268 kaso ti dengue naireport manipud Enero-Hulio 2014

VIGAN CITY – Addan naireport a 268 a kaso iti dengue ditoy probinsia manipud Enero agingga iti Hulio daytoy a tawen.

Kinuna ni Dengue Coordinator Oscar Frio ti Provincial Health Office, ti Tagudin ti kaadduan ti naireport a kaso ti dengue iti daytoy a panawen nga agdagup iti 65; maikadua ti Caoayan, (35); maikatlo ti Suyo (24).

Nupay kasta, kinuna ni Frio nga awan pay ti naireport a natay iti dengue iti probinsia.

Segun ken ni Frio, saan laengen a seasonal no di year-round ti panagruar ti dengue isu nga itultuloy koma latta dagiti lokal a gobierno ti panagiwayatda iti fogging operations, panagdaldalus iti arubayan, 4 o’clock habit ken panagipattog kadagiti amin a pagurnongan ti danum nga agbalin a pagitlogan ken pagbalayan dagiti lamok.

Maysa a klase ti lamok, ti Aedes aegypti, ti pagtaudan ti sakit a dengue.#