27 nagdonar iti dara

SAN JUAN, Ilocos Sur – Agdagup iti duapulo ket pito a residente ditoy ti nagidonar iti dara bayat ti blood letting activity a naangay ditoy itay nabiit.

Kinuna ni ABC President Edwin Singson a naisayangkat ti blood letting activity babaen ti panagbinnulig ti gobierno munisipal ditoy ken ti Don Mariano Marcos Memorial Hospital, Batac City.

Sag-500 c.c. ti dara nga indonar dagiti nakipartisipar iti nasao a blood letting activity.

Segun ken ni Singson, dagiti barangay captains ti nangidaulo a nagidonar iti dara a maideposito iti Don Mariano Marcos Memorial Hospital a maaramat no adda emerhensia a kasapulan dagiti residente iti San Juan nangruna dagiti mabiktima iti dengue.#