28 paltog, naisuko for safekeeping iti Vigan City

VIGAN CITY –  Duapulo ket walo a nadumaduma ti klasena a paltog a naisuko iti polis ditoy ti naputipotan ti murdongda babaen iti tape tapno masiguro a saanda a maaramat iti aniaman a krimen kabayatan wenno kalpasan ti eleksion.

Pinutipotan da Police Superintendent Maximo Taclas, hepe ti polis ditoy, ti murdong dagiti nadakamat a paltog iti imatang dagiti gun owners, kandidato, nadumaduma a sektor a pakairamanan ti media bayat ti simple a programa a naangay iti city hall idi Abril 30, kalpasan ti naisayangkat a peace covenant dagiti kandidato iti Vigan City ken ti unity walk iti aglawlaw ti Plaza Salcedo.

Kinuna ni Taclas , a naisuko iti kapolisan dagiti nasao a nadumaduma a paltog kas paset ti kampania nga Operation Katok.

Kalpasan ti pannakabarabad ti muzzle dagiti paltog, napirmaanda tapno masiguro a saan maaramat dagitoy iti aniaman a krimen bayat ken kalpasan ti eleksion.

Kinuna ni Taclas nga ammoda nga adda 394 a lisensiado a paltog iti ima dagiti agnaed iti siudad ket ammoda ti bilang dagiti napukaw, dagiti nakapaglisensia, ken dagiti nagpason ti lisensiada ket dagitoy ti kinapatpatangda tapno isukoda dagiti di pay napabaro ti lisensiana nga armasda.

Immuna ngem daytoy, naisayangkat ti maysa a peace covenant a naangay iti uneg ti Simbaan ni San Pablo a nagpipinnirmaan dagiti kandidato iti Vigan City ken nangikarianda iti pannakitinnakunaynayda iti natalna ken naurnos nga eleksion.

Ngem maysa a dina kayat painaganan a residente ditoy ti nagkuna a saan a nabara ti eleksion iti Vigan City agsipud ta malaksid ta 13 laeng dagiti kandidato para konsehal iti Vigan City, agpada nga awan ti kasango da incumbent Mayor Eva Marie S. Medina ken Vice Mayor Lourdes Baquiran gapu iti napintas a nagapuananda iti pannakaimanehar ti turay ditoy siudad.

Kalpasan ti peace covenant, naangay met ti unity walk babaen met laeng ti initiatibo ti kapolisan kas panangipakita iti panagmaymaysa dagiti nakipartisipar para iti naseguridad ken patas nga eleksion.

Kinuna ni Taclas a saan laeng koma a maipabaklay iti kapolisan ti pannakamentener iti linak ken talna iti siudad ket indagadagna ti pannakitinnulong ti sibubukel a komunidad tapno  naurnos ken naseguridad ti maisayangkat nga eleksion inton Mayo 13.#