw gapu ta agbalin a pamastrekan dagiti pamilia ti panagtarakenda iti Sasso ken masolbar ti malnutrision ta nasustansia daytoy a taraon,” kinuna ni Savellano.

Puntiria ti gobernador a mawarasan iti Sasso a manok amin a 768 a barbarangay iti Ilocos Sur.

Kabayatanna, kinuna ni Dr. Cesar Soller, farm demo manager, a 100 a piek ti maited iti tunggal organisasion apaman nga agdalan dagitoy iti seminar ken maipakitada nga adda nasayaat a lugar a pagtaraknanda kas iti alad ken brooder.

Innayonna nga inton mabalinen nga apiten dagiti Sasso a manok, isubli ti organisasion ti walo iti BArang-ay Demo Farm ket maikkanda manen iti 100 a piek.

Naammuan ken ni Soller a mapagitlog ti walo a maisubli a Sasso ket dagiti mapessaan ti iwarasda tapno masustener iti programa.

“Napintas a taraknen ti Sasso ta agpada a meat ken egg type daytoy,” kinuna ni Soller sana innayon nga agdagsenen daytoy iti 3 kilos kalpasan ti lime a bulan idinto a 500 grams laeng iti native a manok.#