2nd cropping, manamnama a nalabon ti maapit: rice program coordinator

CABUGAO, Ilocos Sur – Pitupulo porsiento ti naanin kadagiti pinagayan idi simmiplag ti Bagyo Lawin idi Oktubre 19-20, segun ken ni Cabugao Municipal Rice Program Coordinator Nerio S. Daproza.

Kinuna ni Daproza a 100% pay laeng ti self-sufficiency daytoy nga ili iti bagas agsipud ta 5% laeng ti nadadael nga apit gapu iti Bagyo Lawin.

Naammuan ken ni Daproza a 1,284 metrika-tonelada ti produksion ti pagay ti Cabugao iti wet season daytoy a tawen manipud iti Hunio agingga iti Nobiembre.

Impakaammo ni Daproza nga addan 220 ektaria a natalon iti 25 a barangay ditoy nga ili para iti second crop ti pagay a nangrugi itay Nobiembre ken agpatingga inton Pebrero 2017.

Kinuna ni Daproza a manmano nga agmintis ti second cropping agsipud ta nalabon pay ti danum nga aggapu iti karayan, malaksid laeng ti irigasion, shallow tube wells, ken ubbog nga usarenda a mangpatan-ay iti raepda agingga iti bulan ti Pebrero 2017.

Kabayatanna, dua a kalding ken tumbler ti naiwaras kadagiti resipiente ti 4Ps iti simple a programa a naangay iti Cabugao Cultural and Sports Complex, Barangay Rizal, ditoy nga ili idi Oktubre 28.

Inyawat ni Dennis Aguimbag, PDO ti SLP-DSWD Region 1, ti dua a kalding ken tumbler kadagiti resipiente ti 4Ps a partisipante iti Sustainable Livelihood Program (SLP) ti DSWD a nakikammayetan ti LGU-Cabugao nga idauluan ni Mayor Josh Edward S. Cobangbang.

Kinuna ni Juliet Madriaga, municipal link staff, nga addanto pay sumaruno nga iskediul ti pannakaited iti taraken a kalding agingga iti sapasap a maikkan amin dagiti 120 a trainees.

Sakbayna, naaramid idi Oktubre 11-12, 2016 ti panagsanay dagiti 120 a benepisario ti 4Ps ditoy nga ili iti Skills Training on Goat Raising with Vegetable Production idiay Barang-ay Demo Farm, Barangay Labnig, San Juan, Ilocos Sur ken iti Cabugao Cultural and Sports Complex, Brgy. Rizal, Cabugao, Ilocos Sur.#