Footer

280 pamilia naibakuit gapu iti aluyo

PANGASINAN – Dua gasut ket walopulo a pamilia ti naibakuit gapu iti aluyo a nanglayus kadagiti kabalbalayan iti lima nga ili ken maysa a siudad ditoy.

Segun ken ni provincial disaster coordinating council (PDCC) executive officer Paterno Ordoña, nalayus ti ili ti Lingayen, Binmaley, San Fabian, Labrador ken Bolinao, ken ti siudad ti Dagupan gapu iti panagaluyona ket naibakuit ti 280 a pamilia nga agnaed kadagitoy a coastal areas kadagiti evacuation centers iti probinsia.

Napaliiw a nagdinakkel ti danum iti alas sais iti malem Nobiembre 27 ket nagpababa iti alas 5 iti bigat ti sumaruno nga aldaw.

Kinuna ti Philvocs a naparnuay ti aluyo gapu iti dakes a panawen a ginubuay ti Bagyo Mina ken ti northeast monsoon.

Kabayatanna, 50 a pamilia nga agnaed iti sumagmamano a barangay ti Agoo, La Union ken 16 a pamilia iti Barangay Pilar, Bauang, La Union ti naibakuit met gapu iti panagaluyona.

Naipadamag pay nga 6 a kuarto ti Pilar Elem. School iti nasao a barangay ti total ken partial a nadadael gapu iti pannakalayusna.

Ad-adda manen a nagkaribuso dagiti residente dagiti lima nga coastal barangays ken maysa a siudad ditoy a probinsia gapu iti sayangguseng nga adda dumteng a tsunami  kalpasan ti  panaggingined a naisentro iti 86 kilometro iti laud ti Lingayen.

Nupay kasta, pinagkalma ni Renato Solidum, Philvocs director, a saan a napigsa unay ti ginggined tapno makaparnuay iti tsunami ket napasamak koma daytoy manipud iti trenta minutos agingga iti maysa nga oras kalpasan ti ginggined.

Nailista nga agpigsa ti ginggined iti intensity 6 iti Lingayen.#