27 motorista, natiliw

BANTAY, Ilocos Sur – Agdagup iti duapulo ket pito a motorista ti tiniliw dagiti polis ditoy iti nagsaruno nga aldaw gapu iti panagsalungasingda iti paglintegan ken ordinansa ti trapiko.

Iti report manipud iti polis ditoy, 27 a motorista ti tiniliwda iti insayangkatda a checkpoint iti sango ti police station manipud iti alas 8:00 ti bigat ti Abril 19 agingga iti alas 6:00 ti bigat ti Abril 20 gapu iti panaglabsingda iti traffic laws and ordinance.

Kinumpiska dagiti polis ti driver’s license dagiti naglabsing ket sa laeng naisubli dagitoy kalpasan a binayadanda ti multa iti treasury office.

Agtultuloy ti nainget a panagtiliw dagiti polis ditoy dagiti motorista gapu iti kaawan ti silaw ti luganda, awan ti lisensiada, awan ti aramatda a helmet, awan plakada, ken dadduma pay a paglabsingan iti linteg ti trapiko ken ordinansa.#