26 kaso ti dengue iti Vigan City, naireport

VIGAN CITY – Agdagupen iti 26 a kaso ti dengue ti naireport ditoy siudad manipud idi Enero daytoy a tawen, segun iti chairman ii committee on health ti sangguniang panlungsod ditoy.

Iti reportna iti konseho itay nabiit, kinuna ni Konsehal Kristen Figuerres nga addan kadagupan a 26 a nagsakit iti dengue manipud idi Enero agingga iti Hulio 29 daytoy a tawen.

Segun ken ni Figuerres, maysan ti kumpirmado a natay a mapapati a maigapu iti daytoy a sakit.

Indagadag ni Figuerres ti ad-adda pay a panagdaldalus dagiti agindeg ditoy siudad iti paraangan ken pagtaenganda ken iti panagipattogda amin a pakaurnongan iti danum tapno awan ti pagitlogan ken pagindegan dagiti lamok.

Kinuna pay ti konsehal a no addan dagiti sintomas ti dengue kas iti panaggurigor, agpakunsolta a dagus iti doktor.

Innayon ti doktor a konsehal a no adda dagiti kumpirmado a nagsakit iti dengue iti barangay, mabalin dagit barangay officials ti agkiddaw iti city health office para iti panag-fogging iti lugarda.#